Grasveld

in Wikipedia, die vrye ensiklopedie
'n Grasland in Antelope Valley, Kalifornië, VSA.

Grasvelde of grasland kom voor waar die hoeveelheid reënval gunstig is vir die groei van gras, en in sommige gevalle ook bome en struike. In grasveldgebiede is die reënval nie voldoende om groot gebiede met bome te kan akkommodeer nie.

Grasvelde word verdeel in tropiese, gematigde en polêre grasvelde. Tropiese grasvelde soos savannes met verspreide struike en dwergagtige bome kom in gebiede met hoë gemiddelde temperature en lae tot matige reënval voor. Hulle kom dus naby die ewenaar voor. Tropiese savannes in Afrika het groot troppe diere wat wei (grasvreters) en vreet (tak- en blaarvreters) soos wildebeeste, gaselle, sebras, kameelperde en wildsbokke. Hierdie diere het almal gespesialiseerde eetgewoontes wat meebring dat hulle nie hoef mee te ding vir kos nie. Kameelperde vreet byvoorbeeld blare en lote van die kruine van bome, terwyl olifante takke laer af vreet en wildsbokke, sebras en wildebeeste gras verkies.

Veldbrande speel ook 'n groot rol in grasvelde. Veral in die Afrikaanse grasvelde kom ook ondergrondse bome voor. Die groot ondergrondse deel van hierdie plant is goed teen veldbrande en die herbivore beskerm.

Suid-Afrika[wysig | wysig bron]

'n Grasland is een van die agt landbiome in Suid-Afrika. Die ander sewe landbiome sluit in fynbos, woude, savanne, struikgewasse, Nama-Karoo, Sukkulente Karoo en woestyn. Graslande is algemeen in die sentrale en oostelike dele van die land en kom voor in gebiede wat tussen 1 500 en 3 000 meter bo seevlak geleë is. Daar is graslande in die binneland van KwaZulu-Natal en die bergagtige gebiede van die Oos-Kaap.

Klimaat[wysig | wysig bron]

Graslande het 'n kenmerkende klimaat met koel tot warm somers en hoë somerreënval en koue, droë winters met swaar ryp. Somerreënval wissel tussen 400 en 1 200 mm en somertemperature tussen 10°C en 30°C. Minimumtemperature kan so laag as -10°C (in die winter) wees. Weerlig veroorsaak soms brande, daarom is daar nie baie bome in graslande nie.

Grond[wysig | wysig bron]

Diep, donker, suur sandgrond met vrugbare bolae waarvan die pH bepaal watter grassoort groei. Grond word voedingryk gemaak deur die ontbinding van plantwortels. Dit het 'n positiewe uitwerking op plantegroei.

Plantegroei[wysig | wysig bron]

Soos uit die naam afgelei kan word, is gras die mees algemene plantsoort in graslande. Bome (meestal klein bome) en struike kom af en toe voor. Ander plantsoorte sluit in bolle, knolle, risome en klein kruidagtige plante. In die meer vrugbare grond wat minder suur is groei soetgrasse. Soetgrasse het 'n hoë voedingswaarde en dien as groot voedselbron vir baie diere. Die gras wat in die suur en meer onvrugbare grond groei, word suurgrasse genoem. In natter gebiede groei hoër grasse. Die verskeidenheid van grasse wat in graslande voorkom is aangepas om die veldbrande, wat elke jaar voorkom, te oorleef. As gevolg van hierdie brande is houtagtige bome skaars in hierdie gebiede. Die plante weerstaan ook versteurings soos vertrapping deur die gebied se diere. Hulle kan vinnig teruggroei na reën aangesien hulle voedsel in hul beskermde wortels berg.

Dierelewe[wysig | wysig bron]

Die dierelewe in enige gebied hang af van die klimaat en plantegroei. Plantegroei in graslande ondersteun 'n groot verskeidenheid voëls, soos die bloukraanvoël, korhaan en gewone tarentaal. Hierdie voëls is gewoonlik saadvreters. Ongelukkig oorleef groot troppe diere soos swartwildebeeste, blesbokke en elande deesdae selde in die natuur en word hulle in reservate en op wildplase beskerm.

Let wel dat daar 'n verskil is tussen 'n grasland en 'n savanne.