Vergelykings (taalkunde)

in Wikipedia, die vrye ensiklopedie
Spring na: navigasie, soek
Liefde soos Dawid en Jonathan, maar soms baklei hulle soos kat en hond!

In taalkunde is 'n vergelyking 'n vorm van beeldspraak wat die eksplisiete ooreenkoms tussen die onderwerp en iets totaal anders noem. Dit word gevorm met die woord "soos" / "as", die tweede naamval of 'n koppelwerkwoord.

Algemene vergelykings[wysig]

Hier volg 'n lys van algemene vergelykings:

  • So alleen soos my vinger
  • So arm soos 'n kerkmuis (~ Job; ~ 'n kerkrot)
  • So bang soos ’n bok vir ’n skoot hael
  • So bang soos 'n Bolander vir donderweer
  • So bang soos die duiwel vir ’n slypsteen
  • So bang vir iemand soos 'n haas vir 'n hond
  • So bedrywig soos 'n mier
  • So behaaglik soos 'n ot in die modder.[1]
  • So bekend soos die bont hond wees ( = oral taamlik berug wees)
  • So bitter soos aalwyn (~ als)
  • So bitter soos gal
  • So bleek soos die dood
  • So bleek soos ’n laken
  • So bleek soos ’n lyk
  • So blind soos ’n mol
  • So blink soos ’n spieël (~ 'n bottel, ~ 'n nuwe sikspens)
  • So blou soos die hemel, ~ die berge
  • So dapper soos ’n leeu
  • So deftig soos 'n pou
  • So deursigtig soos glas
  • So dig soos ’n pot (~ 'n bottel)
  • So dikvellig soos ’n renoster
  • So dol soos 'n kolhaas [2]
  • So dom soos ’n esel (~ 'n klip, grond)
  • So donker soos die nag
  • So dood soos ’n mossie
  • So doof soos ’n kwartel, ~ Baäl
  • So dronk soos ’n hoender, (~ tor, ~ tol, ~ eendjie)
  • So dronk soos ’n spook
  • So droog soos 'n biltong ( ~ 'n woestyn, ~ kurk, ~ strooi)
  • So duidelik soos daglig (~ die dag)
  • So duister soos die graf
  • So dun soos ’n plank (~ papier)
  • So eerlik soos goud
  • So ernstig soos 'n hartaanval
  • So fluks soos 'n voorslag (~ 'n by, ~ 'n mier)
  • So fraai soos 'n vlinder [3]
  • So fris soos ’n vis (in die water)
  • So fyn soos 'n spinnerak (~ 'n vlinder, ~ snuif)
  • So geel soos borrie
  • So geel soos goud
  • So geduldig soos Job
  • So gedwee soos 'n lam
  • So gelukkig soos 'n eend in water
  • So gereeld soos klokslag
  • So geslote soos die graf
  • So gesond soos 'n vis
  • So getrou soos staal[4]
  • So gewild soos 'n muishond op 'n bruilof (~ 'n dansparty)
  • So gierig soos die graf (as die persoon iets eenmaal in sy besit het, laat hy dit nie weer gaan nie)
  • So giftig soos ’n geitjie
  • So glad soos seep, (~ 'n aal; ~ 'n paling; ~ 'n baba se boudjies)
  • So glibberig soos 'n paling (~ 'n vis)
  • So goed soos vet op 'n warm klip (heeltemal nutteloos)
  • So gou soos nou (~ (jy sê) knipmes)
  • So groen soos gras
  • So groot soos 'n reus (~ 'n olifant)
  • So hard soos ’n klip (~ 'n keisteen, ~ klipsteen, staal)
  • So hees soos ’n makou (~ gans)
  • So helder soos kristal (~ daglig)
  • So honger soos ’n wolf
  • So hoog soos die wolke (~ die hemel)
  • So kaal soos ’n rot (~ 'n luis; ~ 'n kerkmuis)
  • So kaal soos my vinger (~ hand)
  • So klaar soos kristal (klaar = helder)
  • So klaar soos die dag (klaar = duidelik; dus baie duidelik)
  • So koel soos 'n komkommer
  • So koppig soos ’n muil
  • So koud soos ys
  • So krom soos ’n hoepel
  • So kwaai soos 'n tier(wyfie)
  • So lastig soos ’n vlieg (~ 'n mier)
