Sint Jorisdag

in Wikipedia, die vrye ensiklopedie
Spring na: navigasie, soek
St. George's Day-feesvieringe in Engeland. Die vlag van Engeland vertoon 'n rooi Sint-Joriskruis op 'n wit agtergrond

Sint Jorisdag is die feesdag van Sint Joris.

Min is bekend oor Sint Joris as historiese persoonlikheid. Daar word aangeneem dat hy in die laat 3de eeu n.C. in 'n edele familie in Kappadosië ('n historiese streek in moderne Turkye) gebore is. Hy het in die voetspore van sy vader gevolg en 'n militêre loopbaan gekies. Later het hy deel van keiser Diocletianus se lyfwagte geword. Toe hy geweier het om by Diocletianus se stelselmatige Christenvervolging betrokke te raak, is hy in 303 self gemartel en in Palestina tereggestel. Ná sy dood is hy as 'n vroeë Christelike martelaar vereer.

Sint Jorisdag word deur 'n aantal Christelike kerke en deur verskeie lande en nedersettings, wat Sint Joris as beskermheilige vereer, op 23 April gevier om sy marteldood op dié datum in 303 n.C. te gedenk. As St. George's Day word Sint Jorisdag as die nasionale dag van Engeland en sy kultuur gevier.

Sint Joris het in sy leeftyd nooit 'n besoek aan die Britse Eilande gebring nie, maar word sedert die Middeleeue in Engeland as beskermheilige vereer. Volgens legendes het Sint Joris gedurende die Kruistogte en die Honderdjarige Oorlog teen Frankryk aan Engelse kant geveg. Die legende van Sint Joris, wat 'n draak as sinnebeeld vir die Duiwel doodmaak en 'n onskuldige jonkvrou van die dood red, het sy oorsprong in die Middeleeue.[1][2] Sint Jorisdag-feesvieringe het minder gewild geraak met die politieke unie tussen Engeland en Skotland in 1707, maar het in moderne tye 'n herlewing beleef.

Verwysings[wysig | wysig bron]