SA Lombard-wildreservaat

in Wikipedia, die vrye ensiklopedie
Jump to navigation Jump to search

Koördinate: 27°36′20.46″S 25°27′52.49″O / 27.6056833°S 25.4645806°O / -27.6056833; 25.4645806

Die SA Lombard-wildreservaat is ongeveer 20 km wes van Bloemhof in die provisie Noord-Wes op 1200 m hoogte geleë. Die streek ontvang ongeveer 380-500 mm reën per jaar, veral tussen November en April. In die somer kan die temperatuur hoër as 27 °C en in die winter laer as 10 °C word. In Junie en Julie daal die temperatuur soms tot onder vriespunt. Die reservaat is ongeveer 46 km² groot en is taamlik vlak en amper boomloos. Die gebied bestaan uit 'n westelike en 'n oostelike helfte. Op die grens is 'n deel waar daar tot ongeveer 1920 diamante gemyn is. In die Tweede Wêreldoorlog is hier met muile geboer en 1950 is dit deur die Nature Conservation Branch oorgeneem. In 1954 het dit 'n reservaat geword. [1] Die reservaat het 'n groot rol in die behoud van die swartwildebees gespeel en is nie oop vir besoekers nie.[2]

Plante[wysig | wysig bron]

Die gebied bestaan uit grasveld met plek-plek struike. Dit word Cymbopogon-Themeda-veld genoem. Die oostelike helfte bestaan veral uit brakturf, die westelike uit sanderige leem. Die brakturf oorstroom gereëld en die lae dele daarvan is veral met die grasspesies Sporobolus ludwigii en S. ioclados usitatus bedek. Lycium hirsutum kom hier ook voor. Die hoër dele het Cymbopogon en Themeda-grasse en 'ganna', wat klein struikies bevat soos in die Karoo. Die westelike Cymbopogon-Themeda-veld bevat spesies soos Themeda triandra, Cymbopogon plurinodis, Eragrostis lehmanniana, Eregrostis atherstonii, Enneapogon scoparius, Rhus lancea, Ziziphus mucronata, Diospyros licioides en Grewia flava. In die noorde word panne aangetref met die waterplant Marsilea macrocarpa en die grasspesie Diplachne fusca.[1]

Fauna[wysig | wysig bron]

Daar word talle bokke in die reservaat aangetref, veral die swartwildebees, blesbok, eland, rooibok, hartebees en springbok. [1]

Verwysings[wysig | wysig bron]

  1. 1,0 1,1 1,2 J. H. M. Van Zyl (1965) The Vegetation of the S. A. Lombard Nature Reserve and its Utilisation by Certain Antelope, Zoologica Africana, 1:1, 55-71, DOI: 10.1080/00445096.1965.11447299.
  2. "sa-venues" (in Engels). Geargiveer vanaf die oorspronklike op 1 Augustus 2017.