Guennol-leeuin

in Wikipedia, die vrye ensiklopedie
Jump to navigation Jump to search
Guennol-leeuin
Guennol Lioness.jpg
Beskrywing
Materiaal Kalksteen
Hoogte 8,3 cm
Geskep c. 3000-2800 v.C., deur ’n onbekende kunstenaar
Ontdekking
Kultuur Proto-Elamities
Tans in Privaat versameling

Die Guennol-leeuin is ’n 5 000 jaar oue Mesopotamiese beeldjie wat na bewering naby Bagdad, Irak, ontdek is. Dit is van ’n gespierde mens-leeuin wat op 5 Desember 2007 vir $57,2 miljoen op ’n veiling van Sotheby's verkoop is. ’n Privaat versamelaar, Alastair Bradley Martin, het dit in 1948 gekoop en dit was van toe af in die Brooklyn-kunsmuseum in New York te sien totdat dit in 2007 verkoop is. Dit word "Guennol" genoem na aanleiding van die Walliese naam vir "Martin", die naam van die versamelaar.[1]

In 1950 het die Oostenrykse kunshistorikus Edith Porada die beeldjie as ’n leeuin, of leeuwyfie, beskryf "vanweë die vroulike kurwes van haar onderlyf en die afwesigheid van manlike organe", maar het toegegee dit kan ook ’n "geslaglose wese verteenwoordig".[2]

Toe dit in 2007 verkoop is, was die prys wat op die veiling betaal is die hoogste wat toe nog vir ’n beeld betaal is: baie meer as die vorige rekordprys vir Pablo Picasso se Tete de femme (Dora Maar). Dit is egter op 3 Februarie 2010 oortref deur ’n beeld deur Alberto Giacometti wat vir $104 327 006 verkoop is.[3]

Die beeldjie van kalksteen is net hoër as 8 cm. Dit is deur Sotheby's beskryf as "een van die laaste bekende meesterwerke van die aanvang van die beskawing wat nog in privaat besit is".[4]

Geskiedenis[wysig | wysig bron]

Die Guennol-leeuin is ’n Elamitiese figuur wat vermoedelik omstreeks 3000-2800 v.C. geskep is. Dit is aan die Brooklyn-kunsmuseum geleen totdat dit in 2007 aan ’n Britse versamelaar verkoop is.[5] Sy geskiedkundige waarde stam uit die feit dat dit waarskynlik min of meer uit dieselfde tyd kom as die eerste gebruik van die wiel, die ontwikkeling van wigskrif en die ontstaan van die eerste stede.[6][7]

Baie gode in die antieke Nabye Ooste is deur kruisings tussen mense en diere uitgebeeld. Dit weerspieël die Mesopotamiese geloof dat mag oor die fisieke wêreld verkry kan word deur die beste fisieke eienskappe van verskeie spesies te kombineer. Dit is moontlik dat die naburige Sumeriërs hierdie kragtige kruising by die Proto-Elamiete oorgeneem het.[2]

Verwysings[wysig | wysig bron]

  1. http://www.sothebys.com/en/auctions/ecatalogue/2007/antiquities-n08373/lot.30.html
  2. 2,0 2,1 Porada, Edith. “A Leonine Figure of the Protoliterate Period of Mesopotamia”, Journal of the American Oriental Society, Vol. 70, No. 4. (Oktober-Desember 1950), p223.
  3. Giacometti Sculpture 'L'Homme qui marche I' Fetches $104.3 Million, World Record: Sotheby's [1]
  4. Agence France-Presse Geargiveer 29 Desember 2007 op Wayback Machine, news.yahoo.com, 5 Desember 2007.
  5. "Guennol Lioness Auction: Brooklyn Museum to Lose Its Long-Term Loan". CultureGrrl. 4 Desember 2007.
  6. "Goddesschess: Guennol Lioness To Be Auctioned". 2 Desember 2007.
  7. Article at Art Daily

Skakels[wysig | wysig bron]