Laaste Oordeel

in Wikipedia, die vrye ensiklopedie
Stefan Lochner, Laaste Oordeel, omstreeks 1435. Wallraf-Richartz-museum, Keulen.

Die Laaste Oordeel of Oordeelsdag (Hebreeus: יום הדין, Yom ha-din, Arabies: یوم القيامة, Yawm al-qiyāmah of یوم الدین, Yawm ad-din) is deel van die Abrahamitiese gelowe en die Frashokereti van Zoroastrisme.

Sommige Christelike en Islamitiese denominasies glo die Wederkoms van Christus is die finale oordeel deur God van alle mense. Dit word talle kere in die Bybel genoem: die "dag van die Here" (Joël 2:31); "oordeelsdag van die Here" (Esegiël 13:5); en "Die Here die Almagtige het 'n dag bepaal" (Jesaja 2:12). Jesaja 2:17 lui: "Die hoogmoediges sal verneder word, die selfversekerdes sal tot 'n val kom."

In die Nuwe Testament is die Wederkoms ook 'n algemene leerstelling. Dit kom onder meer voor in Matteus 24:27 ("Die koms van die Seun van die mens"), Handelinge 17:31 ("Hy het 'n dag bepaal waarop Hy regverdig oor die wêreld gaan oordeel deur 'n Man wat Hy uitgekies het. As bewys daarvan vir almal, het Hy Hom uit die dood laat opstaan"), Romeine 14:10 ("Ons sal tog almal voor die regterstoel van God moet verskyn"), 1 Korintiërs 4:5 ("voordat die Here kom"), 2 Korintiërs 5:10 ("Ons moet immers almal voor die regterstoel van Christus verskyn"), 2 Timoteus 4:1 ("Ek beveel jou voor God en voor Christus Jesus wat die lewendes en die dooies sal oordeel"), Jakobus 5:7 ("Wag dan geduldig, broers, totdat die Here kom"), ensovoorts. Dit word ook "Christus se koms" (1 Korintiërs 15:23); "wanneer die Seun van die mens verskyn" (Lukas 17:30) en "die laaste dag" (Johannes 6:39-40) genoem.

In hoofstuk 43 van die Koran, Az-Zurhruf, word dit ook genoem.

Ook in geloofbelydenisse kom dit voor: "Hy sal met heerlikheid terugkom om die lewendes en die dooies te oordeel" (Geloofsbelydenis van Nicea); "Daarvandaan sal Hy kom om die lewendes en die dooies te oordeel" (Geloofsbelydenis van Athanasius).

In die Christendom word geglo die Oordeelsdag sal kom ná die opstanding van die dooies en Preteriste glo dit het al gebeur.

Die Laaste Oordeel het al baie kunswerke geïnspireer.

Skakels[wysig | wysig bron]