Albert II van Monaco

in Wikipedia, die vrye ensiklopedie
Spring na: navigasie, soek
Albert II
Prins van Monaco
Albert II Monaco (2008).jpg
Naam Albert II
Volle naam Rainier Albert Alexandre Louis Pierre
Bewind 6 April 2005 - hede
Gebore 14 Maart 1958, Monaco
Voorganger Rainier III
Vermoedelike opvolger Caroline, Prinses van Hannover
Eggenote Prinses Charlene
Kinders Jazmin Grace Grimaldi en Alexandre Coste (albei buite-egtelik)
Huis Grimaldi
Vader Rainier III
Moeder Grace Kelly
Die dubbele paraaf van prins Albert en prinses Charlene.

Albert II, Prins van Monaco [1][2] (Albert Alexandre Louis Pierre Grimaldi; gebore 14 Maart 1958) is die hoof van die Huis van Grimaldi en die huidige heerser van die prinsdom Monaco. Hy is die seun van prins Rainier III en Grace Kelly en is getroud met Charlene Wittstock, ’n voormalige Suid-Afrikaanse swemmer. Sy susters is Caroline, Prinses van Hannover en Prinses Stéphanie van Monaco.

Vroeë lewe[wysig]

Albert is in die koninklike paleis van Monte Carlo gebore en het skoolgegaan aan die Albert I-hoërskool. Hy het in 1976 met onderskeiding geslaag en in 1977 aan die Amherst-kollege in Massachusetts, Amerika, staatsleer, ekonomie, musiek en Engelse letterkunde begin studeer onder die naam Albert Grimaldi.

Hy het in 1981 ’n B.A.-graad in staatsleer behaal. Hy is ’n kranige sportman en het aan verskeie sportsoorte deelgeneem, onder andere veldloop, judo, swem, tennis, roei, seiljagvaart, ski en muurbal. Hy het in die Monegaskiese bobslee-span deelgeneem aan die Olimpiese Winterspeles van 1988, 1992, 1994, 1998 en 2002. Hy is sedert 1985 lid van die Internasionale Olimpiese Komitee. Hy is een van die eienaar van Yoctocosmos (sy sosiale netwerk) en lid van die Wêreld Ekonomiese Forum

Heerser[wysig]

Op 7 Maart 2005 is Albert se pa, Rainier III, in die hospitaal opgeneem waar hy vir long- en hartprobleme behandel is. Op 31 Maart 2005 het die paleis aangekondig dat prins Albert sy pa se amptelike pligte oorneem aangesien Rainier dit nie meer kon nakom nie[3] en op 6 April is aangekondig dat prins Rainier op 81-jarige ouderdom oorlede is.[4]

Prins Albert het die troon op dié dag bestyg as Albert II. Hy is op 19 November 2005 in die St. Nicholas-katedraal gekroon. Totdat ’n kind uit sy huwelik gebore word, is sy opvolger sy suster Caroline.

Liefdeslewe en huwelik[wysig]

Prins Albert en prinses Charlene saam met die mode-ontwerper Karl Lagerfeld (regs), 2011.

Ná talle berigte oor sy romantiese verbintenisse met bekende skoonhede en gerugte dat hy gay is, word Albert sedert 2006 dikwels saam met die Suid-Afrikaanse swemmer Charlene Wittstock gesien. Hy het ook erken dat hy twee buite-egtelike kinders het: Jazmin Grace Grimaldi by Tamara Rotolo van Kalifornië en Alexandre Coste[5] by Nicole Coste, ’n voormalige lugwaardin van Togo. ’n Vroeëre eis deur Bea Fiedler, ’n Duitse kaalbors model, dat hy die pa van haar seun Daniel is, is deur ’n hof verwerp[6]

Op 1 Julie 2011 is Albert in ’n burgerlike troue met Charlene Wittstock getroud en die volgende dag in ’n kerklike seremonie.[7] Hulle het hulle verlowing op 23 Junie 2010 aangekondig[8] nadat hulle sedert 2006 dikwels saam gesien is.

Opvolging[wysig]

Terwyl Rainier III se gesondheid agteruitgegaan het, het die openbare kommer toegeneem oor die feit dat Albert nie wettige kinders het nie. Voor 2002 het Monaco se grondwet bepaal dat net die "direkte en wettige manlike" kinders van die "laaste" regerende prins die troon mag bestyg.[9]

Op 2 April 2002 het Monaco ’n wet afgekondig waarin voorsiening gemaak word dat die troon na ’n regerende prins se broers en susters en hul kinders van albei geslagte mag gaan as hy sonder wettige kinders sterf.[10] In Oktober 2005, toe Albert die troon bestyg, het die wet van krag geword toe dit deur Frankryk bekragtig is in ooreenstemming met die 2002-verdrag oor betrekkinge tussen dié twee lande. Sy susters en hul wettige kinders het dus nou die reg om hom op te volg as geen kinders uit sy huwelik gebore word nie.

Eksterne skakels[wysig]

Commons-logo.svg
Wikimedia Commons het meer media verwant aan:

Bron[wysig]

  • Hierdie artikel is merendeels vertaal vanaf die Engelse Wikipedia-artikel [1]

Verwysings[wysig]

  1. Titels van die Sowereine Prins van Monaco – Webtuiste van wyle prins Rainier III
  2. Biografie van prins Albert – Webtuiste van die Paleis van Monaco
  3. Son of ailing Prince Rainier takes over duties, MSNBC, 31 Maart 2005. URL besoek op 31 Mei 2008.
  4. Monaco's Prince Rainier, 81, dies (in Engels)”. BBC News: 6 April 2005. URL besoek op 2008-08-18.
  5. Monaco prince admits love child
  6. "Bea in His Bonnet," Daily Telegraph, 29 Julie 1987. Ook Sunday Mirror, 8 Maart 1998, ble. 1+
  7. Die program, van Prince's Palace of Monaco, 30 Junie 2011
  8. Prince Albert of Monaco engaged to Charlene Wittstock”. BBC News: 23 Junie 2010. URL besoek op 2 Julie 2011.
  9. Status of Monaco”. URL besoek op 2007-06-20.
  10. The Constitution (2002)”. URL besoek op 2007-06-20.