Star Trek

in Wikipedia, die vrye ensiklopedie
Spring na: navigasie, soek
Leonard Nimoy en William Shatner, die vertolkers van die hoofkarakters in die oorspronklike televisiereeks

Star Trek is ‘n Amerikaanse wetenskapsfiksie-vermaakkonsessie wat deur Gene Roddenberry geskep is. Dit wentel grootliks om Star Trek se ses televisiereekse: The Original Series, The Animated Series, The Next Generation, Deep Space Nine, Voyager en Enterprise. Die konsessie sluit verder elf langspeelfilms, dosyne speletjies, honderde novelle en ‘n tema-attraksie in Las Vegas in (geopen in 1998 en gesluit in September 2008), benewens minstens twee reisende museumuitstallings van staanmaakmodelle. Beginnend by die oorspronklike televisiereeks en voortgesit met die daaropvolgende films en reekse, het die konsessie tot ‘n kultusfenomeen ontwikkel, wat die skepping van die ten volle funksionele Klingontaal meegebring het, en vele verwysings in die gewilde media sou oplewer.[1]

Die oorspronklike Star Trek is gewy aan die interstellêre avonture van James T. Kirk en die bemanning van ‘n verkenningsvaartuig van ‘n 23ste eeuse galaktiese "Verenigde Federasie van Planete"—die Sterskip Enterprise. Hierdie reeks het sy buiging in 1966 gemaak en is vir drie seisoene op NBC vertoon, na die netwerk ‘n aanvanklike loodsfilm, "The Cage", afgekeur het, met ‘n merendeels verskillende rolverdeling. Nogtans word hierdie loodsfilm deesdae in die reël met die oorspronklike reeks versprei. Volgend op die vrystelling van ander reekse in die konsessie, is die Kirk-geleide reeks retroaktief na verwys as "Star Trek: The Original Series". Hierdie avonture is voortgesit deur die kortstondige Star Trek: The Animated Series en ses langspeelfilms. Vier verdere televisiereekse is uiteindelik vervaardig, wat in dieselde milieu geplaas is, maar die wedervaringe van ander karakters volg, naamlik Star Trek: The Next Generation, wat oor die bemanning van ‘n nuwe Sterskip Enterprise handel, wat afspeel ‘n eeu na die oorspronklike reeks; Star Trek: Deep Space Nine en Star Trek: Voyager, wat samelopend met The Next Generation geplaas is; en Star Trek: Enterprise, wat afspeel voor die oorspronklike reeks, in wat die vroeë dae van menslike interstellêre reise sou wees. Vier bykomende langspeelfilms is vervaardig, wat voortbou op die bemanning van The Next Generation, en mees onlangs, ‘n 2009 herproduksie van die konsessie wat ‘n jong bemanning van die oorspronklike Enterprise uitbeeld wat in ‘n alternatiewe tydlyn geplaas word.

Die oorspronklike Star Trek-reeks se produksie het onder leiding van Desilu Productions begin. Met die samesmelting van Desilu met Paramount Pictures, het laasgenoemde studio volstrekte eienaarskap van die Star Trek-konsessie verkry. CBS het eienaarskap van die konsessie in 2006 aanvaar, alhoewel sekere aspekte (langspeelfilm- en DVD-verspreidingsregte) steeds deur Paramount besit word.

Sien ook[wysig]

Verwysings[wysig]

  1. Italie, Hillel, "Potter Reaches Cult Phenomenon Status", Seattle Times, 2 Julie 2007. URL besoek op 19 Oktober 2011. In hierdie artikel word die status van Star Trek as ‘n kultusfenomeen as ‘n gegewe aanvaar.

Eksterne skakels[wysig]

Commons-logo.svg
Wikimedia Commons het meer media verwant aan:
Star Trek (kategorie)