NG gemeente Theunissen

in Wikipedia, die vrye ensiklopedie
Jump to navigation Jump to search
Theunissen se NG moederkerk nadat die toring aangebou is.
Ds. J.D. Louw was Theunissen se eerste leraar van 1911 tot sy dood op 25 Mei 1920.
Die NG kerk op Theunissen soos dit gelyk het in 1917.
Ds. N.J. van der Merwe was die leraar hier van 1921 tot 1924 toe hy die politiek betree. Hy is in 1916 getroud met Tibbie Steyn, derde dogter van pres. M.T. Steyn en sy vrou, Rachel Isabella Steyn, wie se bynaam ook Tibbie was. Hy was die eerste voorsitter van die FAK en eerste nasionale leier van die Voortrekkers.[1]
Ds. Jan Hendrik Lange het in 1948 Theunissen se sewende predikant geword en het hier gebly tot 1953. Hy was leraar van Riversdal van 1940 tot 1943, daarna van Kuilsrivier tot 1948 en weer van Riverdal van 1953 tot hy demissie aanvaar op 22 Januarie 1973. Hy het later skakelbeampte geword van die Hugenote-kollege op Wellington.

Die NG gemeente Theunissen is 'n gemeente in die Vrystaatse Sinode van die Nederduitse Gereformeerde Kerk met sy middelpunt op die dorp Theunissen.

Ontstaan[wysig | wysig bron]

Die gemeente is in 1910 van die ou moedergemeente Winburg afgestig is. In 1952 kon Ons gemeentelike feesalbum berig: "(D)is een van die jonger gemeentes, maar een van die mees vooraanstaande gemeentes in die Vrystaat. Dit is aan die rand van die groeiende goudvelde geleë en daarom een van die vele gemeentes wat 'n groot roeping en taak in hierdie gebied te vervul het. Op geestelike gebied is veel gedurende die afgelope 41 jaar gedoen. Nog steeds word met alle mag die verkeerde weë met die swaard van Gods Woord bestry."

In daardie stadium was ds. J.H. Lange reeds Theunissen se sewende leraar. Ds. J.D. Louw was die eerste leraar wat hier bevestig is en wel in 1911. Die huidige kerkgebou, maar toe sonder die toring, was pas klaar. Voorheen, toe die gemeente nog nie van Winburg afgestig was nie, is dienste deur Winburg se predikante in 'n ou sinkgebou, wat as noodkerk diens gedoen het, gehou. In daardie dae was motorkarre iets onbekends en was die perdekar die dominee se vernaamste vervoermiddel. Ossewaens was die gemeentelede se vervoermiddel waarmee hul oral vanuit die distrik Nagmaal toe gekom het.

Ds. Louw se opvolgers[wysig | wysig bron]

In 1920 is ds. J.D. Louw oorlede. Sy graf kan langs die kerkgebou gesien word. Die volgende leraar was dr. N.J. van der Merwe wat vanaf 1921 tot 1924 hier gestaan en diep spore gelaat het. Later het hy in die politiek getree. Ds. J.P.H. Steyn, later van Petrus Steyn, was die volgende leraar. Hy het hom veral beywer om geld in te samel vir 'n orrel, wat dan ook gedurende sy tyd geïnstalleer is. Van 1928 tot 1931 het ds. S.J. Stander, later van Hartebeestfontein, hier gearbei. Ná hom was ds. P.J. Pienaar, later Armesorgsekretaris van die Vrystaat, hier werksaam. Dit was in 1934. Gedurende dieselfde jaar is ds. P.D. Brandt hier bevestig. Gedurende sy bediening is die toring aangebou. Ds. en mev. Brandt is albei in hierdie gemeente oorlede.

Ds. L.C. Holtzhausen was die volgende leraar van hierdie gemeente. Hy het hom veral beywer om naas die geestelike groei van die gemeente die geweldige skuldelas wat op die gemeente gerus het sowel as die oor die £4 000 skuld op die koshuis, af te werk. In Augustus 1948 het ds. Lange die beroep hierheen aangeneem. Die gemeente het onder sy leiding veel gegroei en presteer. Groot bouplanne is aan die gang gesit, veral dié vir 'n pragtige dubbelverdieping-koshuis, wat 'n sieraad vir die dorp was. Ook is 'n kerksaal gebou.

Enkele leraars[wysig | wysig bron]

  • Jan Daniel Louw, 1911 tot 25 Mei 1920 (oorlede in die amp)
  • Dr. Nicolaas Johannes van der Merwe, 1921 tot 1924 (tree uit die bediening; oorlede op 11 Augustus 1940[2])
  • Petrus Jacobus Pienaar, 1931 tot 1934 (word sekretaris van die Algemene Armesorg, OVS; oorlede 23 April 1945)
  • Philippus Daniel Brandt, 1934 tot 29 September 1938 (oorlede in die amp)
  • Salomon Johannes Stander, 1928 tot 1931
  • Petrus Jacobus Pienaar, 1931 tot 1934
  • Lucas Cornelis Holtzhausen, 1939 tot 1947 (waarna Spoorwegleraar in die OVS)
  • Jan Hendrik Lange, 1948 tot 1953
  • David Willem Krynauw, 1953–1957
  • Pieter Louis Rossouw, 1958–1961
  • H.M. Heymans, 1959 tot 1963
  • P.B. Botha, 1964 tot 1967
  • Mattheus Gerhardus Fourie, 1972–1978
  • A.W. Celliers, 1973 tot 1992

Fotogalery[wysig | wysig bron]

Bronne[wysig | wysig bron]

  • (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.
  • (af) Oberholster, prof. dr. J.J. 1964. Die Nederduitse Gerformeerde Kerk in die Oranje-Vrystaat. Bloemfontein: Die N.G. Kerk in die O.V.S.
  • (af) Olivier, ds. P.L., 1952. Ons gemeentelike feesalbum. Kaapstad en Pretoria: N.G. Kerk-uitgewers.

Verwysings[wysig | wysig bron]

  1. (en) Besonderhede oor Van der Merwe op SAHistory.org.za. URL besoek op 26 November 2014.
  2. (en) Besonderhede oor Van der Merwe op Geni.com. URL besoek op 26 November 2014.

Sien ook[wysig | wysig bron]