Mont-Saint-Michel

in Wikipedia, die vrye ensiklopedie
Spring na: navigasie, soek
Mont-Saint-Michel
200506 - Mont Saint-Michel 01.JPG
Wapen van Mont-Saint-Michel
Wapen
Ligging van Mont-Saint-Michel op 'n kaart (Frankryk)
Mont-Saint-Michel
Mont-Saint-Michel
Koördinate: 48°38′10″N 1°30′41″W
Land Vlag van Frankryk Frankryk
Gewes Blason duche fr Normandie.svg Basse-Normandie
Département Blason département fr Manche.svg Manche
Arrondissement Avranches
Kanton Pontorson
Stigting 708
Regering
 - Burgemeester Éric Vannier
Oppervlak
 - Stad 0,97 km²  (0,37 vk m)
Hoogte 5–80 m (16–260 vt)
Bevolking (2009)
 - Stad 44
Poskode 50170
Skakelkode(s) 50353
Webwerf: mont-saint-michel.net

Mont-Saint-Michel is 'n abdy, gebou op 'n rotsagtige eiland met 'n oppervlak van 55 000 vierkante meter aan die Normandies-Bretonse kus (département Manche, Frankryk). Die abdy maak deel uit van die gelyknamige dorp in die kanton van Pontorson.

Die berg, wat sedert die jaar 1979 as een van UNESCO se wêrelderfenisgebiede gelys word, is in 1987 tot 'n nasionale historiese monument verklaar. Dit word dikwels met die Sewe wonders van die wêreld vergelyk en is met jaarliks meer as drie miljoen besoekers een van die gewildste toeristebestemmings in Frankryk.

Geskiedenis[wysig]

Die historiese dorp van Mont-Saint-Michel

Oorspronklik het die berg onder sy aanvanklike naam Mont Tombe saam met die klein eiland van die rif Tombelaine en die berg Mont Dol op die vasteland 'n soort heidense sentrum gevorm. Die Mont Tombe het as 'n belangrike vergaderplek van druïdes gedien, maar ook as offerplek, waar die gode deur die offers van jong mans gunstig gestem is.

In die Romeinse tydperk is die berg aan die Romeinse god Mercurius gewy.

Die Christelike geskiedenis van die berg het met die heilige Aubert, die biskop van die Normandiese stad Avranches, begin. In die jaar 708 het die aartsengel Michael vir hom in 'n droom verskyn en aan hom die opdrag gegee om 'n Christelike kapel op die 80 meter hoë Mont Tombe op te rig.

Eers na die derde verskyning - en ná 'n hewige slag op sy kop, wat 'n groot gat in sy skedel agtergelaat het - het die biskop 'n kapel opgerig en aan die aartsengel gewy. Kort ná die voltooiing is die gebied deur 'n vloedgolf oorstroom, waarby talle dorpe verwoes en die berg as 'n eiland van die vasteland afgesny is.

Die biskop was diep geskok en het die natuurramp as 'n vingerwysing van God beskou. Hy het die berg na die aartsengel vernoem en 'n klooster teen die hang van die rots opgerig.

Weivelde naby die Mont-Saint-Michel
'n Lugfoto van die Mont-Saint-Michel

Die Lêerop die berg, wat vandag 50 inwoners tel, dateer uit die jaar 709. Normandiese monnike het hier in 966 'n Benediktynse klooster gestig, wat tot een van die belangrikste geestelike sentra in Europa en 'n gewilde bestemming van bedevaarte ontwikkel het. Die kerk van die abdy is tussen 1022 en 1135 opgerig. Tydens die Honderdjarige Oorlog tussen Engeland en Frankryk was die berg die simbool van die Franse verset, en die eiland is tussen die 13de en 15de eeu versterk.

In die tyd van die Franse Rewolusie het die monnike die eiland verlaat, en dit is in 1810 tot 'n gevangenis omskep. Danksy die pogings van Victor Hugo is die gevangenis in 1863 gesluit. Die Mont-Saint-Michel is in 1874 tot Monument Historique verklaar en in 1879 deur middel van 'n pad met die vasteland verbind. Na uitgebreide herstelwerk is in 1966 die millenium (millénaire) van die Mont-Saint-Michel gevier, en in 1969 het die monnike uiteindelik teruggekeer na die abdy. Sedert 1979 is die berg een van die wêrelderfenisgebiede wat deur UNESCO gelys word.

Besienswaardighede[wysig]

'n Restourant op die berg
Tombelaine, 'n klein eiland naby die Mont-Saint-Michel

Vandag is die eiland met sy heilige berg een van die vernaamste toeristebestemmings in Noord-Frankryk. Die museum L'Historique et Maritime behandel die geskiedenis van die eiland en die ekosisteem van Mont-Saint-Michel. Die hoogste getye in Europa word hier aangetref en dit verseker 'n gereelde verbinding tussen die vasteland en die eiland. Daar word gereeld noodsaaklike ontsandingswerk gedoen om die oorspronklike toestand van die eiland te behou.

Daar is ook 'n versameling van modelskepe wat die geskiedenis van die skeepsbou sedert die 16de eeu uitbeeld.

'n Ongewone besienswaardigheid is die skedel van die stigter, biskop Saint Aubert, wat nog steeds op die Mont-Saint-Michel bewaar word. Die groot gat, wat as oorblyfsel van 'n hewige slag op sy kop beskou word, kan besigtig word. Volgens die legendes is die slag selfs deur die aartsengel Michael aan hom toegedien.

Veeboerdery en kookkuns[wysig]

Deur middel van inpoldering is in die omgewing van die berg soutige weivelde geskep, wat uitstekend geskik is vir skaapboerdery. Danksy die pré-salés (soutige weivelde) lewer die skape in die omgewing vleis van 'n hoë gehalte op, en agneau de pré-salé (lam van soutige weivelde) is nou 'n gewilde gereg op die plaaslike restourante se spyskaarte.

Eksterne skakels[wysig]

Commons-logo.svg
Wikimedia Commons het meer media verwant aan:
Mont-Saint-Michel (kategorie)