Piketberg (bergreeks)
Die Piketberg is 'n bergreeks geleë in die Swartlandstreek van die Wes-Kaap, Suid-Afrika.[1] Dit bestaan uit lae berge wat grootliks uit Tafelberg-sandsteen saamgestel is.[2] Die hoogste punt, Sebrakop, ryk tot sowat 1 440 meter bo seevlak.
Dorpe[wysig | wysig bron]
Die berg word deur verskillende dorpe begrens, naamlik Aurora aan die noordwestekant, Redelinghuys aan die noordekant, Goedverwacht in die suidweste en Piketberg aan die suidoostelike hange.[1] Die landbougemeenskap van Piket-Bo-Berg is op 'n plato op die suidsentrale deel van die berg gevestig. Hierdie area kan via Goedverwacht bereik word, of van Piketberg se kant, via die Versfeldpas.
Flora[wysig | wysig bron]
Die Piketberg is by plantkundiges bekend om sy groot verskeidenheid fynbosspesies, en die protea-familie is veral sterk verteenwoordig. Die plaaslike variant van die koningsprotea (P. cynaroides), so skryf 'n kenner van hierdie plante, die suikerkan (P. nerifolia), suikerbos (P. repens) en waboom (P. nitida) is almal besonder volop, benewens tolbosse (Leucadendron), waaronder die knokkerbos (L. pubescens). In haar boek oor proteas verwys Marie Vogts telkens na minder bekende plante van hierdie familie wat plaaslik inheems is. Die besondere rooitolbos (L. discolor) word beskryf as "'n pragtige leucadendron wat beperk is tot Piketberg".[3] Ander genera van die protea-familie soos speldekussings (Leucospermum), stompies (Mimetes), spinnekopbosse (Serruria), ensomeer, is ook in goeie getalle aanwesig. Daarbenewens is die verskeidenheid heide (Erica) en sewejaartjies iets besonders. Daar is besmoontlik meer plantspesies op die Piketberg as in die ganse Britse Eilande.[4] Die Banghoek- Private Natuurreservaat en Mountain Mist-reservaat bewaar gedeeltes van die berg.
Etimologie[wysig | wysig bron]
Die naam is afkomstig van die ou Nederlandse woord 'picquet' aangesien 'n klein militêre buitepos of 'pikets' in die 1670's hier geplaas is om die boere te beskerm teen veediefstalstrooptogte deur die Kogikwa-khoikhoi onder leiding van Gonnema.[5]
'n Ander moontlike bron van Piketberg se naam kan met die Franse kaartspel piquet verband hou.[5] 'n Volkslegende sou verklaar dat 'n Franse vlugteling (oftewel Hugenoot) wat aan die kant van die berg gewoon het, dikwels rondtes 'piquet' saam met sy vrou gespeel het. Tydens die enkele vorige besoeke van 'n rondgaande Franse amptenaar sou die egpaar dan ook piquet gespeel het. Op 'n dag het hierdie amptenaar wat die plaasname en hul inwoners moes opteken, opnuut daar aangedoen. Nadat hy hul aandag daarop gevestig het dat hulle telkens piquet speel as hy opdaag, het hy hulle na die naam van hul plaas gevra. Die Fransman, vermoedelik Jaques Mouton, het geantwoord: "Eh bien, monsieur, écrivez Mont de Piquet" (Wel meneer, skryf maar Piketberg.)
Verwysings[wysig | wysig bron]
- ↑ 1,0 1,1 "Piketberg | South African History Online". www.sahistory.org.za. Besoek op 22 September 2023.
- ↑ https://www.western-cape-info.com/provinces/town/257/piketberg
- ↑ Vogts, Marie (1982) Kaapstad, Struik. Suid-Afrika se Proteacea – Ken hulle en Kweek hulle, bl. 225.
- ↑ du Preez, Thys (1994). Die Berg Piketberg en sy Mense, bl. 92
- ↑ 5,0 5,1 du Preez, Thuys (1994). "Die Berg Piketberg en sy Mense". p. 1. Geargiveer vanaf die oorspronklike op 27 September 2023. Besoek op 27 September 2023.
