Tottenham Hotspur

Tottenham Hotspur
Volle naam	Tottenham Hotspur Football Club
Bynaam/me	Spurs The Lilywhites
Stigting	5 September 1882 (1882-09-05), as Hotspur F.C.
Tuisveld	Tottenham Hotspur Stadium, Londen
Kapasiteit	62 850
Voorsitter	Daniel Levy
Afrigter	Igor Tudor
Liga	Premier League
Tuiskleure 　 Wegkleure

Tottenham Hotspur is 'n Londense sokkerspan wat in die Premier League speel. Sedert 1899 het die span sy tuiswedstryde by White Hart Lane gespeel totdat die stadion in 2017 gesluit is; vandag speel hulle by die nuwe Tottenham Hotspur Stadium, wat ’n kapasiteit van meer as 62 850 toeskouers het.

Tottenham staan algemeen bekend as Spurs en het voorheen ’n akademie-samewerking met die Suid-Afrikaanse klub Supersport United gehad.

Geskiedenis

Tottenham Hotspur is in 1882 gestig deur ’n groep skoolseuns in Noord‑Londen as “Hotspur FC” en het in 1884 die naam “Tottenham Hotspur” aangeneem toe die klub professioneel begin speel het. Die klub het vroeëre suksesse behaal, insluitend die FA Cup‑oorwinning in 1901, wat hulle die enige nie‑liga klub sedert 1888 maak wat die trofee gewen het. Spurs het eers in die Southern League gespeel voordat hulle in 1908 tot die Engelse Football League Second Division toegelaat is, en vinnig bevorder is na die hoogste vlak van Engelse sokker.

In die mid‑20ste eeu het Tottenham hul eerste ligatitel in 1951 verower. Onder leiding van Bill Nicholson in die 1960’s het Spurs ’n glorieperiode beleef, wat die klub se reputasie op nasionale en Europese vlak gevestig het. Die hoogtepunt van hierdie era was die “Double” in 1960/61, waar Tottenham beide die Engelse liga en die FA Cup in dieselfde seisoen gewen het — die eerste klub van die 20ste eeu om dit te bereik. Hulle het ook Europees sukses behaal deur die UEFA Bekerwenner-beker in 1963 te wen en later die UEFA Beker in 1972 en 1984.

Die klub het die Ligabeker vier keer gewen: eers in 1970–71, toe hulle Aston Villa 2–0 in die eindstryd verslaan het; weer in 1972–73 met ’n 1–0 oorwinning teen Norwich City; daarna in 1998–99, toe hulle Leicester City 1–0 geklop het; en uiteindelik in 2007–08, met ’n 2–1 oorwinning ná ekstra tyd teen Chelsea in die eindstryd.

Tottenham het in 1992 een van die stigterslede van die Premier League geword, en alhoewel ligatitel‑sukses skaars was, het hulle gereeld in die boonste dele van die liga geplaas.

Een van Tottenham se grootste prestasies ooit was in 2019, toe hulle onder leiding van Mauricio Pochettino die eindstryd van die Champions League bereik het. Hulle het uiteindelik die eindstryd 2–0 verloor teen Liverpool.

In 2025 het Tottenham hul eerste titel in 17 jaar behaal deur die Europa League te wen, nadat hulle Manchester United 1–0 in die eindstryd verslaan het onder leiding van Ange Postecoglou.

Ondersteuning

Tottenham is baie gewild in Londen, veral in Noord-Londen. Die ondersteuners het baie mededinging met die naburige klub Arsenal. Die derby tussen beide spanne is die grootste in Londen en staan bekend as die North London Derby.

Tussen 1950 en 1962 het die klub vyf keer die hoogste gemiddelde bywoning in Engeland gehad. Gedurende die 2017/18-seisoen, toe Tottenham Wembley as tuisgrond gebruik het, het hulle die tweede hoogste bywoning in die Premierliga gehad. Die klub hou ook die rekord vir Premierliga-byeenkomste met 83 222 teen Arsenal op 10 Februarie 2018.

Bekende ondersteuners sluit die filosoof A. J. Ayer in.

Histories het Tottenham ’n beduidende Joodse aanhang gehad uit die Joodse gemeenskappe in oostelike en noordelike Londen, met ongeveer ’n derde van sy ondersteuners wat in die 1930’s as Joods beraam is. Sedert 1984 het al drie voorsitters van die klub Joodse sakelui gewees wat reeds vroeër die klub ondersteun het. Alhoewel die klub tans nie ’n groter Joodse aanhang het as by ander Londense klubs nie, word dit steeds deur teenstanders as ’n Joodse klub beskou. Sedert die laat 1970’s het Tottenham-aanhangers die belediging “Yids” of “Yid Army” teruggeëien as ’n teken van trots. Daardie bynaam is egter baie omstrede en is deur respekwaardige Joodse organisasies veroordeel.

Erelys

• Kampioen van Engeland (2)

1950/51, 1960/61

(naaswenner (4): 1921/22, 1951/52, 1956/57, 1962/63)

• Tweede Divisie (2)

1919–20, 1949–50

• FA Cup (8)

1900–01, 1920–21, 1960–61, 1961–62, 1966–67, 1980–81, 1981–82, 1990–91

(naaswenner (1): 1968–87)

• Football League Cup/EFL Cup (4)

1970–71, 1972–73, 1998–99, 2007–08

(naaswenner (3): 1981–82, 2001–02, 2008–2009)

• FA Charity Shield/FA Community Shield (7)

1921, 1951, 1961, 1962, (1967, 1981, 1991)*

(naaswenner (2): 1920, 1982)

• Europese-beker (UEFA Cup Winners' Cup) (1)

1962–63

• UEFA-beker / Europa League (3)

1971–72, 1983–84, 2024–25

(naaswenner (1): 1974)

(*: Charity Shield wedstryde van hierdie jare het gelyk geëindig en die prys is gedeel)

Bekende spelers

• Emmanuel Adebayor
• Gareth Bale
• Paul Gascoigne
• Robbie Keane
• Bongani Khumalo
• Jürgen Klinsmann
• Gary Lineker
• Scott Parker
• Steven Pienaar
• Rafael van der Vaart

Externe skakels

• Amptelike webwerf