Bob Woolmer
vanuit Wikipedia, die vrye ensiklopedie.
Robert Andrew (Bob) Woolmer (Kanpoer, Indië, 14 Mei 1948 - Kingston, Jamaika, 18 Maart 2007) was 'n Engelse krieketspeler en -afrigter. Van 1968 tot 1984 het hy gespeel vir Kent. Van 1975 tot 1982 het hy negentien toetse vir Engeland gespeel. Daarna het hy in 1985 na Suid-Afrika geïmigreer. Hy het onder andere as 'n lewensoriënteringonderwyser gewerk. Hy was van 1994 tot 1999 afrgiter van die Suid-Afrikaanse nasionale krieketspan, die Proteas, gewees. Later het hy teruggekeer na Engeland en as afrigter vir die Britse krieketspan opgetree. Sedert 2004 was hy afrigter vir Pakistan se nasionale krieketspan. In Maart van 2007 het Pakistan aan Wêreldbeker-kriekettoernooi in Jamaika deelgeneem. Op 17 Maart 2007 het Pakistan onverwags met 'n driepaaltjie-nederlaag verloor teen Ierland en is Pakistan uit die toernooi uit. Op 19 Maart 2007 was Bob Woolmer bewusteloos gevind in sy hotelkamer in Kingston, hoofstad van Jamaika. Hy is later in die hospitaal oorlede. Vermoedens bestaan dat hy vermoor is.
Inhoud |
[wysig] Verbintenis met die Proteas
Woolmer is in 1994 as die afrigter van die Suid-Afrikaanse krieketspan aangestel. Aanvanklik het die span redelik vrot gevaar, waar hulle al ses van hul wedstryde in hul eerste toer deur in Pakistan verloor het. Tog het Suid-Afrika in die daaropvolgende vyf jaar die meeste van hul toetswedstryde (10 uit 15 reekse) en One Day International-wedstryde (73%) gewen. Die span het egter daarin gefaal om die 1996-Wêreldbeker sowel as die 1999-Wêreldbeker te wen, ten spyte daarvan dat hulle die hoogste ODI-oorwinningspersentasie in daardie tydperk gehandhaaf het.
In die 1996-Wêreldbeker het die span al hul uitklopwedstryde gewen, voordat hulle deur die Wes-Indies in die kwarteindstryd geklop is.
In die 1999-Wêreldbeker het Suid-Afrika teen Australië in die finale wedstryd van die Super Ses-rondte te staan gekom. Australië moes die wedstryd wen om vir die halfeindstryd te kwalifiseer, terwyl Suid-Afrika reeds gekwalifiseer het. Suid-Afrika het verloor, en kon in die her-wedstryd nie die telling omdraai nie. Op hierdie punt het Woolmer besluit om uit te tree as die afrigter van die Suid-Afrikaanse krieketspan.
[wysig] Verbintenis met Pakistan
Woolmer is in 2004 as die afrigter van die Pakistanse krieketspan aangestel. Die vorige afrigter, Javed Miandad, was afgedank nadat Pakistan met 2-1 en 3-2 in 'n toets- en ODI-reeks, onderskeidelik, verloor het teen hul aartsvyand, Indië. Dit was ook Indië see eerste oorwinning in 'n reeks in Pakistan in twee dekades.
In 'n tuis reeks teen Indië wat gevolg het, het Woolmer se span die toetsreeks 1-0 gewen. Hulle het egter die ODI-reeks 4-1 verloor.
[wysig] Sy dood
Woolmer is dood aangetref in sy hotelkamer in die Jamaica Pegasus Hotel in Kingston (Jamaika) op 18 Maart 2007. Op 22 Maart het die Jamaikaanse polisie bevestig dat hulle 'n moordsaak ondersoek, weens die omstandighede van Woolmer se dood. Volgens 'n verslag deur patoloog Ere Seshaiah het Woolmer gesterf as gevolg van verstikking via kunsmatige wurging.
Op 12 Junie 2007 het Lucius Thomas, die kommissaris van die Jamaikaanse Konstabelvors, bekend gemaak dat die ondersoek na Woolmer se dood bevind het dat hy weens natuurlike oorsake gesterf het, en is hy nie vermoor nie, soos in patoloog se verslag aangevoer is nie. Drie onafhanklike patoloë se verslae het bevind dat die aanvanklike bevinding van kunsmatige wurging nie korrek was nie, en toksikologiese toetse het geen bewyse van vergiftiging gevind nie. Verslae het aangevoer dat Woolmer gesondheisprobleme ondervind het, insluitende 'n vergrote hart en suikersiekte, wat kon bydra tot sy dood.
Op 6 November het lykskouer Patrick Murphy gevra dat verdere toetse uitgevoer moet word op monsters van Woolmer se lyk, nadat hy afgekom het op onreëlmatighede in die toksikologiese verslae deur forensiese wetenskaplikes van die Karibbiese eilande en die VK. Nadat die jurie vir 26 dae lank na bewyse geluister het, het hulle 'n onbesliste uitspraak gelewer. Hulle het geweier om die moontlike kunsmatige wurging, wat aangevoer is deur Dr. Sheshaiah, uit te skakel.
[wysig] Eksterne skakels
- Vrou hoor nuus toe hospitaal haar in Kaapstad bel, Die Burger, 19 Maart 2007
