Irenaeus van Lyon

in Wikipedia, die vrye ensiklopedie
Irenaeus van Lyon

'n Gravure van Sint Irenaeus, biskop van Lugdunum in Gallië (nou Lyon, Frankryk)
Heilige
Gebore 130, Smyrna, Klein-Asië (nou Izmir, Turkye)
Sterfte 202, Lugdunum, Gallië (nou Lyon, Frankryk)
Vereer in Anglikaanse Gemeenskap, Assiriese Kerk van die Ooste, Oosters-Ortodokse Kerk, Lutheranisme, Oriëntale Ortodoksie, Rooms-Katolieke Kerk
Feesdag 28 Junie (Rooms-Katolieke Kerk, Anglikaanse Gemeenskap); 23 Augustus (Ortodokse en Oosterse Kerke)

Irenaeus[1] (130 - 202) was die eerste groot teoloog en kerkvader na die apostels. Hy het die Christelike versoeningsleer geformuleer wat tydens die konsilie van Nicea as grondslag vir die Christendom aanvaar is. Die grootste deel van die geloofsbelydenis van Nicea is ook deur hom geskrywe. Hy het homself beywer vir die bestryding van ketterye, veral die gnostisisme.

Biografie[wysig | wysig bron]

Irenaeus[2] is gebore in die eerste helfte van die 2de eeu nC. In die stad Smyrna in Klein-Asië. Hy het groot geword in 'n Christelike familie en nie eers as volwassene bekeer nie. Hy was 'n leerling van Polikarpos, wat as biskop van Smyrna aangestel is deur die evangelis Johannes. Moontlik het hy na die gruwelike marteldood van Polkarpos na Lyon verhuis in ongeveer 155 n.C.

Lyon (toe Lugdunum) was die belangrikste stad van die Romeinse provinsie Gallië. Gedurende die vervolgings van keiser Markus Aurelius van 161 – 180 was hy priester in Lyon. In 177 stuur die priesters van Lyon hom na Rome met 'n boodskap vir Pous Eleuterus oor die Montanisme, 'n kettery wat in Lyon kop uitgesteek het. Terwyl hy in Rome was, het 'n massamoord in Lyon plaasgevind en die biskop Pothinus het die marteldood gesterf. Irenaeus het hom opgevolg as die tweede biskop van Lyon.

Gedurende die religieuse vrede wat gevolg het op die vervolgings van Marcus Aurelius, het Irenaeus sy beroemde boek Adversus haereses (Teen Ketterye)[3] geskryf. Hy het veral gepreek teen die gnostisisme.

In 190 of 191 versoek hy Pous Victor I om nie Christene in Klein-Asië te ekskommunikeer nie omdat hulle volgehou het om die Paasfees op die 14de dag van die Joodse maand Nisan te vier die dag van Jesus se kruisdood eerder as op die volgende Sondag.

Sy sterfdatum is onbekend. Hy is begrawe in die kerk van Sint Johannes, wat later na hom vernoem is. In 1562 het die Hugenote die tombe en sy stoflike oorskot totaal vernietig.

Verering[wysig | wysig bron]

Irenaeus word as heilige en martelaar vereer in die Rooms-Katolieke Kerk en die Ortodokse Kerk. Sy feesdag in Rooms-Katolieke Kerk en die Lutherse Kerk is op 28 Junie en in die Ortodokse Kerk op 23 Augustus.

Verwysings[wysig | wysig bron]

  1. Irenaeus, Saint. (2008). Encyclopædia Britannica. Deluxe Edition. Chicago: Encyclopædia Britannica.
  2. Poncelet, A. (1910). St. Irenaeus. In The Catholic Encyclopedia. New York: Robert Appleton Company. Besoek 20 Augustus 2014, by New Advent: [1]
  3. Roberts, Alexander, Ante Nicene Fathers, Vol. 1. Irenaeus: Against Heresies.[2]

Eksterne skakels[wysig | wysig bron]


Hierdie artikel is in sy geheel of gedeeltelik vanuit die Engelse Wikipedia vertaal.