Sotsji

in Wikipedia, die vrye ensiklopedie
Spring na: navigasie, soek

Sotsji
Сочи
Сочи-коллаж1.jpg

Kaart Wapen
Sochi at Black Sea with Krasnodarski Krai.png
Coat of Arms of Sochi (Krasnodar krai).svg
Vlag
Flag of Sochi (Krasnodar krai).svg
 Land Flag of Russia.svg Russiese Federasie
 Federale distrik Suid-Rusland
 Federale subjek Krasnodar-krai
 Koördinate 43°35′N 39°44′O
 Stigting 1838 (Aleksandrija)
 Stadstatus 1917
 Oppervlak:  
 - Totaal 3 508 vk km
 Hoogte bo seevlak 0-700 m
 Bevolking:  
 - Totaal (2010) 343 300
 - Bevolkingsdigtheid 98/vk km
 Tydsone UTC +3
 Burgemeester Wiktor Kolodjasjni
 Amptelike Webwerf sochiadm.ru

Sotsji (Russies: Сочи) ['soʨɪ]) is 'n Russiese vakansie- en hersteloord in Krasnodar-krai net noord van die Russiese Federasie se suidelike grens met 343 300 inwoners volgens die sensus van 2010. Die groter stad strek oor 'n lengte van 145 km langs die kus van die Swartsee en lê aan die voet van die Kaukasusbergreeks se sneeubedekte bergspitse.

Groot Sotsji, 'n agglomerasie met 'n bevolking van 400 000 (insluitende omliggende nedersettings) is danksy die subtropiese klimaat, uitgestrekte bosgebiede, die groot getal villa's, sanatoria en mineraalbaddens reeds sedert die laat 19de eeu die gewildste bad- en hersteloord in Rusland. Die stad en sy omgewing, wat as die Russiese Riviera bekend staan, lok jaarliks miljoene toeriste.

Sotsji is in Julie 2007 deur die Internasionale Olimpiese Komitee as die gasheerstad van die XXII Olimpiese Winterspele 2014 en die XI Paralimpiese Winterspele 2014 aangewys. In 2018 sal wedstryde van die Sokkerwêreldkampioenskap in die plaaslike stadion plaasvind.

Geografie[wysig | wysig bron]

Die Swartsee naby Sotsji (foto in 1915 geneem)
Sotsji gesien vanaf die Swartsee

Sotsji se stadsgebied, wat oor 'n lengte van 145 kilometer langs die noordoostelike kus van die Swartsee strek, is een van die langstes ter wêreld.

Die Sjepsirivier suid van Toeapse vorm die noordwestelike grens van Sotsji, die Psourivier sowel Sotsji asook Rusland se suidoostelike grens met die Republiek Abchasië, wat voor sy eensydige onafhanklikheidsverklaring deel uitgemaak het van Georgië. Met 'n bevolkingsdigtheid van minder as 100 inwoners per vierkante kilometer is Sotsji een van die ylbevolkste stede ter wêreld.

Die voorgebergte van die Kaukasusbergreeks strek tot digby die kus en bereik hier reeds hoogtes van omtrent 1 000 m. Danksy die beskermde ligging word Sotsji se klimaat deur baie matige winters gekenmerk.

Die hoofberge van die Kaukasus is sowat 25 tot 40 km van die kus af, maar bereik egter hoogtes van meer as 3 000 m soos byvoorbeld die bergspits Zachwoa (3 345 m).

'n Aantal bergriviere soos Psesoeapse, Sjache, Sotsji en Msimta vloei deur Sotsji se stadsgebied en mond hier in die Swartsee uit.

Klimaat[wysig | wysig bron]

Danksy sy ligging word die kusgebied van Sotsji deur 'n subtropiese klimaat met lang en baie warm somers, warm najare en kort en matige winters gekenmerk. Sotsji is die enigste nedersetting in die Russiese Federasie asook die noordelikste plek op aarde met 'n subtropiese klimaat. Die stad kry 'n gemiddeld van meer as 2 000 sonskynure per jaar.

