Michael Jackson

in Wikipedia, die vrye ensiklopedie
Spring na: navigasie, soek
Michael Jackson
Michael Jackson 1984.jpg
Geboortenaam Michael Joseph Jackson
Geboorte 29 Augustus 1958
Gary, Indiana (VSA)
Afsterwe 25 Junie 2009
Los Angeles, Kalifornië (VSA)
Beroep(e) Sanger, liedjieskrywer, plateprodusent, danser, choreograaf, vermaakpersoonlikheid, akteur, sakeman
Genre(s) Pop, R&B, rock
Instrument(e) Stem, verskeie instrumente
Aktiewe jare 1964-2009
Uitgewer(s) Motown, Epic
Webwerf michaeljackson.com
Assosiasies The Jackson 5, The Jacksons
Portal.svg Musiekportaal

Michael Jackson (29 Augustus 1958, Gary, Indiana (VSA), † 25 Junie 2009, Los Angeles, Kalifornië (VSA)) was 'n Amerikaanse sanger, liedjieskrywer, danser, vermaakpersoonlikheid, besigheidsman en humanis wat as een van die suksesvolste musiekkunstenaars in die geskiedenis van die popmusiek bekend staan. Sy unieke bydraes tot populêre musiek en dans, tesame met sy hoogs gepubliseerde persoonlike lewe, het hom vir vier dekades 'n sentrale figuur van die popkultuur gemaak. Hy het 13 Grammy-toekennings gewen en na raming sowat 750 miljoen albums verkoop.[1] Tydens sy sololoopbaan het hy dertien nommereen-treffers opgelewer. Ander prestasies sluit in dat hy een van die weinig kunstenaars was om twee keer in die Rock and Roll Hall of Fame vereer te word en vele Guiness-wêreldrekords — insluitende die rekord vir "Most Successful Entertainer of All Time". Sy grootste treffers sluit "Thriller" en "Billie Jean" in.

Michael Jackson is die sewende kind in die Jackson-gesin en het sy debuut in 1968 as lid van The Jackson 5 gemaak. Hy het sy sololoopbaan in 1971 afgeskop terwyl hy nog lid van dié groep was — 'n loopbaan wat hom die benaming "Koning van Pop" besorg het. Sy album Thriller (1982) is vandag nog die suksesvolste musiekalbum tot dusver, met vier van sy ander soloalbums wat ook onder die topverkoperranglyste gelys word: Off the Wall (1979), Bad (1987), Dangerous (1991), en HIStory: Past, Present and Future, Book I (1995).

In die 1980's het hy 'n dominante figuur in die Amerikaanse popkultuur geword. Hy was die eerste Afro-Amerikaanse vermaakkunstenaar om 'n sterk crossover-volgelingsbasis op MTV op te bou, met musiekvideo's soos "Beat It", "Billie Jean", en "Thriller" — wyd geloof vir hul aandeel in die transformering van die musiekvideo, as promosiemiddel, in 'n kunsvorm — wat gewildheid aan die relatiewe nuwe televisiekanaal help bring het. Video's soos "Black or White" en "Scream/Childhood" het hom prominent op MTV gehou tot in die 1990's. Benewens sy sukses op televisie het hy 'n aantal ingewikkelde danstegnieke met sy ryke verhoogvertonings gepopulariseer, insluitende tegnieke soos die robot-dans en die moonwalk. Sy kenmerkende musikale klank en stemstyl het menige hiphop-, pop- en kontemporêre R&B-kunstenaar oor vele generasies beïnvloed. Jackson het ook 39 liefdadigheidsprojekte ondersteun: hy het miljoene Amerikaanse dollars ingesamel en geskenk deur middel van sy Heal the World Foundation (Afrikaans: Maak-die-wêreld-gesond-stigting), asook deur liefdadigheidstreffers op te voer.

Jackson het aansienlike opspraak gewek as gevolg van sy immer veranderende voorkoms en sy soms eienaardige gedrag. Sedert die 1990's het hy gesondheidsprobleme begin ondervind, en dubbelsinnige verslae oor die toestand van sy finansies is uitgereik. In 1993 is sy gesondheid en sy reputasie 'n erge knou toegedien nadat hy van seksuele kindermishandeling beskuldig is. Weens 'n gebrek aan bewyse is geen aanklagte egter aanhangig gemaak nie. Hy het twee maal in die eg getree en het drie kinders verwek, één daarvan deur 'n surrogaatmoeder — optrede wat verdere gissinge oor sy lewe aangevuur het. Hy is in 2005 in verband met kindermolestering aangekla en op alle aanklagte vrygespreek. Michael Jackson is op 25 Junie 2009 in die ouderdom van 50 aan 'n hartaanval oorlede.

Diskografie[wysig]

  • Got to Be There (1972)
  • Ben (1972)
  • Music & Me (1973)
  • Forever, Michael (1975)
  • Off the Wall (1979)
  • Thriller (1982)
  • Bad (1987)
  • Dangerous (1991)
  • HIStory (1995)
  • Invincible (2001)

Verwysings[wysig]

Eksterne skakels[wysig]

Commons-logo.svg
Wikimedia Commons het meer media verwant aan:
Michael Jackson (kategorie)