Sint Basilius-katedraal
vanuit Wikipedia, die vrye ensiklopedie.
Die Sint Basilius-katedraal (Russies: Храм Василия Блаженного; letterlik die Katedraal van Basilius die Geluksalige) is op die Rooiplein in Moskou geleë en is een van die groot toeriste-trekpleisters in dié stad. Die amptelike naam is die Katedraal van die Voorbidding van Gods Moeder aan die Grag (Собор Покрова что на Рву) of kortliks die Prokof-katedraal (Покровский Собор).
Dit is waarskynlik die bekendste gebou in Rusland en is ’n internasionale simbool van die land en van Moskou.
Inhoud |
[wysig] Geskiedenis
Iwan IV van Rusland, ook bekend as Iwan die Verskriklike, het die katedraal laat bou om die verowering van die Kazan-khanaat te vier en is van 1555 tot 1561 gebou. In 1588 het sy seun, Fjodor I, ’n kapel laat aanbou aan die oostekant bo die graf van die "dwaas in Christus" Basilius die Geluksalige, wat tot ’n Russies-Ortodokse heilige verklaar is.
In 1919 het die Bolsjewiste beslag gelê op die kerk en dis daarna in ’n museum verander om te voorkom dat die Kommuniste dit sloop. In 1929 het Josef Stalin opdrag gegee dat alle kerke op die Rooiplein afgebreek word om plek te maak vir een van sy grootse parades. Een van die kerke wat in die slag gebly het, is die Kazan-katedraal, maar Stalin het ná groot protes besluit om nie Sint Basilius te sloop nie.
[wysig] Argitektuur
Sint Basilius met sy vele koepels is in die suidoostelike hoek van die Rooiplein geleë, net oorkant die Kremlin se Spasskaja-toring. Dis nie besonder groot nie en bestaan uit nege kapelle wat op een fondament gebou is.
Die kapelle is binne vol ikone, Middeleeuse muurskilderings en verskeie ander kunswerke. In ’n tuin voor die katedraal staan ’n bronsmonument ter herinnering aan Dmitri Pozjarski en Koezma Minin, wat ’n leër opgekommandeer het teen die Poolse invallers in die Tyd van Beroeringe in die laat 16de en vroeë 17de eeu.
Die aanvanklike idee was om ’n paar kapelle te bou, een aan elk van die heiliges op wie se feesdae die tsaar ’n groot slag gewen het, maar die enkele toring in die middel bind die kapelle saam in een katedraal. Volgens ’n legende het tsaar Iwan die argirek, Postnik Jakowlef, se oë laat uitsteek om te voorkom dat hy ooit ’n nog mooier katedraal bou. Jakowlef het egter ’n paar kerke ná die Sint Basilius gebou, onder meer een in Kazan.
[wysig] Naam en betekenis
Pokrof beteken letterlik "sluier" en is ook die naam van ’n fees van die Russiese kerk wat na aanleiding daarvan ook vertaal kan word as "die voorbidding van Gods moeder". Die fees word op 14 Oktober (nuwe styl) gevier. Dit is ter herdenking van ’n gebeurtenis in omstreeks 910 in ’n kerk naby Bisantium toe die Maagd Maria na bewering tydens ’n diens bo die aanbidders verskyn en hulle met haar sluier bedek het by wyse van beskerming.
[wysig] Verwysings
- Hierdie artikel is merendeels vertaal vanaf die Engelse [1] en die Nederlandse Wikipedia-artikel [2]