Krasnaja Poljana

Die gemiddelde jaarlikse temperatuur is +14 °C. Januarie en Februarie is die koudste maande van die jaar met sowat +6 °C, Julie en Augustus die warmstes met sowat +23 °C. Die laagste temperatuur wat ooit in Sotsji aangeteken is, was -13,4 °C op 25 Januarie 1892, die hoogste +39 °C op 28 Julie 1981. Op 22 Januarie 1948 het die kwik tot +21,2 °C gestyg, terwyl temperature in die maande Julie en Augustus nog nooit benede +10 °C gedaal het nie. Die gemiddelde temperatuur van die Swartsee se water in Augustus is +24,1 °C.

Die gebied kry 'n gemiddelde jaarlikse reënval van meer as 1 600 mm. Die meeste reën val in die wintermaande met 'n maksimum van 190 mm in Desember en Januarie. Die minimum word in die somermaande tussen Mei en Junie met sowat 90 tot 100 mm bereik. Gewoonlik is daar net enkele reëndae met sterk, kort reënbuie.

Die wintertemperature daal dikwels tot vriespunt in die berggebiede soos Krasnaja Poljana (600 meter bo seevlak), waar wedstryde van die Olimpiese Winterspele 2014 gehou is. Die skigebiede is van Januarie tot Maart deurgaans met sneeu bedek, en die sneeu is 2 meter of selfs dieper in Maart. In die hooggeleë berggebiede duur die skiseisoen selfs van November tot die begin van Junie.

Sotsji as hersteloord[wysig | wysig bron]

Danksy die kombinasie van genesende faktore soos die see, son, skoon lug, die reliëf van sy landskap en mineraalbronne met moderne sanatoria, hoogsgekwalifiseerde personeel, gesofistikeerde tegnologie en geneeskundige sorg van 'n hoë standaard is Sotsji tans die gewildste en doeltreffendste hersteloord in die Russiese Federasie. Die terapie wat hier aangebied word fokus op die klimaat (met son- en lugbaddens) en balneologiese metodes (swawelbaddens, jodium-broom-baddens, baddens met koolsuur, modder en stortbaddens), sport (oefenapparate, staptoere, swem en roeisport), asem- en dieetterapie en masserings. Sommige sanatoria maak daarnaas ook gebruik van Oosterse terapieë soos akupunktuur.

Olimpiese en Paralimpiese Winterspele 2014[wysig | wysig bron]

Openingsplegtigheid van die Olimpiese Winterspele 2014 in Sotsji

Die Alpynse en Nordiese wedstryde van die Olimpiese Winterspele 2014 is in Roza Chutor, 'n skioord in die nabygeleë Krasnaja Poljana aan die voet van die Wes-Kaukasusbergreeks gehou. Alle ander wedstryde het in die Olimpiese Park suid van die stadsdeel Adler in die Imeretiniese Laagvlakte plaasgevind. Behalwe vir 'n oefensentrum vir voornemende Olimpiese atlete was daar in Sotsji aanvanklik geen sportgeriewe wat vir internasionale wêreldklaswedstryde gebruik kon word nie. Die Russiese regering het derhalwe 'n beleggingsprogram van $12 miljard van stapel gestuur, waarvan sestig persent deur die regering en veertig persent deur die privaatsektor bygedra is.

Volgens sommige beramings was die beleggings wat nodig was om die wedstrydplekke tot olimpiese standaard op te gradeer, hoër as by enige vorige Olimpiade. Nadat die boukoste in Januarie 2014 die $50 miljard-kerf verbygesteek het (waarvan 'n kwart aan sportgeriewe en die res aan infrastruktuurprojekte bestee is), het die Sotsji-spele die duurste in die geskiedenis van die Olimpiese Beweging geword.[1]

Verwysings[wysig | wysig bron]

Commons-logo.svg
Wikimedia Commons het meer media verwant aan:
Sotsji (kategorie)