Wes-Sahara

in Wikipedia, die vrye ensiklopedie
Spring na: navigasie, soek
Ligging van Wes-Sahara
Kaart van Wes-Sahara

Wes-Sahara (Arabies: الصحراء الغربيةالصحراء الغربية, As-Sahrā' al-Ġarbiyyah) is 'n gebied wat voorheen as Spaans Sahara, 'n kolonie van Spanje bekend gestaan het. Dit is geleë in Noord-Afrika, suidwes van Marokko en noordwes van Mauretanië. Die Kanariese Eilande lê noordwes van Wes-Sahara.

In Julie 2004 het Wes-Sahara ongeveer 267 405 inwoners gehad. Die oppervlak van die land is ongeveer 266 000 vierkante kilometer. Dit is dus effens kleiner as Nieu-Seeland en net groter as die Verenigde Koninkryk, maar met 'n totale bevolking kleiner as meeste stede in Suid-Afrika.

Bevolking[wysig]

Die etniese samestelling van die bevolking is oorwegend Sahrawi, letterlik inwoner van die Sahara of woestyninwoner ('n mengsel van Arabiere en gearabiseerde Imazighen (Berbers)) en Arabiere uit Marokko, wat formeel gesien koloniste is. Sahara (Arabiese uitspraak: Sachara) beteken woestyn in Arabies. Byna al die inwoners van Wes-Sahara is Moslems.

Politiek[wysig]

Alhoewel Marokko aanspraak maak op die land, erken meer as 70 lande, insluitend Suid-Afrika die Arabiese Demokratiese Republiek Sahara as soewereine owerheid van die land en is die republiek selfs lid van die Organisasie van Afrika Eenheid en van die Afrika Unie. Marokko is nie lid van hierdie organisasies nie, omdat hulle Wes-Sahara nie erken as onafhanklike land nie. Die setel van die SADR is tans in Algerië. Geen enkele staat ter wêreld erken die anneksasie van Wes-Sahara deur Marokko na die land se onafhanklikheid van Spanje nie, maar sommige lande, soos Frankryk en Nederland, erken ook nie Wes-Sahara as onafhanklike staat nie.

Die republiek het op die oomblik slegs 'n klein strook van die land onder hulle mag (in die suid-ooste), die res word deur Marokko bestuur . Die grens tussen die twee lande is die Marokkaanse Muur.

Die hele bestuur van die SADR bestaan uit Polisario-lede. Polisario is 'n guerillaleër wat in 1973 gestig is en veg vir die bevryding van Wes-Sahara van Marokkaanse oorheersing.