Paranal-sterrewag

in Wikipedia, die vrye ensiklopedie
Jump to navigation Jump to search
Paranal-sterrewag
Cerro Paranal is die sterrewag se hoofpiek – waar die Baie Groot Teleskoop (vier eenhede) en VLT-opnameteleskoop (regs) geleë is.
Cerro Paranal is die sterrewag se hoofpiek – waar die Baie Groot Teleskoop (vier eenhede) en VLT-opnameteleskoop (regs) geleë is.
Organisasie Europese Suidelike Sterrewag (ESO)
Kode 309
Ligging Cerro Paranal, Chili
Hoogte 2 635 m
Webtuiste Paranal-sterrewag
Teleskope Baie Groot Teleskoop (VLT)
VLT-hulpteleskope
VLT-opnameteleskoop (VST)
VISTA-teleskoop
Oorgangsteleskoop

Paranal-sterrewag is ’n sterrewag wat deur die Europese Suidelike Sterrewag (ESO) onderhou word. Dit is in die Atacamawoestyn van Noord-Chili op Cerro Paranal geleë, op ’n hoogte van 2 635 m. Volgens algehele ligversamelingsarea is dit die grootste optiese-infrarooisterrewag in die Suidelike Halfrond. Net die Mauna Kea-sterrewag op Hawaii in die Noordelike Halfrond is groter.

Die Baie Groot Teleskoop (VLT) is die grootste teleskoop hier en bestaan uit vier aparte 8,2 m-teleskope. Daarbenewens kan die vier hoofteleskope hul lig kombineer om ’n vyfde instrument, die Baie Groot Teleskoop-interferometer (VLTI), te vorm. Vier hulpteleskope van 1,8 m elk is ook deel van die VLTI en kan gebruik word wanneer die hoofteleskope met ander projekte besig is.

Op die terrein is ook die VLT-opnameteleskoop (VST) van 2,6 m en die VISTA-opnameteleskoop van 4 m wat saam groter dele van die hemelruim kan bespied.

Teleskope[wysig | wysig bron]

Uit die lug[wysig | wysig bron]

Die vier hoof- en vier hulpteleskoope van die VLT en die VST op die hoofpiek en VISTA op die agtergrond.

Uit die lug gesien, kan die vier groot eenhede van die VLT en die vier klein, koepelvormige hulpteleskope duidelik gesien word. Die Opnameteleskoop (VST) staan net langsaan, terwyl die VISTA-teleskoop op ’n tweede piek sowat 1 500 m van daar staan.

Baie Groot teleskoop[wysig | wysig bron]

Die VLT bestaan uit vier 8,2 m-teleskope wat in die sigbare en infrarooispektrum werk. Hierdie teleskope en die vier hulpteleskope word op sekere nagte saam gebruik as ’n optiese interferometer.

VISTA-opnameteleskoop[wysig | wysig bron]

VISTA (vir Visible & Infrared Survey Telescope for Astronomy) is ’n 4 m-teleskoop met ’n wye gesigsveld wat op infrarooi-opnames van die lug fokus. Dit is deur ’n konsortium van 18 Britse universiteite naby die VLT gebou en in Desember 2009 aan die Europese Suidelike Sterrewag oorgedra.

VLT-opnameteleskoop[wysig | wysig bron]

Die VST is ’n 2,6 m-teleskoop wat gebruik word om die VLT's met hul werk te help.

Oorgangsteleskoop (NGTS)[wysig | wysig bron]

Die Oorgangsteleskoop (NGTS) is ’n gerief vir opnames van eksoplanete en lê ’n paar kilometer van die ander teleskope. Dit bestaan uit 12 robotteleskope van 0,2 m met ’n baie groot gesigsveld van 96 vierkante grade of ’n paar honderd keer so groot as die volmaan. Die doel daarvan is om talle planete so groot soos die Aarde en Neptunus om nabygeleë sterre op te spoor met behulp van oorgangsfotometrie. Die NGTS word onderhou deur ’n vennootskap van sewe akademiese instellings van Chili, Duitsland, Switserland en Brittanje. Wetenskaplike werksaamhede het vroeg in 2015 begin.[1][2]

Galery[wysig | wysig bron]

Verwysings[wysig | wysig bron]

  1. New Exoplanet-hunting Telescopes on Paranal”. European Southern Observatory. URL besoek op 22 Mei 2015.
  2. About NGTS”. Next Generation Transit Survey. URL besoek op 3 September 2015.

Eksterne skakels[wysig | wysig bron]

Koördinate: 24°37′38″S 70°24′15″W / 24.62722°S 70.40417°W / -24.62722; -70.40417