Wapens van provinsies van Suid-Afrika

Sedert uniewording in 1910 is Suid-Afrika in provinsies verdeel. Daar was oorspronklik vier provinsies (voorheen kolonies), maar sedert 1994 is daar nege. Elke huidige en vorige provinsie het sy eie amptelike wapen wat deur die provinsiale regering getoon word, bv. op sy Offisiële Koerant en sy briefhoofde.

Geskiedenis

• 
  Transvaal
• 
  Kaapkolonie
• 
  Natal
• 
  Oranje-Vrystaat

Slegs drie uit die vier kolonies wat die oorspronklike provinsies geword het, het wapens gevoer, nl Kaapland, Natal en die Oranje-Vrystaat. Transvaal het nie 'n wapen gehad nie. Alhoewel die provinsiale administrasies nie die wetlike opvolgers van die vorige koloniale regerings was nie, het Kaapland, Natal, en die OVS die kolonies se ampswapens oorgeneem en niemand het daarteen beswaar gemaak nie.

In 1911 het koning George V die onderskeie kwartiere van die landswapen aan die provinsies toegeken, maar die regering het nie die provinsiale administrasies daarvan ingelig nie en hierdie wapentoekennings is uiteindelik in 1954 deur koningin Elizabeth II op versoek van die unieregering teruggetrek.

Die OVS het in 1925 opgehou om die ou Oranjerivierkolonie se wapen te gebruik en in 1937, na twaalf jaar sonder 'n wapen, het die provinsie die wapen van die ou OVS republiek aangeneem. In 1954 het die Transvaalse provinsiale administrasie op soortgelyke wyse die wapen van die ou Zuid-Afrikaansche Republiek aangeneem.

Die vier wapens soos hulle deur die provinsies gevoer is, is in 1955 by die College of Arms in Engeland amptelik op rekord geplaas. Na republiekwording en die stigting van 'n eie Buro vir Heraldiek, is hulle tussen 1967 en 1969 ook by die Buro geregistreer.

Al vier wapens het verval toe die provinsies in 1994 deur die nege nuwe provinsies vervang is. Mettertyd het elkeen van die nuwe provinsies sy eie nuwe wapen laat ontwerp en registreer: Gauteng, Mpumalanga en die Oos-Kaap in 1996; die Noord-Kaap in 1997; Noordelike (nou Limpopo) en die Wes-Kaap in 1998; Noordwes en die Vrystaat in 1999; en KwaZulu-Natal in 2004.

Wapens van die Suid-Afrikaanse provinsies

• 
  Gauteng
• 
  KwaZulu-Natal
• 
  Limpopo
• 
  Mpumalanga
• 
  Noord-Kaap
• 
  Noordwes
• 
  Oos-Kaap
• 
  Wes-Kaap
• 
  Vrystaat

Sien ook

• Suid-Afrikaanse heraldiek
• Wapen van Kaapland
• Wapen van Natal
• Wapen van die Oranje-Vrystaat
• Wapen van Suid-Afrika
• Wapen van Transvaal

Bronne

• Brownell, F.G. (1993). Nasionale en Provinsiale Simbole.
• Pama, C. (1965). Lions and Virgins.

Eksterne skakels

• (en) South African Heraldry Website Geargiveer 31 Maart 2013 op Wayback Machine
• (en) Flags of the World