  • So leeg soos 'n eierdop
  • So lelik soos die nag
  • So lewendig soos 'n vis
  • So lig soos ’n veer
  • So lomp soos 'n jong rekruut
  • So maer soos ’n kraai (~ 'n graat; ~ 'n riet; ~ 'n spook; ~ 'n sprinkaan)
  • So maer/sleg lyk soos die dood in Sluiters
  • So mak soos ’n lam
  • So maklik soos botter en brood
  • So mal soos ’n haas (moontlik onder Engelse invloed: As mad as a March hare)
  • So min soos die swart van my nael
  • So moeg soos ’n hond
  • So nat soos ’n kat
  • So nors soos 'n buffel
  • So nugter soos môre die hele dag
  • So onskadelik soos 'n hamster[5]
  • So onskuldig soos 'n pasgebore baba (~ 'n lam)
  • So oud soos die berge
  • So oud soos die Kaapse wapad (~ die Kaapse hardepad; ~ die pad na Jakarta; ~ die pad na Rome; ~ die ark)
  • So oud soos Metusalem
  • So oud soos my hande, maar nie soos my tande
  • So parmantig soos 'n kalkoenmannetjie
  • So pers soos 'n pruim [6]
  • So plat soos ’n pannekoek
  • So rats soos 'n kat
  • So reg soos ’n roer
  • So reguit soos ’n kers
  • So regop soos 'n kers (~ 'n paal)
  • So rein soos ’n duif
  • So rond soos 'n koeël
  • So rond soos 'n ballon [7]
  • So rooi soos bloed
  • So rooi soos ’n kalkoen (~ 'n kreef)
  • So sag soos satyn (~ ferweel(sy))
  • So sedig soos 'n predikant
  • So seker soos twee maal twee vier is (~ wat ek leef, ~ amen in die kerk, ~ blik, ~ as die hemel blou is)
  • So siek soos ’n hond
  • So skaars soos hoendertande
  • So skaars soos wors in 'n hondehok / hondestal, ~ 'n tweedehandse doodskis
  • So skeef soos 'n krap
  • So skeel soos 'n skaap
  • So skelm soos die houtjie van die galg (~ 'n jakkals)
  • So skerp soos 'n vlym (~ 'n skeermes)
  • So skraal soos 'n riet (~ 'n paal[8])
  • So sleg soos 'n abiekwakool (hy beteken niks)
  • So slim soos die houtjie van die galg (~ 'n jakkals, ~ Salomo)
  • So smedig soos suiwer goud
  • So snel soos 'n slang wat pik[9]
  • So soet soos suiker
  • So stadig soos ’n skilpad (~ trapsuutjies, ~ harmansdrup, ~ slak)
  • So steeks soos ’n muil
  • So sterk soos ’n bees (~ 'n leeu, ~ die duiwel, ~ Simson, ~ 'n os[10])
  • So stil soos ’n muis (~ die graf, 'n skaduwee[11])
  • So stom soos 'n vis
  • So stomp soos 'n koevoet
  • So styf soos 'n paal
  • So suinig soos ’n vrek
  • So suur soos asyn
  • So swaar soos lood
  • So swak soos 'n lammetjie
  • So swart soos die nag (~ git, ~ roet, ~ steenkool, ~ 'n pot)
  • So taai soos ’n ratel (taai = gehard)
  • So taai soos ’n tameletjie (taai = onaangenaam klewerig of moeilik om te hanteer)
  • So toe soos 'n kleios (baie dom)
  • So trots soos ’n pou
  • So tuis soos 'n vis in die water
  • So vaal soos stof
  • So vars soos dou
  • So vas soos 'n rots
  • So veranderlik soos die weer
  • So verstandig soos Salomo
  • So vet soos ’n vark
  • So vinnig soos blits
  • So vinnig soos die wind (~ blits)
  • So vry soos ’n voël (op ’n tak)
  • So vuil soos ’n vark
  • So waar soos padda manel dra
  • So waar soos ek leef
  • So waar as vet
  • So wakker soos 'n arend[12]
  • So warm soos die hel
  • So wild soos 'n haas vir 'n hond
  • So wit soos 'n laken (~ sneeu, ~ melk, ~ wol)
  • So wit soos kryt (baie bleek)
  • So wyd soos die Heer se Genade
  • So wys soos Salomo

