Kunlun
Die Kunlun (Vereenvoudigde Chinees: 昆仑山; Tradisionele Chinees: 崑崙山; pinyin: Kūnlún Shān, [kʰu̯ə́nlu̯ə̌n ʂán]; Mongools: Хөндлөн Уулс, Khöndlön Uuls; Oeigoers: كۇئېنلۇن تاغ تىزمىسى; Tibettaans: ཁུ་ནུ་རི་རྒྱུད), is 'n bergreeks in Sentraal-Asië aan die kruispunt van die Himalaja met die Tiensjan, Karakoram, Hindoekoesj en Pamir op die grens van die twee Chinese outonome gebiede Tibet in die suide en Xinjiang in die noorde. Die hoogste bergpiek, Liushi Shan, is met 7 167 meter bo seevlak op die grens tussen Tibet en Xinjiang net wes van Aksai Chin geleë.
Die Kunlun is een van die langste bergreekse in Asië en streek oor meer as 3 000 km (1 900 myl) in 'n wes-oostelike rigting. In die breedste sin vorm dit die noordelike einde van die Hoogland van Tibet en grens in die noordweste aan die Tarim- en in die noordooste aan die Qaidambekken. Die presiese definisie van hierdie bergreeks wissel. In die weste is die Yarkand-vallei tussen die Pamir en die Kunlun geleë en in die suidweste skei die Karakorampas die Karakoram van die Kunlun. In die ooste word die Kunlun deur die Geelrivier begrens en in die suidooste vloei die Yangtze; albei is van die belangrikste riviere in die Volksrepubliek China.
Die naam blyk van 'n gelyknamige, half-mitiese plek in die klassieke Chinese teks Shanhaijing afkomstig te wees. Volgens Sima Qian (Shiji, rol 123) het keiser Han Wudi (141–87 v.C.) manne gestuur om die bron van die Geelrivier te vind en die berge aan sy bron Kunlun genoem.
Eksterne skakels[wysig | wysig bron]
Wikimedia Commons het meer media in die kategorie Kunlun.- (en) "Kunlun Mountains". Encyclopædia Britannica. Besoek op 2 Augustus 2019.
