NG gemeente Die Vlakte
Die NG gemeente Die Vlakte was 'n gemeente van die Nederduitse Gereformeerde Kerk in Kaapstad se suidelike voorstad Lansdowne wat op 2 April 1989[1], 'n maand voor sy vyftigste herdenking, meerendeels by die NG gemeente Van Riebeeck in Kenwyn, maar ook by Keurboom (lidmate in Rondebosch-Oos) en Rondebosch (lidmate in Sybrandpark]]) ingelyf is. Van Riebeeck is op sy beurt by Plumstead ingelyf en Keurboom by Rondebosch.
Inhoud |
[wysig] Agtergrond
Die ontstaan van die gemeente kan teruggevoer word tot 1927 toe ds. P.G.J. Meiring, leraar van Rondebosch, aangekondig het dat 'n saal vir die gemeentelede van Crawford gebou gaan word. Die lidmate daar was minder gegoed as dié in die res van die gemeente en vir baie was dit moeilik om elke Sondag die 5 km en meer na die moederkerk in Rondebosch af te lê. Op 16 Desember 1928 is die saal ingewy. Vyf jaar later is besluit om 'n perseel naby die destydse Laerskool Lansdowne te koop en 'n nuwe kerksaal te bou omdat die katagese in die Landsdowne-gedeelte dit moeilik gevind het om by Crawford uit te kom. Een van die redes hiervoor was dat dié deel van die Kaapse Vlakte destyds dikwels in die winter oorstroom het. Trouens, dit het 'n probleem gebly tot die hele gebied teen die midde tagtigerjare toegebou en van stormwaterdreinering voorsien is.
[wysig] Afstigting en inlywing
Op Saterdag 27 Mei 1939 het die amptelike afstigting plaasgevind met ds. Petrus Swart, hulpprediker van Rondebosch, as eerste leraar. Die lidmate het besluit op die naam "Die Vlakte", met verwysing na die Kaapse Vlakte, wat tot binne die gemeentegrense gestrek het. Die kerkgebou is in 1942 ingewy. Die gemeente het op eie bene gestaan tot die ontbinding op 2 April 1989, maar is daarna by die gemeentes Van Riebeeck, Keurboom en Rondebosch ingelyf. Die laaste erediens van die gemeente was ook 'n emosionele afskeid van die leraarspaar, ds. en mev. Roelie Venter, wat terselfdertyd afgetree het.
Die lidmate in Lansdowne en Crawford het by Van Riebeeck in Kenwyn ingeskakel, dié in Sybrandpark by Rondebosch en dié in Rondebosch-Oos by Keurboom. Tydens die laaste jare van sy bestaan het die gemeente gesukkel om sy eweredige bydraes aan die Sinode by te hou en het die lidmate drasties afgeneem weens die gedurige verhuising van Afrikaners na die noordelike voorstede van Kaapstad.
[wysig] Ná inlywing
Die gemeente het, ondanks die inlywing, op 28 Mei 1989 'n spesiale erediens in Die Vlakte se kerkgebou gehou ter viering van wat sy vyftigste bestaansherdenking sou wees. Die erediens is deur 'n emeritus-leraar, ds. D.J.M. Terblanche, voorheen verbonde aan die gemeente, gelei, waarna voormalige lidmate in die kerksaal 'n feesmaal geniet het.
[wysig] Vorige leraars
Naamlys van leraars soos verstrek deur beskikbare bronne, in volgorde van bevestiging:
- Petrus Swart, 1939 - 1944 (eerste leraar)
- Dirk Johannes Marthinus Terblanche, 1950 - 1952
- Daniël Jakobus Nell, 1951 - 1952
- Petrus Johannes van der Westhuizen, 1952 - 1971
- Lambertus Lochner Eksteen de Lange, 1971 - 1975
- Roelof Hendrik Venter, 1975 - 1989 (laaste leraar)
[wysig] Bronne
- Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.
