Grootflamink

Grootflamink
	Twee volwassenes te Marievale-voëlreservaat in Gauteng
Bewaringstatus
	; Veilig (IUCN 3.1)
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Klas:	Aves
Orde:	Phoenicopteriformes
Familie:	Phoenicopteridae
Genus:	Phoenicopterus
Spesie:	P. roseus
Binomiale naam
	Phoenicopterus roseus; Pallas, 1811
Sinonieme
	Phoenicopterus antiquorum

Die grootflamink (Phoenicopterus roseus) is die mees wydverspreide spesie van die flamink-familie, maar migreer slegs in sommige gevalle en dan slegs oor kort afstande. Die voël is nou verwant aan die rooiflamink en die Chileense flamink en somtyds word na die drie as dieselfde spesie verwys.

Identifikasie

Soos die naam aandui, is die grootflamink 'n groot voël, met 'n algemene lengte van 120–140 cm. Die meeste van die grootflamink se vere is pienk-wit, maar die binnevlerke is rooi en die primêre en sekondêre vliegvere is swart. Die snawel is pienk met 'n swart punt en die pote is is heeltemal pienk.

Verspreiding

Die grootflamink kom voor in verskeie dele van Afrika, Suidwes-Asië (insluitende Turkye), Suidelike-Asië (die kusgebiede van Indië) en Suid-Europa (insluitende Spanje, Siprus, Portugal en die Camargue-gebied van Frankryk).

Voorplanting

Grootflaminke is monogaam vir die duurte van die broeiseisoen. In opvolgende jare kan hulle egter met dieselde of 'n nuwe maat afpaar. Die ouers werk saam om die nes te bou en die kuiken groot te maak. Die grootflaminkwyfie lê 'n enkele bordkryt-wit eier op 'n ronde modderhopie. Die eier neem 27 tot 31 dae om uit te broei. Na kwalik 'n week of effe meer verlaat die kuiken die nes en sluit by 'n crèche van jongelinge aan. Daar word hulle deur enkele ouers versorg. Op 10 tot 13 weke ouderdom het hul vlugvere ontwikkel, en leef hulle onafhanklik. Op ouderdom van drie jaar kan hulle geslagsryp wees, maar die eerste broeipoging is meestal van die vierde jaar of later by mannetjies, en van die vyfde jaar of later by wyfies.

Langlewendheid

In die natuur word grootflaminke tussen 20 en 30 jaar oud. Hulle kan arende of bobbejane ten prooi val, en kan voedselskaarste beleef. In gevangenskap waar voorgenoemde faktore nie 'n rol speel nie, kan hulle meer as 50 jaar oud word, en 'n rekordouderdom van 83 jaar is by die Adelaide-dieretuin in Australië aangeteken.

Geluid

Die geluid van 'n grootflamink is 'n "honk" geluid wat sterk aan 'n gans s'n herinner.

Ander name

Ander name sluit in greater flamingo in Engels, en uKholwase of uNondwebu in Zoeloe.^[2]

Fotogalery

In vlug oor die Ria Formosa-vleiland in Portugal
In vlug naby Walvisbaai, Namibië
'n Volwassene en subvolwassene in vlug naby Walvisbaai
'n Rustende groep by Walvisbaai se soutpanne tooi hul vere
In die Bristol-dieretuin

Sien ook

Verwysings

↑ BirdLife International (2008). Phoenicopterus roseus. 2008 IUBN Rooi Lys van bedreigde spesies. Internasionale Unie vir die Bewaring van die Natuur 2008. Verkry op 17 April 2009.
↑ Maclean, Gordon Lindsay; Newman, Kenneth; Lockwood, Geoff (1984). Roberts birds of South Africa (5de uitg.). Kaapstad: John Voelcker Bird Book Fund. p. 76. ISBN 0-620-07681X.

Bronnelys

Newman se Voëls van Suider-Afrika, ISBN 1-86872-982-6

Eksterne skakels

Wikimedia Commons het meer media in die kategorie Grootflamink.

Wikispecies het meer inligting verwant aan Grootflamink

[iucn-1] BirdLife International (2008). Phoenicopterus roseus. 2008 IUBN Rooi Lys van bedreigde spesies. Internasionale Unie vir die Bewaring van die Natuur 2008. Verkry op 17 April 2009.

[rob5-2] Maclean, Gordon Lindsay; Newman, Kenneth; Lockwood, Geoff (1984). Roberts birds of South Africa (5de uitg.). Kaapstad: John Voelcker Bird Book Fund. p. 76. ISBN 0-620-07681X.

[1]

[2]