Priester Jan
Priester Jan (in Duits: Priesterkönig Johannes, in Nederlands: Pape Jan) was ‘n legendariese 12de eeuse Christelike heerser van ‘n koninkryk in die Verre Ooste. Reeds in geskrifte uit die vroeë Middeleeue kom sy naam voor. Die soektog na hierdie heerser het bygedra tot die ontdekkingsreise in en rondom Asië en Afrika.
Legende
[wysig | wysig bron]Priester Jan was ‘n direkte afstammeling van die koningin van Skeba en die drie wyse manne wat by die geboorte van Christus teenwoordig was. Hierdie mitiese Middeleeuse priester-koning is in die tydperk van die 12de tot die 17de eeu in Europa as ‘n egte mens beskou. Hy was glo baie ryk aan silwer, omring deur allerhande mitiese wesens en het in die 12de en 13de eeu oor ‘n gewaande afgeleë Christelike ryk in Asië regeer. Die Westerse lande het na hom uitgereik as ‘n moontlike bondgenoot in die Kruistogte teen die Islam. Toe Asië in die middel van die 14de eeu al hoe meer bekend raak, is Ethiopië as sy blyplek beskou.
Soektogte
[wysig | wysig bron]Verskeie pogings is aangewend om Priester Jan en sy ryk te vind. In die 13de en 14de eeu is ‘n aantal reisigers, insluitend Marco Polo, na Asië. In 1316 het die pous selfs 8 Dominikaanse monnike as gesante na Ethiopië gestuur. Prins Hendrik die Seevaarder het al sy kapteins opdrag gegee om te help soek na Priester Jan.
Letterkunde
[wysig | wysig bron]Teen die einde van die 17de eeu het die denkers van die tyd hul twyfels begin uitspreek oor of Priester Jan ooit werklik bestaan. Langsamerhand het dit duidelik geword dat die bestaan van hierdie persoon en sy koninkryk bloot ‘n Europese versinsel was. Die mite leef egter voort in die letterkunde.
Lees ook
[wysig | wysig bron]Bibliografie
[wysig | wysig bron]- artsandculture.google.com/story/DAXB244SO-iqLg
- mirandakaufmann.com/prester-john.html
- thecollector.com/prester-john-medieval-legend/