Vergelykings met werkwoorde[wysig]

Werkwoorde ('n aksie) wat met iets vergelyk word:

  • Aanteel soos konyne
  • Baklei soos 'n tier / soos kat en hond
  • Iets bewaar soos goud
  • Bewe soos ’n riet
  • Blink soos 'n spieël
  • Brand soos (’n kool) vuur
  • Brul soos 'n leeu
  • Buig soos 'n lat
  • Drink (suip) soos ’n vis
  • Drillerig soos jellie
  • Dwaal soos skape
  • Eenbeen staan soos 'n reier
  • Eet soos 'n wolf
  • Gly soos seep deur die skare (vinnig, maklik, glad beweeg)
  • Groei soos 'n koolkop
  • Hardloop soos die wind
  • Dit heug my soos gister
  • Jaag soos die duiwel
  • Iets ken soos die palm van jou hand
  • Soos 'n kaartehuis in(een)stort
  • Kerm soos 'n drein [13]
  • Klam soos 'n dam
  • Klou soos klits
  • Klou soos ’n neet, bosluis
  • Klouerig soos gom
  • Lewe soos kat en hond ( = in onenigheid lewe)
  • Liefde soos Dawid en Jonathan
  • Lieg soos ’n tandetrekker (~ 'n koerant; ~ 'n almanak)
  • Lieg, suip, vloek ens. soos 'n ketter
  • Jou dood hou soos 'n kierieslang
  • Neerslaan soos ’n os
  • Onthou dit soos (die dag van) gister
  • Ontplof soos 'n vulkaan
  • Opskiet/verrys/opkom soos paddastoele
  • Iets ignoreer soos 'n stopstraat.
  • Iets soos 'n papegaai (uit jou kop) aanleer
  • Iemand soos 'n papegaai napraat
  • Iets soos 'n warm patat laat val
  • Praat soos 'n advokaat ('n boek)
  • Pronk soos ’n pou
  • Rondhol soos 'n mal haas
  • Rook soos ’n skoorsteen
  • Saamlewe soos broers (in vrede)
  • Sak soos 'n baksteen (hopeloos druip in 'n eksamen)
  • Sing soos 'n kanarie, voëltjie, nagtegaal
  • Sit soos ’n uil op ’n kluit ( = iewers sit en eensaam, verleë of onnosel lyk)
  • Sit soos 'n soutsak (futloos)
  • Skel soos 'n viswyf
  • Skop soos ’n volstruis (~ 'n muil)
  • Skree soos ’n maer vark
  • Slaap soos ’n klip (~ 'n roos)
  • Slaap soos 'n haas (baie lig slaap; op jou hoede wees)
  • Smelt soos suiker in jou mond
  • Spreek soos 'n boek
  • Staan soos 'n soutpilaar (onbeweeglik)
  • Steel soos 'n raaf
  • Stink soos ’n muishond
  • Storm soos 'n briesende bul
  • Swem soos ’n vis, ~ 'n otter
  • Swiep soos riete
  • Swyg soos die graf (~ 'n mof)
  • Te kere gaan soos 'n klomp olifante wat tandpyn het
  • Verdwyn soos ’n groot speld (in ’n hooimied) [~ soos sneeu / mis voor die son]
  • Verrys soos 'n feniks; paddastoele
  • Verskil soos dag en nag
  • Versprei soos `n veldbrand
  • Kennis soos vloeipapier opsuig.
  • Vloek soos ’n matroos (~ 'n viswyf)
  • Vreet soos 'n vraat
  • Iemand volg soos sy skaduwee
  • Vrek soos vlieë
  • Geld soos water verdien
  • Soveel van iets weet as ’n kat van saffraan
  • Waai soos 'n vrot vel
  • Weggly soos 'n skim
  • Werk soos ’n esel

