Elvis Presley

in Wikipedia, die vrye ensiklopedie
Hierdie artikel moet skoongemaak of andersins verbeter word.
Hierdie artikel voldoen nie tans aan die hoë gehaltestandaarde waarna Wikipedia streef nie. Voel vry om self in te spring en verbeterings te maak, en verwyder hierdie kennisgewing ná die tyd. Vir meer hulp, sien die redigeringshulp. Daar is moontlik kommentaar in die artikel of op die besprekingsblad oor wat verbeter moet word.
Elvis Presley
Presley in 1971
Agtergrondinligting
GeboortenaamElvis Aaron Presley
Gebore8 Januarie 1935
Tupelo, MS (VSA)
Sterf16 Augustus 1977 (42 jaar oud)
Memphis, TN (VSA)
GenresRock and Roll, pop, rockabilly, blues, gospel, R&B
Beroep(e)Musikant, akteur, militêre sersant, vermaker
InstrumenteStem, kitaar, klavier, baskitaar
Jare aktief1954 - 1977
EtiketteSun Records, RCA records
AssosiasiesThe Blue Moon Boys, The Jordanaires
Webwerfwww.elvis.com

Elvis Aaron Presley (1935-1977) was 'n Amerikaanse musikant en akteur. Hy is vandag nog 'n kulturele ikoon en staan ook as slegs Elvis bekend. Daar word dikwels na hom verwys as die King of Rock and Roll, of kortweg The King.

Lewensloop[wysig | wysig bron]

Elvis Aaron Presley is op 8 Januarie 1935 in 'n nederige tweevertrekhuis in Tupelo, Mississippi gebore as seun van Vernon en Gladys Presley. Sy tweeling was doodgebore en Elvis se ma, Gladys, wat vir 'n groot deel van haar lewe finansieel gesukkel het en wie se ontsnapping van die realiteit gelê het in die glansryke wêreld van rolprentsterre, was versot op haar enigste seun. Elvis ontvang op die ouderdom van elf jaar 'n kitaar van sy ouers, saam met wie hy in 'n Pinkster-gospelgroep gesing het.

Hy het sy eerste lied op die ouderdom van agtien in 'n ateljee in Memphis opgeneem. Sy kombinasie van swart blues en wit country het gou gewild geword en in 1956 het die lied Heartbreak Hotel bo-aan die Amerikaanse trefferlyste gestaan. In dieselfde jaar was die eerste vertoning van sy eerste film, Love me tender.

In 1956 was hy verbind tot drie optredes op die Ed Sullivan-program, maar die tweede het hom slegs van die middellyf af boontoe gewys. Sy optreeloopbaan was in 1958 onderbreek toe hy vir agtien maande as jeepbestuurder opgeroep was vir die Amerikaanse weermag. In sy afwesigheid het al vyf enkelplate wat sy agent, Kolonel Tom Parker, hom aangeraai het om op te neem voor sy vertrek na Europa, treffers geword.

Met sy terugkeer van militêre diens, het Elvis ontdek dat die ruk-en-rol-smaak verander het en het hy homself weer bekend gestel. Sy romantiese ballades (byvoorbeeld It's Now or Never en Are You Lonesome Tonight) het net so gewild geword in die sestigerjare as die polsende ruk-en-rol-liedjies wat hy in die vyftigerjare gemaak het. In die sewentigerjare het Elvis een van die toonaangewendste kunstenaars van sy tyd gebly en het hy daarin geslaag om 'n besige toer- en optreeskedule te handhaaf. Sy uitverkoopvertonings in Las Vegas, Madison Square Garden, the Houston Astrodome en Pontiac, Michigan het almal alle bywoningsrekords verbeter.

In 1967 het Presley met Priscilla Beaulieu getrou. Hulle het een dogter, Lisa Marie, gehad wat in 1968 gebore is. Die huwelik het in Oktober 1973 geëindig en ná die egskeiding het Presley se gesondheid begin agteruitgaan. Sy medisynemisbruik het veroorsaak dat hy verskeie kere in die hospitaal opgeneem is en op 16 Augustus 1977 is hy oorlede aan 'n onreëlmatigheid van die hart.

Sy huis, Graceland in Memphis, Tennessee, is omskep tot heiligdom vir die legende en is sedert sy dood deur miljoene bewonderaars besoek. Jaarliks kom duisende mense op 16 Augustus daar bymekaar met kerse, om sy dood te herdenk. Wêreldwyd het hy meer as 'n miljard plate verkoop, meer as enige ander kunstenaar in die geskiedenis.

Belangrike prestasies[wysig | wysig bron]

Elvis 'The Pelvis' Presley het die wêreld in die middel vyftigerjare stormenderhand met sy kitaar, sy ruwe stem en sy verleidelike heupe verower met treffers soos Heartbreak Hotel, Jailhouse Rock, Blue Suede Shoes en All shook up. Presley, die koning van ruk-en-rol-musiek, het die simbool geword van tieners se nuutgevonde status en bevryding in die rebelse na-oorlogse jeugkultuur. Sy gewildheid was nie tot Amerika beperk nie - tieners van dwarsoor die wêreld het hom aanbid. Baie volwassenes het egter sy vulgariteit verag en hierdie 'maniak met die vuil hare en vuil mond' gesien as 'n bedreiging vir die geordende samelewing, 'n musiekprostituut wat sy boude beter kon swaai as wat hy kon musiek maak.

Presley het 'n gewilde rolprentster geword met films soos Love me tender en Jailhouse Rock. Hy het meer as 500 miljoen plate wêreldwyd verkoop en 33 films gemaak in sy leeftyd. Hy was baie ryk en het windmakerig gelewe, maar was ook bekend vir sy ongelooflike vrygewigheid aan ander. Presley was die inspirasie vir 'n hele geslag musikante, soos Jerry Lee Lewis, Carl Perkins, John Lennon, Bruce Springsteen en Bob Dylan.

Verwysings[wysig | wysig bron]

Eksterne skakels[wysig | wysig bron]