Julius Katchen

in Wikipedia, die vrye ensiklopedie
Julius Katchen in 1956.

Julius Katchen (15 Augustus 1926 - 29 April 1969) was 'n Amerikaanse pianis, mees bekend vir sy opnames van Brahms se solowerke vir klavier.

Loopbaan en lewe[wysig | wysig bron]

Katchen is gebore in Long Branch, New Jersey, en maak sy buiging teen die leeftyd van 10, met die speel van Mozart se Klavierconcerto No. 20 in D mineur. Eugene Ormandy het van sy debuutopvoering te hore gekom, en hom uitgenooi om saam met die Philadelphia Simfonieorkes in New York op te tree. Katchen het tot en met 14-jarige leeftyd musiek studeer onder sy grootouers aan moederskant, Mnr. en Mev Svet; immigrante uit Europe wat klas gegee het aan die Moskouse en Warskouse Konservatoria. Hy het Haverford Kollege bygewoon, waar hy in 1946 bo-aan sy klas 'n vierjaargraad in filosofie (in drie jaar) verwerf. Hierna vertrek hy na Parys waar hy uitgenooi is om die VSA te verteenwoordig tydens die eerste Internasionale UNESCO Fees, waar hy Beethoven se Klavierconcerto No. 5 (Keiser Concerto) saam met die Orchestre National de la Radiodiffon Française gespeel het. Hierna het hy in die Lente van 1947 'n Europese toer onderneem en voordragte gegee in Rome, Venesië, Napels, Parys, Londen en Salzburg. Hierna besluit hy om permanent in Parys te woon, waarop hy soos volg kommentaar gelewer het: "In Frankryk kom klavierstudente om konstruktiewe wyse bymekaar, en dan word hulle selfs vriende. Hulle woon mekaar se konserte by en lewer applous. In die VSA woon hulle ook kollegas se konserte by, maar in die hoop om te aanskou hoe dié sy nek breek."

Hy is in 1956 getroud met Arlette Patoux van Le Vesinet, Frankryk.

Aan die einde van die 1960's het hy die Brahms Trios vir Decca opgeneem saam met Josef Suk en János Starker. Hyhet ook Brahms se drie vioolsonates opgeneem saam met Suk, en Brahms se tweede tjellosonate saam met Starker. Hy sterf egter voordat hulle die eerste tjellosonate kon opneem.

Katchen en sy vrou was ywerige versamelaars van netsuke; 195 stukke uit hul versameling is tydens veilings in 2005 en 2006 vir £1.2 miljoen verkoop (Sotheby's 2005 en 2006). 'n Verdere 392 is verkoop tydens veilings in 2016 en 2017 vir £2.3 miljoen (Bonhams 2016 aen 2017), insluitende Katchen se gunsteling stuk (na sy dood deur sy vrou Arlette bekom), wat 'n rommelige hond en haar kleintjie uitbeeld, deur die bekende 18de eeuse kunstenaar Gechu. Die meesterwerk het die tweede hoogste prys ooit behaal vir 'n netsuke tydens 'n veiling.[1]

Noemenswaardige opnames[wysig | wysig bron]

Katchen se 6-CD stel van Brahms se Werke vir Soloklavier (Decca Plaatetiket) word hoog aangeslaan en word deur baie beskou as een van die beste beskikbare opnames van Brahms se klaviermusiek.[2] In 2016 het Decca 'n 36-CD stel van sy volledige opnames vir die plaatetiket vrygestel.[3]

Verwysings[wysig | wysig bron]

  1. Bonhams press release for 2016 sale
  2. 88 notes pour piano solo, Jean-Pierre Thiollet, Neva Editions, 2015, ISBN 978-2-3505-5192-0.
  3. "JULIUS KATCHEN Complete Decca Recordings". Decca Classics. Geargiveer vanaf die oorspronklike op 28 Desember 2018. Besoek op 3 Oktober 2016.