RuPaul

in Wikipedia, die vrye ensiklopedie
RuPaul
RuPaul praat in 2019 op RuPaul's DragCon in Los Angeles.
RuPaul praat in 2019 op RuPaul's DragCon in Los Angeles.
Beroep
Geboortenaam RuPaul Andre Charles
Gebore 17 November 1960 (1960-11-17) (63 jaar oud)
San Diego, Kalifornië, VSA
Aktief 1982-tans
Eggenoot Georges LeBar
Musiekgenres
  • Danspop
  • dans
  • disco house
  • R&B
  • eurodans
  • electro house
Webtuiste rupaul.com

RuPaul Andre Charles[1][2] (gebore 17 November 1960) is 'n Amerikaanse fopdosser. Hy het al beide manlike en vroulike rolle vertolk[3] en gee nie om of hy "hy" of "sy" genoem word nie.[4] In dié artikel word hy vir eenvormigheid "hy" genoem. Hy vervaardig, beoordeel en is die gasheer van die werklikheidsreeks RuPaul's Drag Race en het al talle pryse ontvang, onder meer 12 Emmys. Hy is al gedoop die "Queen of Drag".

Lewe en loopbaan[wysig | wysig bron]

RuPaul is in San Diego gebore en opgevoed en het uitvoerende kunste in Atlanta, Georgia, studeer. Hy het na New York verhuis waar hy gewild geword het op die LGBT-nagklubtoneel. Hy het internasionale roem verwerf met die uitreiking van sy debuutenkelspeler, "Supermodel (You Better Work)", wat ingesluit is in sy debuutalbum, Supermodel of the World (1993). In 1994 het hy 'n woordvoeder vir MAC Cosmetics geword en geld ingesamel vir die MAC-vigsfonds. Hy was die eerste fopdosser wat 'n groot kosmetiekveldtog gelei het. Hy het later sy eie TV-geselsprogram op VH1, The RuPaul Show, gekry. Hy was 100 episodes lank die gasheer daarvan terwyl hy ook 'n radioprogram op die netwerk WKTU behartig het.

RuPaul in 2007.

RuPaul's Drag Race is in 2009 geskep en het 15 seisoene in die VSA deurleef. Dit was ook internasionaal gewild en het verskeie uitloperprogramme tot gevolg gehad, soos RuPaul's Drag Race UK, RuPaul's Drag U, RuPaul's Drag Race All Stars, ensovoorts. Hy was ook die gasheer van verskeie ander TV-werklikheidsreekse, soos Skin Wars, Good Work en Gay for Play Game Show Starring RuPaul.

RuPaul het opgetree in verskeie rolprente soos Crooklyn (1994), The Brady Bunch Movie (1995) en But I'm a Cheerleader (1999), en TV-reekse soos Girlboss (2017), Broad City (2017) en Grace and Frankie (2019). Hy het later sy eie Netflix-televisiereeks, AJ and the Queen (2020), vervaardig en daarin opgetree. Hy het drie boeke geskryf: Lettin' It All Hang Out (1995), Workin' It! RuPaul's Guide to Life, Liberty, and the Pursuit of Style (2010) en GuRu (2018).

RuPaul word beskou as die kommersieel suksesvolste fopdosser in die VSA. Volgens die tydskrif Fortune is hy "maklik die wêreld se beroemdste fopdosser".[5] Vir sy werk aan RuPaul's Drag Race het hy 12 Emmys ontvang, wat hom die gekleurde persoon met die meeste pryse in die geskiedenis van die Emmys maak.[6]

In 2017 is RuPaul ingesluit op die jaarlikse Time 100-lys van die invloedrykste mense in die wêreld.[7] In 2022 het hy 'n Tony ontvang as die vervaardiger vir die musiekspel A Strange Loop.[8]

Verwysings[wysig | wysig bron]

  1. ↑ "Rupaul A Charles, (212) 929-2363, age 61 from 155 Perry St #3A, New York, NY 10014 - Radaris". radaris.com. Besoek op 21 Oktober 2022.
  2. ↑ "RUCO, INC, Brooklyn NY - Company Profile | BizStanding". bizstanding.com. Besoek op 21 Oktober 2022.
  3. ↑ RuPaul (1995). Lettin' It All Hang Out: An Autobiography. Hyperion Books. ISBN 978-0-7868-6156-9.
  4. ↑ RuPaul's Drag Race [@RuPaulsDragRace] (2013). ""You can call me he. You can call me she. You can call me Regis & Cathy Lee; I don't care! Just as long as you call me" - @RuPaul #RuFerence" (Tweet) – via Twitter.
  5. ↑ Klein, Jessica (24 September 2019). "As 'RuPaul's Drag Race' Expands to the U.K., DragCon Shines Light on Its Mainstream Success". Fortune (in Engels). Besoek op 18 November 2019.
  6. ↑ Gonzalez, Sandra (20 September 2021). "RuPaul makes Emmy history". CNN. Geargiveer vanaf die oorspronklike op 20 September 2021. Besoek op 20 September 2021.
  7. ↑ "RuPaul: The World's 100 Most Influential People". Time. Geargiveer vanaf die oorspronklike op 3 April 2020. Besoek op 10 Augustus 2017.
  8. ↑ Jacobs, Julia (12 Junie 2022). "Tony Awards 2022 Live Updates: 'A Strange Loop' Wins Best Musical". The New York Times (in Engels (VSA)). ISSN 0362-4331. Besoek op 13 Junie 2022.

Skakels[wysig | wysig bron]

Ontsluit van "https://af.wikipedia.org/w/index.php?title=RuPaul&oldid=2601520"