Cleopatra VII

Cleopatra VII
Cleopatra VII Thea Philopator
Borsbeeld van Cleopatra VII (Altes Museum, Berlyn).
Farao van die Ptolemeïese Dinastie
Periode	51 v.C. – 12 Augustus 30 v.C. (21 jaar)
Voorganger	Ptolemeus XII Auletes
Vader	Ptolemeus XII Auletes
Moeder	Cleopatra V (vermoedelik)
Gebore	69 v.C. Alexandrië, Egipte
Oorlede	12 Augustus 30 v.C. (op 39) Alexandrië
Cleopatra VII in Egiptiese hiërogliewe
Serech of Horusnaam Nomen of geboortenaam
Portaal    Antieke Egipte

Cleopatra VII Philopator (Grieks: Κλεοπάτρα Φιλοπάτωρ; 69 v.C. – 12 Augustus 30 v.C.), in die geskiedenis bekend as Cleopatra of Kleopatra, was die laaste aktiewe farao van Antieke Egipte. Sy is net vir ’n kort rukkie deur haar seun en medeheerser Caesarion oorleef. Haar naam is afgelei van die Antieke Griekse naam Κλεοπατρα (Cleopatra), wat beteken "glorie van die vader".

Bewind

Cleopatra het tot die Ptolemeïese Dinastie behoort, ’n familie van Griekse oorsprong wat ná Alexander die Grote se dood oor Egipte regeer het tydens die Hellenistiese tydperk. Sy het haar laat vereer as die Egiptiese godin Isis. Cleopatra het aanvanklik regeer saam met haar pa, Ptolemeus XII Auletes, en later saam met haar broers, Ptolemeus XIII en Ptolemeus XIV – met wie sy volgens Egiptiese tradisie getroud is. Sy het egter later die alleenheerser geword. As farao het sy ’n verhouding met Julius Caesar aangeknoop, wat haar houvas op die troon verstewig het. Sy het later haar seun by Caesar, Caesarion, as medeheerser in naam aangewys.

Sy het Caesar na Rome gevolg, maar ná sy moord in 44 v.C na Egipte teruggekeer, waar sy ’n verhouding met Marcus Antonius aangeknoop en saam met hom Caesar se wettige erfgenaam, Gaius Julius Caesar Octavianus (later bekend as Augustus), teengestaan het. By Antonius het sy drie kinders gehad: die tweeling Cleopatra Selene II en Alexander Helios, en nog ’n seun, Ptolemeus Philadelphus. Nadat hulle in die Slag van Actium deur Octavianus se magte verslaan is, het Antonius selfmoord gepleeg en Cleopatra het sy voorbeeld op 12 Augustus 30 v.C. gevolg.

Sy is vir ’n kort rukkie oorleef deur haar seun Caesarion, wat deur sy ondersteuners as farao aangewys is, maar hy is kort daarna op bevel van Octavianus vermoor. Egipte het toe die Romeinse provinsie Aegyptus geword.

Nalatenskap

Cleopatra is vandag steeds ’n gewilde figuur in die Westerse kultuur. Sy leef voort in verskeie kunswerke en baie dramatiserings van haar lewe, onder meer William Shakespeare se tragedie Antony and Cleopatra en die 1963-rolprent Cleopatra. In die meeste gevalle word sy as ’n groot skoonheid uitgebeeld en haar opeenvolgende verhoudings met van die wêreld se magtigste mans word beskou as ’n teken van haar estetiese en seksuele aantrekkingskrag.

Eksterne skakels

• Cleopatra VII (VI) by LacusCurtius – Hoofstuk XIII van E.R. Bevan se House of Ptolemy, 1923
• Cleopatra, ’n kinderboek by Jacob Abbott, 1852, Project Gutenberg
• James Grout: Cleopatra deel van Encyclopædia Romana
• Hierdie artikel is vertaal uit die Engelse Wikipedia