Sint Patricksdag

in Wikipedia, die vrye ensiklopedie
Sint Patricksdag in Buenos Aires, Argentinië
'n Godsdienstige prosessie ter ere van Sint Patrick in County Down, Noord-Ierland
Die Operahuis in Sydney, Australië, word ter geleentheid van Sint Patricksdag groen verlig
Twee meisies speel Ierse folkmusiek tydens 'n feesoptog in Dublin

Sint Patricksdag of die Sint Patrickfees (Engels: Saint Patrick's Day; Iers: Lá Fhéile Pádraig) is 'n kulturele en godsdienstige feesdag wat op 17 Maart, die tradisionele sterfdag van Ierland se beskermheilige Sint Patrick (omstreeks 385-461), gehou word.

Sint Patrick is in die laat 4de eeu in die Romeinse provinsie Britannia gebore vanwaar hy in die ouderdom van 16 ontvoer en as slaaf na Ierland geneem is. Hy het daarin geslaag om te ontsnap, maar het in 432 na Ierland teruggekeer om die Iere tot die Christendom te bekeer. Ná 'n lewe van diens en toewyding, waartydens hy talle kloosters, kerke en skole op die eiland gevestig het, is hy op 17 Maart 461 oorlede.

Ná sy afsterwe het talle legendes rondom Sint Patrick begin groei. So is onder meer beweer dat hy alle slange uit Ierland verdryf het (slange is nie endemies aan die eiland nie, maar in die destydse konteks as metafore vir heidense gelowe gebruik wat deur Sint Patrick teruggedring is) en die klawer gebruik het om die leerstelling van die Drie-enigheid te verduidelik. Sy sterfdag is in Ierland met kerkdienste en feeste herdenk.[1]

Sint Patricksdag is in die vroeë 17de eeu tot feesdag verklaar en word deur die Rooms-Katolieke Kerk, die Anglikaanse Gemeenskap (veral die Kerk van Ierland), die Oosters-Ortodokse Kerk en Lutherse kerke waargeneem. Die fees herdenk Sint Patrick en die koms van die Christendom in Ierland, maar dit is ook die dag waarop die Ierse erfenis en kultuur en die Ierse volk in die algemeen gevier word.

Feesvierings sluit openbare optogte en feeste, céilithe (tradisionele Gaeliese byeenkomste met musiek en dans) en die dra van groen kleding of shamrock (jong klawerplante) in. Christene woon daarnaas ook kerkdienste by, en ter geleentheid van Sint Patricksdag word kerklike voorskrifte aangaande die vastyd voor die Paasfees tydelik opgehef – dit is ook die rede hoekom die feesdag tradisioneel met drankverbruik verbind word.

Sint Patricksdag is 'n openbare vakansiedag in die Republiek van Ierland, Noord-Ierland, Newfoundland en Labrador en Montserrat. Die fees word dwarsoor die wêreld ook deur Ierse gemeenskappe waargeneem, veral in Groot-Brittanje, Kanada, die Verenigde State, Australië, Nieu-Seeland en Argentinië waargeneem.

St Patrick's Day viering in Ierland[wysig | wysig bron]

Verwysings[wysig | wysig bron]

Eksterne skakels[wysig | wysig bron]

  • Wikimedia Commons logo Wikimedia Commons het meer media in die kategorie Sint Patricksdag.
  • (en) "Saint Patrick's Day". Encyclopædia Britannica. Besoek op 21 April 2019.