Vergelykings met selfstandige naamwoorde[wysig]

Selfstandige naamwoorde wat met iets vergelyk word:

  • 'n Bek soos 'n advokaat, ~skeermes
  • 'n Steil baard soos 'n bok hê
  • ’n Geheue soos ’n olifant hê (gesê van iemand wat baie goed kan onthou)
  • Geld soos bossies ( = baie geld)
  • ’n Hart soos ’n klip hê (gesê van ’n ongevoelige mens)
  • Kinders soos orrelpype ( = baie kinders van allerhande groottes in een gesin)
  • 'n Knewel soos 'n paar beeshorings (= met verwysing na snor)
  • 'n Nooi met 'n middeltjie soos 'n perdeby(wyfie)
  • Oë soos ’n valk ( = baie skerp oë)
  • Hy het 'n pis soos 'n transportdonkie ('n baie groot aandrang om te water)
  • 'n Saak wat soos 'n seepbel gebars het
  • ’n Maag soos ’n volstruis hê (gesê van iemand wat alles kan eet)
  • 'n Tong soos 'n rasper, skeermes hê (gesê van 'n bitsige persoon)
  • 'n Waarheid soos 'n koei

Bybelse vergelykings[wysig]

Die volgende vergelykings deur Christus word in die Bybel in Matteus weergegee:

  • versigtig soos slange (10:16)
  • opreg soos duiwe (10:16)
  • skyn soos die son - (13:43)

Van die vele vergelykings in die ander Bybelboeke word hieronder enkeles aangedui:

