Ph. J. du Plessis
Philip du Plessis (*16 Augustus 1883, Richmond – † 1 Julie 1961[1]) was ’n NG predikant en die skrywer van ’n boek met herinneringe oor die Anglo-Boereoorlog.
Lewe en werk
[wysig | wysig bron]Philippus Jacobus Du Plessis is op 16 Augustus 1883 op Richmond in die Oos-Kaap gebore. As agtienjarige seun sluit hy as Kaapse rebel in Januarie 1901 by die Boeremagte aan wat in die Anglo-Boereoorlog veg en hy bly tot aan die einde van die oorlog in die veld. Later bekwaam hy hom as predikant en bedien onder andere die NG gemeente van Sterkstroom van Junie 1920 tot Junie 1923, waarna hy die gemeentes van Queenstown tot 1929 en De Aar tot 1946 bedien. Hy is getroud met Martha Hester Muller.[1] Op 1 Julie 1961 is hy oorlede.
Skryfwerk
[wysig | wysig bron]Oomblikke van spanning is sy oorlogsherinneringe. Hy dien vanaf Januarie 1901 in die Boerekommando’s onder kommandant Fouché in die Oostelike Provinsie in die Kaapkolonie. Hierdie vlot geskrewe boek bied waardevolle inligting oor die krygsoperasies in die Kaap en vul die skraal inligting wat oor die stryd in hierdie gebied bestaan aan. Die boek werp ook lig op die daaglikse kommandolewe en soos die titel aandui, was daar gereelde oomblikke van spanning, maar ook ’n aantal humoristiese voorvalle. Dit is veral die belangrike rol van kommandant Fouché wat hier nader belig word.
Publikasies
[wysig | wysig bron]| Jaar | Publikasies |
|---|---|
| 1938 | Oomblikke van spanning |
Bronnelys
[wysig | wysig bron]Boeke
[wysig | wysig bron]- Dekker, G. Afrikaanse Literatuurgeskiedenis. Nasou Beperk Kaapstad Elfde druk 1970
- Kannemeyer, J.C. Geskiedenis van die Afrikaanse literatuur 1. Academica, Pretoria en Kaapstad Tweede druk 1984
- Schoonees, P.C. Die prosa van die tweede Afrikaanse beweging. J.H. de Bussy, Pretoria / Hollandsch-Afrikaansche Uitgevers Maatschappij v/h J. Dusseau & Co, Kaapstad 1939 (derde druk)