Vlag van Uruguay

in Wikipedia, die vrye ensiklopedie
Spring na: navigasie, soek
Vlag van Uruguay
Vlag van  Uruguay
Gebruik Nasionale vlag en vaandel Nasionale vlag en vaandel
Verhouding 2:3
Goedgekeur 11 Julie 1830[1]
Ontwerp Nege horisontale bane in wit en blou afwisselend met ’n goue Meison in die skildhoek.
Ontwerp deur Joaquin Suárez

Die nasionale vlag van Uruguay is op 11 Julie 1830 amptelik in gebruik geneem. Die vlag vertoon nege horisontale bane in wit en blou afwisselend met ’n goue Meison in die skildhoek.

Simboliek[wysig | wysig bron]

Wapperende vlag

Die Uruguaanse vlag het sy kleure ontleen aan die vlag van Argentinië terwyl die ontwerp ontleen is aan die vlag van die Verenigde State. Tot 12 Julie 1830 het die vlag sewentien bane gehad maar sedertdien is daar slegs nege. Die nege bane stel die toendertydse indeling van Uruguay in nege departemente voor; daar is vandag negentien departemente.

Die Meison op die vlag

Die Meison simboliseer die songod Inti in die Inka-mitologie. Hierdie son is ook op die wapen van Uruguay en het twee keer soveel strale as die vlag van Argentinië.

Ontwerp[wysig | wysig bron]

Die nege bane is elkeen ewe hoog en is dus 1/9 van die hoogte van die vlag. Die skildhoek waarin die Meison is, is ’n vierkant waarvan die hoogte en breedte gelyk is aan vyf bane. Die skildhoek is dus 5/9 van die hoogte en 10/27 van die breedte.

Die son is in die middel van die skildhoek en is 11/15 van die hoogte en breedte daarvan. Die son het sestien strale, agt reguit en agt golwend. Elk van hierdie strale word deur ’n swart lyn in die lengte in twee dele verdeel.

Nasionale baniere[wysig | wysig bron]

Vlaggebruik in Uruguay is uniek in die sin dat daar drie “Nasionale baniere“ (Banderas Patrias) is: die Pabellón Nacional soos hierbo beskryf, die vlag van José Gervasio Artigas en die vlag van die Treinta y Tres. Hoewel die Pabellón Nacional die primêre nasionale vlag is, word die ander twee weens historiese redes ook erken. Al drie vlae word op regeringsgeboue vertoon.

Vlag van Artigas[wysig | wysig bron]

Eerste vlag van Artigas

Die vlag van Artigas (moet nie verwar word met die vlag van die departement Artigas nie), eer die Uruguaanse ‘vader van die vaderland’, José Gervasio Artigas. Die vlag bestaan uit drie horisontale bane in blou, wit en blou met ’n diagonale rooi baan van die skildhoek na die onderkant van die wapperkant.

Artigas se vlag is in 1812 ontwerp na die voorbeeld van Manuel Belgrano se ontwerp vir die Argentynse vlag, met die toevoeging van die rooi kleur as simbool vir die bloed wat vergiet is in die stryd om onafhanklikheid. In die eerste instansie is ’n dun rooi baan in elk van die blou bane geplaas, maar in 1814 het Artigas die twee rooi bane met een diagonale rooi baan vervang. In die jare daarna is die vlag dikwels deur Artigas se opstandelinge gebruik en gehys in die stede wat onder beheer van Artigas was. Hierdie vlag is op 13 Maart 1815 in die Argentynse Entre Ríos gehys, waardeur die basis vir die huidige vlag van Entre Ríos gelê is.

Die weergawe met die diagonale rooi baan us sedert 18 Februarie 1952 amptelik ’n Bandera Patria.

Vlag van die Treinta y Tres[wysig | wysig bron]

Die vlag van die Treinta y Tres (moet nie verwar word met die vlag van die departement Treinta y Tres nie) eer die opstandelinge wat onder leiding van Juan Antonio Lavalleja in 1825 onder hierdie naam Uruguay vanuit Argentinië binnegeval geval het om die inlywing van Uruguay deur Brasilië ongedaan te maak. Die vlag is ’n driekleur in blou, wit en rooi met die woorde Libertad o Muerte (Vryheid of Dood) in die wit baan.

Die vlag wat Lavalleja tydens sy aanval gebruik het, is tydens ’n aksie van die anargistiese beweging OPR 33 gesteel en is tot vandag nog verlore.

Ander vlae[wysig | wysig bron]

Eksterne skakels[wysig | wysig bron]

  • (en) Uruguay by Flags of the World.

Verwysings[wysig | wysig bron]

  1. (en) "Uruguay". Flags of the World. 2006. Verkry op 10 April 2013. 


Hierdie artikel is in sy geheel of gedeeltelik vanuit die Nederlandse Wikipedia vertaal.