  • helder soos kristal - Openbaring 22:1
  • wit soos sneeu - Markus 9:3; Matteus 28:3; Daniël 7:9; Jesaja 1:18
  • huppel soos kalwers (uit 'n stal) - Maleagi 4:2
  • brand soos 'n oond - Maleagi 4:1
  • dor soos die woestyn - Sefanja 2:13
  • glans soos sonlig - Habakuk 3:4
  • klae soos die jakkalse - Miga 1:8
  • treur soos die volstruise - Miga 1:8
  • byt soos 'n leeuin - Joël 1:6
  • bloei soos 'n wingerdstok - Hosea 14:7
  • ...en sy prag wees soos dié van 'n olyfboom... Hosea 14:6
  • bloei soos 'n lelie - Hosea 14:7
  • brul soos 'n leeu - Hosea 11:10
  • gloei soos 'n oond - Hosea 7:7; Klaagliedere 5:10;
  • ...julle liefde is soos 'n môrewolk en soos dou wat vroeg weer verdwyn - Hosea 6:4
  • ...sal hard wees soos yster, ... Daniël 2:40
  • ...Ek sal hulle mense vermenigvuldig soos skape... - Esegiël 36:37
  • ...en hulle riviere laat vloei soos olie - Esegiël 32:14
  • ...kerm soos 'n dodelike gewonde man kerm - Esegiël 30:24
  • sinlik soos esels - Esegiël 23:20
  • ontstuimig van drif...soos perde - Esegiël 23:20
  • hard soos 'n diamant - Esegiël 3:9
  • droog (geword) soos hout - Klaagliedere 4:8
  • ...wreed (geword) soos die volstruise in die woestyn - Klaagliedere 4:3
  • so groot soos die see - Klaagliedere 2:13
  • gebrand soos 'n vuurvlam - Klaagliedere 2:3
  • brul (hulle) soos jong leeus - Jeremia 51:38
  • brom soos klein leeutjies - Jeremia 51:38
  • verslind soos 'n draak - Jeremia 51:34
  • laat perde optrek soos stekerige sprinkane - Jeremia 51:27
  • smart soos van een wat baar - Jeremia 50:43; Jeremia 22:23; Jeremia 6:24
  • bruis soos die see - Jeremia 50:42; Jeremia 6:23
  • huppel (julle) soos 'n vers wat gaan dors - Jeremia 50:11
  • runnik (julle) soos die hingste - Jeremia 50:11
  • vlieg soos 'n arend - Jeremia 48:40
  • waters klots soos strome - Jeremia 46:8; Jeremia 46:7
  • ek het my laat tugtig soos 'n ongeleerde kalf - Jeremia 31:18
  • brand soos 'n vuur - Jeremia 21:12
  • hulle snuif die wind op soos die jakkalse - Jeremia 14:6
  • verstrooi soos 'n stoppel wat verbyvlieg voor die wind van die woestyn - Jeremia 13:24
  • Soos 'n voëlverskrikker in 'n komkommertuin is hulle: hulle kan nie praat nie; - Jeremia 10:5
  • die lyke van die mense sal neerval soos mis op die oop veld en soos gerwe agter die maaier sonder dat iemand dit versamel. - Jeremia 9:22
  • verwoes soos die woestyn - Jeremia 9:12
  • bedryf rou soos oor 'n enigste kind - Jeremia 6:26
  • Hulle sal die oorblyfsel van Israel skoon afoes soos 'n wingerdstok. - Jeremia 6:9
  • hulle loer soos voëlvangers buk - Jeremia 5:26
  • Hulle pylkoker is soos 'n geopende graf - Jeremia 5:16
  • verdor soos blare - Jesaja 64:6
  • weggevoer soos die wind - Jesaja 64:6
  • Ons brom almal soos bere... - Jesaja 59:11
  • ..en soos duiwe kir ons aanhoudend - Jesaja 59:11
  • dat hy sy kop buig soos 'n biesie - Jesaja 58:5
  • die goddelose is soos 'n onstuimige see; want dit kan nie tot rus kom nie - Jesaja 57:20
  • Ons almal het gedwaal soos skape - Jesaja 53:6
  • Hulle sal almal verslyt soos 'n kleed - Jesaja 50:9
  • ek het gekir soos 'n duif - Jesaja 38:14
  • Dan sal die lamme spring soos 'n takbok - Jesaja 35:6
  • ...totdat julle oorbly soos 'n vlagpaal op 'n bergtop en soos 'n banier op 'n heuwel - Jesaja 30:17
  • 'n woning wat ontvolk en verlate is soos die woestyn - Jesaja 27:10
  • die pote van hulle perde is soos 'n klipsteen - Jesaja 5:28
  • en hulle wiele is soos 'n stormwind - Jesaja 5:28
  • al was julle sondes soos skarlaken, dit sal wit word soos sneeu; al was dit rooi soos purper, dit sal word soos wol. - Jesaja 1:18
  • want liefde is sterk soos die dood - Hooglied 8:6
  • die liefdes-ywer is hard soos die doderyk - Hooglied 8:6
