Steekmuggies

in Wikipedia, die vrye ensiklopedie
(Aangestuur vanaf Muskiet)

Culicidae
'n Wyfiemuskiet (Culiseta longiareolata)
Wetenskaplike klassifikasie
Koninkryk:
Filum:
Klas:
Orde:
Suborde:
Infraorde:
Superfamilie:
Familie:
Culicidae

Meigen, 1818 [1]
Subfamilies

Anophelinae
Culicinae

Diversiteit
112 genera

Steekmuggies (Culicidae) is 'n familie van muggies (suborde Nematocera) wat tot die orde van tweevlerkiges (Diptera) behoort. Spesies in die familie word dikwels muskiete genoem. Die wyfies suig bloed met hul monddele, hulle het nie 'n angel nie en behoort streng gesproke eerder bytmuggies genoem te word.

Daar is duisende bytende spesies. Die wyfies benodig die bloed vir die ontwikkeling van hul eiers. Die meeste van die spesies is snags bedrywig. Die berugste spesie is die malariamuskiet. Die Asiatiese tiermuskiet (Stegomyia albopicta) is ook gevaarlik omdat hulle ernstige siektes versprei, insluitende Wes-Nylsiekte, Japannese enkefalitis en geelkoors. Hierdie muggies lewe 40 tot 50 dae en lê verskeie kere gedurende hul lewe eiertjies.

Steekmugies maak 'n zoemgeluid wat gehoor kan word soos die muggies nader kom. Dit het deels te maak met die voortplanting van die muggies. Hulle lewe in die donker en kan mekaar nie maklik sien nie. Muggies gebruik daarom klank om mekaar in die donker te vind. Slegs die (bytende) wyfies maak zoemgeluide, wat deur die geveerde antennas van die mannetjies opgevang word. Elke soort produseer 'n effense ander klank, sodat mannetjies nie met wyfies van 'n ander spesie paar nie.

Steekmuggies kom oor die hele wêreld, met uitsondering van die heel koudste gebiede voor (soos om die pole). Die verspreidingsgebied van baie spesies word as gevolg van die verwarming van die Aarde al hoe groter. Hulle is wêreldwyd vir die dood van 1 uit elke 17 mense verantwoordelik. Jaarliks word ongeveer 700 miljoen mense met siektes wat deur steekmuggies versprei word besmet.

Steekmuggies gebruik sig, maar is hoofsaaklik op geure en temperatuurverskille aangewese om hul gashere op te spoor. Die meeste muggies (soos die Culex pipiens) byt soogdiere en voëls, wat eers visueel opgespoor word. Muskiete is aangepas om stowwe wat deur diere uitgeskei word waar te neem. Na raming word sowat 300 tot 400 verskillende stowwe deur menslike sweet uitgeskei, en sowat 100 verskillende stowwe deur uitaseming.[2]

Verwysings[wysig | wysig bron]

  1. Harbach, Ralph (2 November 2008). "Family Culicidae Meigen, 1818". Mosquito Taxonomic Inventory (in Engels). Geargiveer vanaf die oorspronklike op 17 November 2019. Besoek op 21 Januarie 2015.
  2. (en) Mosquitoes and Mosquito Repellents: A Clinician's Guide Geargiveer 6 Maart 2009 op Wayback Machine

Eksterne skakels[wysig | wysig bron]