Peter Stuyvesant

'n Skildery van Stuyvesant, dalk deur Hendrick Couturier (omstreeks 1660).

Peter Stuyvesant (in Nederlands ook Pieter of Petrus Stuyvesant, omstreeks 1610 - Augustus 1672) was die laaste Nederlandse direkteur-generaal van die Amerikaanse kolonie Nieu-Nederland, van 1647 totdat dit in 1664 aan Brittanje afgestaan is. Dit is daarna opgedeel in New York en New Jersey, met kleiner gebiede wat deel van ander kolonies, en later Amerikaanse deelstate, geword het.

Stuyvesant was 'n belangrike figuur in die vroeë geskiedenis van New York en sy naam is aan verskeie landmerke en plekke van belang in die stad gegee. Sy suksesse as direkteur-generaal sluit in 'n groot uitbreiding van die nedersetting Nieu-Nederland verby die suidpunt van Manhattan. Onder die projekte wat Stuyvesant se administrasie aangepak het, is die beskermende muur in Wall Street, die kanaal wat later Broad Street geword het en Broadway.

'n Sigaret wat deur British American Tobacco besit word, word "Peter Stuyvesant" genoem. Dié sigarette is gewild in Suid-Afrika, Zambië, Australië, Nieu-Seeland, Maleisië, Griekeland en Duitsland. Dit is in 1954 aanvanklik in Suid-Afrika van stapel gestuur.

Skakels

• Wikimedia Commons het meer media in die kategorie Peter Stuyvesant.

• Hierdie artikel is in sy geheel of gedeeltelik uit die Engelse Wikipedia vertaal.