  • Wie is dit wat daar opkom soos die dageraad, mooi soos die maan, rein soos die son, verskriklik soos slagordes met vaandels? - Hooglied 6:10
  • sy oë soos duiwe by waterstrome, in melk gewas, sittend by ‘n volle bron. - Hooglied 5:12
  • swart soos 'n raaf - Hooglied 5:11
  • ...hy die dae nie sal verleng soos 'n skaduwee nie... - Prediker 8:13
  • Want soos die geknetter van doringtakke onder 'n pot, so is die gelag van 'n dwaas. - Prediker 7:6
  • ...maar die regverdiges voel hulle veilig soos 'n jong leeu. - Spreuke 28:1
  • Soos ‘n hond wat na sy uitbraaksel teruggaan, is ‘n dwaas wat sy sotheid weer ophaal. - Spreuke 26:11
  • (Oor die oormatige gebruik van wyn): op die end byt dit soos 'n slang en spuug gif soos 'n basilisk - Spreuke 23:32
  • Die dreiging van die koning is soos die gebrom van 'n jong leeu... - Spreuke 20:2
  • Die grimmigheid van ‘n koning is soos die gebrom van ‘n jong leeu, maar sy welgevalle is soos dou op die plante. - Spreuke 19:12
  • Vriendelike woorde is soos ‘n heuningkoek: soet vir die siel en ‘n genesing vir die gebeente. - Spreuke 16:24
  • Soos asyn vir die tande en soos rook vir die oë, so is die luiaard vir die wat hom stuur. - Spreuke 10:26
  • ...maar op die end is sy bitter soos wilde-als... - Spreuke 5:4
  • Terwyl die pad van die regverdiges is soos die lig van die môreglans, wat al helderder word tot die volle dag toe, is die weg van die goddelose soos duisternis: hulle weet nie waaroor hulle sal struikel nie. - Spreuke 4:18 - 19
  • Die mens is soos die nietigheid; sy dae is soos ‘n vlugtige skaduwee. - Psalm 144:4
  • Waarlik, ek het my siel tot bedaring gebring en stilgemaak; soos ‘n gespeende kind by sy moeder, soos ‘n gespeende kind is my siel in my. - Psalm 131:2
  • Jou vrou is soos ‘n vrugbare wingerdstok binne-in jou huis; jou kinders soos olyfboompies rondom jou tafel. - Psalm 128:3
  • oos pyle in die hand van ‘n held, so is die seuns van die jeug. - Psalm 127:4
  • hulle hart is ongevoelig soos vet - Psalm 119:70
  • Hulle het my omsingel soos bye — hulle is uitgeblus soos ‘n doringtakvuur... - Psalm 118:12
  • Die berge het rondgespring soos ramme, die heuwels soos lammers. - Psalm 114:4
  • Hulle het getuimel en gewaggel soos ‘n dronk man - Psalm 107:27
  • Ek is soos ‘n pelikaan van die woestyn, ek het geword soos ‘n uil op die puinhope. - Psalm 102:6
  • Want my dae verdwyn soos rook en my gebeente gloei soos ‘n vuurherd. - Psalm 102:3
  • ons bring ons jare deur soos ‘n gedagte. - Psalm 90:9
  • die hele dag omring hulle my soos water, saam omsingel hulle my. - Psalm 88:17
  • hulle huil soos honde - Psalm 59:14; Psalm 59:6
  • ek het gebuk gegaan in die rou soos een wat oor sy moeder treur. - Psalm 35:14
  • Wees nie soos ‘n perd, soos ‘n muilesel wat geen verstand het nie, wat ‘n mens moet tem met toom en teuel as sy tuig, anders kom hy nie naby jou nie. - Psalm 32:9
  • My krag is verdroog soos ‘n potskerf - Psalm 22:15
  • Hulle het hul mond teen my oopgespalk soos ‘n leeu wat verskeur en brul. - Psalm 22:13
  • Toe het ek hulle vermaal soos stof voor die wind; ek het hulle uitgegooi soos modder van die strate. - Psalm 18:42
  • Hy maak my voete soos dié van herte en laat my staan op my hoogtes - Psalm 18:33; 2 Samuel 22:34
  • Bewaar my soos ‘n oogappel - Psalm 17:8
  • Sy hart is hard soos ‘n klip, ja, hard soos die onderste meulsteen. - Job 41:24
  • Hy hou sy stert reguit soos ‘n seder - Job 40:17
  • Die waters word hard soos ‘n klip - Job 38:30
  • en hulle besitting buig nie soos koringare na die aarde toe nie. - Job 15:29
  • Hulle tas in die duisternis, sonder lig; en Hy laat hulle ronddwaal soos ‘n dronk man. - Job 12:25
