NG gemeente Berea

Die NG gemeente Berea is 'n klein gemeente van die Nederduitse Gereformeerde Kerk in die provinsie en Sinode van KwaZulu-Natal wat in 2015 68 belydende lidmate en een dooplidmaat gehad het. Volgens die NGK Jaarboek van 2021 was daar toe 63 belydende en geen dooplidmate nie. Met sy stigting op 17 Julie 1945 saam met die NG gemeente Port Natal was dit die eerste en enige geval dat twee gemeentes gelyktydig in die Tuinprovinsie afgestig is, en wel van die moedergemeente Durban. Dit is ook een van net enkele NG gemeentes wat twee maal gestig is, want nadat dit in 1992 met Port Natal en Glenwood saamgesmelt het, is Berea in 1997 opnuut as selfstandige gemeente gestig, 52 jaar ná sy oorspronklike stigting.

Stigting

Ná die De Vos-skeuring het die kerkraad van die gemeente Durban besluit om die gemeente in meer gemeentes te verdeel ten einde die lidmate meer intensief te kan bearbei. So is dan op 18 Julie 1945 in die kerksaal, Smithstraat 151, 'n afstigtingsvergadering gehou onder die bekwame voorsitterskap van ds. M.W. Odendaal, bygestaan deur die Ringslede, di. J.S. Erlank, H.C.J. Flemming en J.J. Struwig. Twee gemeentes is toe afgestig, naamlik Port Natal en Berea.

Die naam Berea is voorgestel deur oudl. E.J. Muller en gesekondeer deur oudl. C.D. Viviers, en eenparig deur die vergadering aangeneem. Die ledetal is op sowat 970 vasgestel en as bruidskat het die gemeente die pastorie in Evansweg (Port Natal), gewaardeer vir £5 500, ontvang. Daar is toe ook besluit om gesamentlik met die moedergemeente die hoofdienste vir twee jaar nog in die moederkerk te hou. Binne die grense van die gemeente was geen geskikte saal of lokaal te kry nie. Ná 'n gesukkel is die pastorie in Evansweg verkoop en 'n pastorie in Windermereweg, Berea, gekoop. Die gemeente was gelukkig om in die begin die St. Mary-saal vir Sondagskooldoeleindes te huur, maar dit was nie lank nie of die eienaars het hulle die voorreg ontneem, met die gevolg dat die gemeente buitedienste, Strewers-vergaderinge, biduur en Sondagskool in die pastorie gehou moes word. Die Sondagskool moes maar klaarkom met 'n vertrek 16 x 16 vt.

Kerkbou

Maar daar het uitkoms gekom met die aankoop van die pastorie wat jare lank nog in gebruik was, met 'n oop stuk grond langsaan waarop die kerksaal later sou staan. Gelukkig was die gemeente nie lank vakant nie. Ná twee vrugtelose beroepe, het ds. F.N. van Niekerk die beroep aangeneem en is hy in 1946 bevestig. Met toegewydheid het die jong leraar hom vir die oprigting van 'n plek van aanbidding beywer, en op 2 Augustus 1947 is die hoeksteen van die sierlike saal gelê wat in Desember 1947 ingewy is.

In Julie 1948 het ds. Van Niekerk die gemeente verlaat en op 9 Oktober 1948 is ds. J. Adler as leraar van die gemeente bevestig. Hy kon deur die genade van die Here die werk met seën voortsit, aldus Ons gemeentelike feesalbum, en met behulp van 'n flukse kerkraad die skuld van £5 000 afbring tot £1 800. Dieselfde kerklike album het in 1952 berig: "Berea is vandag 'n bloeiende gemeente met 'n skitterende toekoms."

Latere ontwikkelinge

Op 15 Maart 1992 het Berea met Natal en Glenwood saamgesmelt weens die afname in NG lidmate in Durban, maar in 1997 het Berea opnuut afgestig. Die kerkgebou op die hoek van Floridaweg en 7de Laan, Morningside, is later verkoop, waarna die gemeente vir eredienste byeengekom het in die Tuinsig-sentrum, Problem Mkhizeweg 12, Morningside, Durban.

Enkele predikante

Francois Nicolaas van Niekerk, 1946 tot 1948
John Adler, 1948 tot 1968

NG gemeentes in Durban

In 1960 het die Ring van Durban bestaan uit 13 gemeentes met 8 322 belydende lidmate, maar die gemeente Weza-Port Shepstone het later 'n afsonderlike ring geword sodat die 12 oorblywende gemeentes 7 698 belydende lidmate gehad het. In 1985 was daar twee Durbanse ringe, te wete Durban en Durban-Suid. In die gesamentlike getal van 20 gemeentes was daar toe 12 464 belydende lidmate. In 2000 het daar 19 gemeentes oorgebly met 10 241 belydende lidmate, maar die getal gemeentes het teen 2015 afgeneem tot 14 en die belydende lidmate tot 6 600.

Naam	Stigtingsdatum	Status	Bel. lidm. 1960	Bel. lidm. 1972	Bel. lidm. 1985	Bel. lidm. 2000	Bel. lidm. 2015	Bel. lidm. 2016
Durban	1913	Bestaan nog	632	1 117	667	208	35	30
Noordkus	1940	Bestaan nog	500	709	500	480	342	352
Port Natal	1945	Bestaan nog	1 100	1 126	434	326	125	146
Berea	1945	Bestaan nog	790	1 038	470	287	68	73
Pinetown	1946	Bestaan nog	651	1 422	971	823	327	407
Durban-Noord	1958	Ingelyf by Umhlanga 2006	415	648	501	410	–	–
Glenwood	1961	Ingelyf by Port Natal 1992	–	489	415	–	–	–
Escombe	1974	Bestaan nog	–	–	670	507	220	200
Westville	1975	Bestaan nog	–	–	498	537	331	352
Durban Reformed	1977	Ontbind 2004	–	–	76	46	–	–
Krantzkloof	1984	Bestaan nog	–	–	315	258	660	679
Umhlanga	1978	Bestaan nog	–	–	332	565	735	561
Durban-Suid	1941	Saamgesmelt met Montclair as Durban-Oos 2005	600	1 132	884	643	–	–
Durban-Wes	1941	Bestaan nog	767	797	648	458	1 069	999
Fynnland	1955	Bestaan nog	793	1 284	1 033	680	372	331
Hillary	1956	Saamgesmelt met Malvern, Durban-Wes 2011	660	530	566	405	–	–
Malvern	1970	Saamgesmelt met Hillary, Durban-Wes 2011	–	460	1 003	827	–	–
Montclair	1951	Saamgesmelt met Durban-Suid as Durban-Oos 2005	450	1 050	820	503	–	–
Scottburgh	1978	Bestaan nog	–	–	325	653	584	409
Suidkus	1958	Bestaan nog	340	776	1 336	1 625	1 400	1 532
Durban-Oos	2005	Bestaan nog	–	–	–	–	332	334
Totaal			7 698	12 578	12 464	10 241	6 600	6 405

Bronne

(af) Olivier, ds. P.L., Ons gemeentelike feesalbum. Kaapstad en Pretoria: N.G. Kerk-uitgewers, 1952.

Eksterne skakels

Die gemeente se destydse kerkgebou op die hoek van Floridaweg en 7de laan, Morningside, Durban, soos te sien op Google Maps. URL besoek op 18 Julie 2015.