Suid-Afrikaanse Nasionale Kunsmuseum

in Wikipedia, die vrye ensiklopedie
Suid-Afrikaanse Nasionale Kunsmuseum
'n Beeld van die museum.
Suid-Afrikaanse Nasionale Kunsmuseum

Plek Kaapstad
Land Suid-Afrika
Openingsjaar 1872
Tipe museum Kunsmuseum
Webtuiste www.iziko.org.za/museums/south-african-national-gallery

Die Suid-Afrikaanse Nasionale Kunsmuseum (Engels: Iziko South African National Gallery) is die nasionale kunsmuseum van Suid-Afrika wat in Kaapstad geleë is. Die museum se versameling is in 1872 met die skenking van Sir Thomas Butterworth se persoonlike galery begin.[1]

Die hoofgebou, wat deur Clelland & Mullins en F K Kendall ontwerp is, is in 1930 voltooi. Die bouwerk is befonds deur die Unie van Suid-Afrikaregering, die Stadsraad van Kaapstad en die Hyman Liberman Nalatenskap. Verskeie verbeteringe is sedertdien aangebring soos byvoorbeeld klimaatbeheer en verbeterde beligting in 1991.[1]

Verskeie ander kunsbeskermers het oor die jare bydraes aan die museum gemaak. Een van die belangrikste skenkings is die meer as 400 items insluitend skilderye, afdrukke en tekeninge wat deel vorm van die Sir Abe Bailey skenking. Die skenking deur die Suid-Afrikaanse mynmagnaat, politikus en finansier verteenwoordig een van die grootste Britse sportkunsversamelings wat deur enige openbare museum ter wêreld gehou word. Die Sir Abe Bailey Trust het ook by die instandhouding van die museum betrokke gebly en in die onlangse verlede aansienlike bydraes gemaak tot die bewaring van die versameling.[2]

Vandag sluit die museum se permanente versameling hoë gehalte voorbeelde van Suid-Afrikaanse, Nederlandse, Vlaamse, Franse en Britse werke in. Verskeie 20ste eeuse kunstenaars word verteenwoordig insluitend lede van die New English Art Club en die Bloomsbury Groep. 'n Aantal werke van belangrike kunstenaars soos John Walker, Michael Porter, Gary Wragg, Alan Davie en Ronald Kitaj is in die 1980's aangekoop. Gebrek aan befondsing en die hoë pryse van Westerse kuns het die uitbrei van hierdie versamelings egter beperk. Die museum spits hom die afgelope aantal jare eerder op die aankoop van eietydse Suid-Afrikaanse kuns aan. Sedert die 1990's het die galery 'n poging aangewend om 'n versameling te vestig wat die kuns van Afrika en veral Suider-Afrika vier. Die galery huisves 'n dan ook gesaghebbende versameling van Afrika beeldhouwerk en kralewerk. Die museum is ook betrokke by die repatriasie van voorwerpe wat oor die afgelope 200 jaar uit die land geneem is.[3]

Uitstallings van werke uit die permanente versameling word gereeld afgewissel. Tydelike uitstallings van skilderye, werk op papier, fotografie, nuwe media, beeldhouwerk, kralewerk en tekstiel word gereeld aangebied. Die uitstallings is daarop gemik om insae te lewer in die estetiese produksie in Suid-Afrika, Afrika en elders.[1] Belangrike tydelike uitstalling wat reeds deur die museum gehou is sluit dié van William Kentridge (William Kentridge Retrospective), Moshekwa Langa (Fresh), Jane Alexander (Butcher Boys), Wim Botha, Cecil Skotnes (Cecil Skotnes Retrospective), Santu Mofokeng (Invoice), Gerard Sekoto (From the Paris Studio), Marlene Dumas (Intimate Relations) en Picasso and Africa in.[4][5][6]

Verwysings[wysig | wysig bron]

  1. 1,0 1,1 1,2 iziko, About the South African National Gallery Geargiveer 13 Januarie 2008 op Wayback Machine, besoek op 17 Desember 2007
  2. iziko, abe bailey bequest Geargiveer 17 Desember 2007 op Wayback Machine, besoek op 17 Desember 2007
  3. iziko, permanent collections Geargiveer 17 Desember 2007 op Wayback Machine, besoek op 17 Desember 2007
  4. iziko, past exhibitions Geargiveer 13 Januarie 2008 op Wayback Machine, besoek op 17 Desember 2007
  5. iziko, recent exhibitions Geargiveer 17 Desember 2007 op Wayback Machine, besoek op 17 Desember 2007
  6. iziko, current exhibitions Geargiveer 13 Januarie 2008 op Wayback Machine, besoek op 17 Desember 2007

Eksterne skakels[wysig | wysig bron]

  • Dolby, J.: A short history of the South African National Gallery. In: Lantern. Tydskrif vir Kennis, Kuns en Kultuur. Jaargang 31, nr. 1, Desember 1981
  • Green, Eldred: The South African National Gallery. In: Lantern. Tydskrif vir Kennis en Kultuur. Jaargang 15, nr. 3, Maart 1966.

Koördinate: 33°55′44″S 18°25′2″O / 33.92889°S 18.41722°O / -33.92889; 18.41722