Sierra Nevada (Verenigde State)
Die Sierra Nevada (Engels: [siˈɛrə nɨˈvɑːdə] of [nɨˈvædə], Spaans: [ˈsjera neˈβaða], "sneeubedekte bergreeks"[1]) is 'n bergreeks in die westelike Verenigde State, geleë tussen die Sentrale Vallei van Kalifornië en die Basin and Range Province, 'n uitgestrekte fisiografiese streek wat suidwaarts tot Meksiko strek. Die Sierra Nevada is die hoogste bergreeks in die samehangende landgebied van die Verenigde State buite Alaska en Hawaii en een van die belangrikste waterbronne vir Suid-Kalifornië.[2]
Die grootste deel van die Sierra Nevada is in die deelstaat Kalifornië geleë, behalwe vir die bergreeks Carson Range, 'n uitloper wat grotendeels anderkant die staatsgrens in Nevada geleë is. Die Sierra Nevada maak deel uit van die Amerikaanse Cordillera, 'n byna ononderbroke ketting van bergreekse (Spaans: cordillera) wat langs die weskus van Noord-, Sentraal- en Suid-Amerika en verder suidwaarts tot Antarktika strek.
Die Sierra Nevada strek oor 'n afstand van 400 myl (640 km) in noord-suidelike rigting, en oor 70 myl (110 km) in oos-westelike-rigting. Geografiese bakens is in die bergreeks geleë soos die varsmatermeer Lake Tahoe (die grootste Alpynse meer in Noord-Amerika), Mount Whitney (die hoogste bergpiek van die VSA buite Alaska en Hawaii op 'n hoogte van 4 421 m bo seevlak) en die Yosemite-vallei, wat deur gletsers in 'n 100 miljoen jaar oue granietmassief gesny is.
Die reeks, wat oorspronklik as 'n kusgebergte gevorm is, het sy huidige binnelandse ligging aan plaattektoniek te danke. Dit is binnelands toe geskuif toe die Stille Oseaanbodem sowat 200 miljoen jaar gelede begin uitbrei het en met die Noord-Amerikaanse plaat gebots het.[3]
Drie nasionale parke, twintig wildernisgebiede en twee nasionale monumente is in die Sierra Nevada geskep, waaronder die Nasionale Yosemite-, Sequoia- en Kings Canyon-parke en die Nasionale Devils Postpile-monument.
Verwysings[wysig | wysig bron]
- ↑ Helen S. Carlson: Nevada Place Names: A Geographical Dictionary. Reno: University of Nevada Press 1976, bl. 215
- ↑ Adam M. Sowards en Mark Stoll (Series Editor): ABC-CLIO's Nature and Human Societies Series - United States West Coast. An Environmental History. Santa Barbara, California: ABC-CLIO 2007, bl. 9
- ↑ Sowards (2007), bl. 2
Normdata  |
|
|---|