  • Hulle het verbygegly soos skepe van biesies, soos ‘n arend wat neerskiet op sy prooi. - Job 9:26
  • Maar die mens word vir moeite gebore soos die vonke boontoe vlieg. - Job 5:7
  • kosbaar soos goud - Esra 8:27
  • want die HERE het gesê dat Hy Israel sou vermeerder soos die sterre aan die hemel. - 1 Kronieke 27:13
  • ...wie se spiessteel soos ‘n wewersbalk was... - 1 Kronieke 20:5; 2 Samuel 21:19
  • en hulle was vinnig soos gemsbokke op die berge - 1 Kronieke 12:8
  • en in die hand van die Egiptenaar was ‘n spies soos ‘n wewersbalk - 1 Kronieke 11:23
  • En die lyk van Isébel sal soos mis op die land wees - 2 Konings 9:37
  • Maar die drywe is soos die drywe van Jehu - 2 Konings 9:20 (Jehu was 'n onverskillige drywer/bestuurder)
  • ...sien die Moabiete op ‘n afstand die water rooi soos bloed. - 2 Konings 3:22
  • verstrooid op die berge soos skape wat geen wagter het nie. - 1 Konings 22:17
  • bitter van siel soos ‘n beer wat van haar kleintjies beroof is in die veld - 2 Samuel 17:8
  • Maar my heer is wys soos die wysheid van ‘n engel van God om alles te weet wat op die aarde gebeur. - 2 Samuel 14:20
  • Want soos ‘n engel van God, so is my heer die koning om goed en kwaad te verstaan. - 2 Samuel 14:17
  • Asahel was lig op sy voete soos een van die gemsbokke wat in die veld is. - 2 Samuel 2:18
  • Laat my bloed dan nou nie op die aarde val ver van die aangesig van die HERE nie, want die koning van Israel het uitgetrek om een enkele vlooi te soek, soos ‘n man ‘n patrys op die berge agtervolg. - 1 Samuel 26:20
  • Daarop het sy hart in sy binneste gesterwe en was hy soos ‘n klip. - 1 Samuel 25:37
  • en hulle kamele was ontelbaar soos die sand aan die seestrand in menigte. - Rigters 7:12
  • Want hulle het met hul vee en hul tente opgetrek en gekom soos sprinkane in menigte - Rigters 6:5
  • hom bewaak soos sy oogappel - Deuteronomium 32:10
  • Laat my leer drup soos die reën, my woord vloei soos die dou, soos reëndruppels op die grasspruitjies en soos reënbuie op die plante. Deuteronomium 32:2
  • en terdeë gemaal totdat dit so fyn soos stof was - Deuteronomium 9:21
  • en julle agtervolg soos die bye maak; - Deuteronomium 1:44
  • hoe die HERE jou God jou gedra het soos ‘n man sy seun dra - Deuteronomium 1:31
  • Hy buig hom, hy gaan lê soos ‘n leeu en soos ‘n leeuin: wie sal hom opjaag? - Numeri 24:9
  • Kyk, ‘n volk wat opstaan soos ‘n leeuin, en soos ‘n leeu verhef hy hom - Numeri 23:24
  • En julle kinders sal soos herders rondtrek in die woestyn - Numeri 14:33
  • Ek sal julle nageslag vermenigvuldig soos die sterre van die hemel - Genesis 22:17; Genesis 26:4; Eksodus 32:13
  • wit soos koljandersaad - Eksodus 16:31
  • fyn soos ryp op die grond - Eksodus 16:14
  • stom soos ‘n klip - Exodus 15:16
  • soos lood het hulle gesink in die geweldige waters - Eksodus 15:10
  • Hulle het in die kolke gesink soos ‘n klip. - Eksodus 15:5
  • Náftali is soos ‘n wildsbok so vry - Genesis 49:21
  • So het Josef dan ‘n baie groot hoeveelheid koring opgehoop soos die sand van die see - Genesis 41:49
  • Toe vra Laban vir Jakob: Wat het jy gedoen dat jy my mislei en my dogters soos krygsgevangenes weggevoer het? - Genesis 31:26
  • Toe ruik hy die geur van sy klere, en hy seën hom en sê: Kyk, die geur van my seun is soos die geur van die veld wat die HERE geseën het. - Genesis 27:27
  • Toe hy uitkyk oor Sodom en Gomorra en oor die hele land van die Jordaanstreek, sien hy dat die rook van die land optrek soos die rook van ‘n smeltoond. - Genesis 19:28
  • En Ek sal jou nageslag maak soos die stof van die aarde - Genesis 13:16
  • Hy was ‘n geweldige jagter voor die aangesig van die HERE. Daarom sê hulle: Soos Nimrod, ‘n geweldige jagter voor die aangesig van die HERE. - Genesis 10:9

