Jamestown, Oos-Kaap

Die artikel handel oor die dorp in die Oos-Kaap, vir ander gebruike, sien Jamestown.

Jamestown
Jamestown
Koördinate: 33°07′60″S 26°48′0″O
Land	Suid-Afrika
Provinsie	Oos-Kaap
Bevolking
• Totaal	90
Tydsone	UTC+2 (SAST)

Jamestown is 'n dorpie in die Oos-Kaap, sowat 55 km suid van Aliwal-Noord. Dit is vernoem na Johannes Jacobus (James) Wagenaar, die eienaar van die plaas waarop dit uitgelê is. Ingevolge die huidige munisipale bedeling, is dit deel van die plaaslike owerheid Maletswai en die distriksmunisipaliteit Ukhahlamba.

Geskiedenis

Die dorpie in aangelê op die plaas Plessieskraal in 1874. Dit het in 1943 munisipale status verwerf.

NG gemeente

Jamestown, wat op die ou wapadroete tussen Aliwal-Noord en Queenstown geleë is, het in 1876, twee jaar ná sy stigting, sy eerste NG kerkgeboutjie gekry. Maandelikse dienste is om die beurt deur die predikante van Aliwal-Noord en Dordrecht gehou. In 1891 verkry die gemeente die reg om tot selfstandige gemeente af te stig, maar eers op 25 Maart 1893 kom die eerste leraar, ds. Theodore James Meyer, hier aan. Hy het op 19 Maart 1898 aan die koors beswyk. Op 28 Oktober 1899 neem ds. William Loftie Eaton die taak verder. 'n Saal is in 1906 opgerig en die kerkgebou in 1912 gebou. Op 11 November 1933 volg ds. Pieter de Vos Grobbelaar vir ds. Eaton op. 'n Doeltreffende, nuwe kerksaal is op 9 Maart 1951 ingewy.

Die gemeente was nooit groot wat getalsterkte betref nie. In 1972 was hier byvoorbeeld 320 volwasse lidmate, wat tot 130 in 1994 daal en net 90 in 2006. Die gemeente was in 2007 steeds vakant, een van baie in die Oos-Kaapse Sinode van die NG Kerk wat op die oog af te klein geword het om 'n eie leraar te kan bekostig. Van die ander gemeentes wat in 2007 minder as 200 volwasse lidmate gehad het en vakant was, was Hofmeyr (149 volwasse lidmate), Indwe (84), Klipplaat (60), Venterstad (96), en Waterford (95).

Belangrike persone gebore in Jamestown

• John Vorster - Eerste minister van Suid-Afrika.

Eksterne skakels

• Liggingskaart en inligting vir toeriste

Bronne

• Raper, P.E., Dictionary of South African Place Names, Lowry Publishers, Johannesburg, 1987.
• Rosenthal, Eric; Encyclopaedia of Southern Africa; Juta and Company Limited, Cape Town & Johannesburg, 1980.
• Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.