Verwysings[wysig]

  1. Karsten, Chris. 2011. Abel se lot. Kaapstad: Human & Rousseau. bl. 179: Om die waarheid te sê, doktor Landsberg lyk so behaaglik soos 'n ot in die modder.
  2. Preller, Martie. 2003. Eendag was daar 'n storie! 'n Praktiese storiemaakkursus. Tafelberg-Uitgewers. bl. 54: Dink jy die vroumens wat hierdie boek geskryf het, is so dol soos 'n kolhaas om met sulke goed vorendag te kom as jy by jou storie wil uitkom?
  3. Botha, Tertia. 1994. Rebel. Kaapstad: Tafelberg-Uitgewers. bl. 91: As ek hier uitkruip, is ek so fraai soos 'n vlinder.
  4. Langenhoven, C.J. 1956. Versamelde Werke, Deel II. Kaapstad: Nasionale Boekhandel, bl. 30: En so getrou soos staal.
  5. Jaco, Paul. 2008. Die luiperds van Sh'ong. Kaapstad: Human & Rousseau. bl. 192: "Chauvinis!" sê sy en wend haar tot Sh'ong: "Hy's bang vir die luiperd en sy is so onskadelik soos 'n hamster!
  6. Oosthuisen, Janie. 1997. Ouma Hester en die Dreadnought Merk III. Kaapstad: Human & Rousseau. Bl. 21: Sy neus is so pers soos 'n pruim.
  7. Oosthuisen, Janie. 1997. Ouma Hester en die Dreadnought Merk III. Kaapstad: Human & Rousseau. Bl. 30: Sy voel soet en taai en so rond soos 'n ballon.
  8. Jaco, Paul. 2008. Die luiperds van Sh'ong. Kaapstad: Human & Rousseau. bl. 252: Angelique rol tot naby Alfred. Almal lag terwyl sy Alfred se lyf met haar vinger druk asof hy 'n perd is. "Skraal soos 'n paal, hard soos 'n klip".
  9. Karsten, Chris. 2011. Abel se lot. Kaapstad: Human & Rousseau. bl. 386: Hy kan antisipeer wat iemand se volgende stap gaan wees, en sy eie reaksie is snel soos 'n slang wat pik.
  10. Van Nierop, Leon. 1996. Die sielsmokkelaar. Johannesburg: Perskor. bl. 350: "Hy's so sterk soos 'n os," mompel die grote.
  11. Van Blerk, H.S. 2008. Braakland van die bose. Pretoria: Protea Boekhuis. bl. 114: Hy sluip self so stil soos 'n skaduwee voort al langs die huis af, buk soms laag, kruip byna tot hy die staldeur bereik.
  12. Jaco, Paul. 2008. Die luiperds van Sh'ong. Kaapstad: Human & Rousseau. bl. 196: "Wat is dit?" Sh'ong is skielik so op en wakker soos 'n arend.
  13. Paulsen, Henning. 1999. Internet onbeperk: Dubbel Kliek. Midrand: Perskor. bl. 30: Oupa kerm soos 'n drein oor die hoenderhokke wat ek van plan is om te bou.

Sien ook[wysig]

Eksterne skakels[wysig]