Thomas Alexandre Dumas

in Wikipedia, die vrye ensiklopedie
Jump to navigation Jump to search
Thomas-Alexandre Dumas
Thomas Alexandre Dumas

Alexandre Dumas, geskilder deur Olivier Pichat

Geboortedatum 25 Maart 1762
Geboorteplek Jérémie, Saint-Domingue (tans Haïti)
Sterfdatum 26 Februarie 1806 (43 jaar oud)
Sterfplek Villers-Cotterêts, Frankryk
Lojaliteit Royal Standard of the King of France.svg Koninkryk van Frankryk
Flag of France (1790–1794).svg Koninkryk van die Franse
Vlag van Frankryk Franse Eerste Republiek
Diens/Tak Franse weermag
Franse Rewolusionêre weermag
Jare in diens 1786–1801
Rang Luitenant-generaal
Eenheid Leër van die Oos-Pireneë
Leër van die Alpe
Leër van die Weste
Bevelvoerder van kavallerie, Armee d'Orient (1798)
Veldslae/oorloë Franse Rewolusionêre Oorloë
Oorlog van die Eerste Koalisie
Oorlog in die Vendee
Italiaanse veldtogte van die Franse Rewolusionêre Oorloë
Beleg van Mantua (1796–1797)
Franse veldtog in Egipte en Sirië
Slag van die Piramides
Familie Alexandre Dumas, père (seun)
Alexandre Dumas, fils (kleinseun)
Alexandre Lippmann (agterkleinseun)

Thomas Alexandre Dumas Davy de la Pailleterie (Frans: [tɔma alɛksɑ̃dʁ dyma davi də la pajətʁi]; ook bekend as Alexandre Dumas en Generaal Dumas; 25 Maart 176226 Februarie 1806) was 'n generaal in die Franse republikeinse leer tydens die Franse Rewolusie. Gedurende die revolusionêre oorloë het Dumas 'n sleutelrol gespeel. Sy strategiese oorwinnings het die hoë bergpasse deur die Alpe in Franse hande gelaat, wat hulle in staat gestel het om 'n nuwe veldtog teen die Oostenrykers in Italië te loods. Dumas het die hoogste rang behaal wat nog ooit deur 'n persoon van Afrika-herkoms in 'n Europese weermag bereik is. Hy was die eerste gekleurde persoon wat as 'n brigadier-generaal aangestel is en die eerste luitenant-generaal (Général de division) en die enigste hoofbevelvoerder van 'n leer (Général d'armée). Hy was later die bevelvoerder van verskeie leergroepe, onder andere die Armée des Alpes, die Armée des Pyrénées orientales en die Armée de l'Ouest. Dumas is ook beroemd as die pa van die bekende Franse skrywer Alexander Dumas (Die drie musketiers, Die Graaf van Monte Christo).

Dumas is in Saint-Domingue, in die teenswoordige Haïti, as die seun van 'n Franse edelman en 'n swart slavin gebore. Hierdeur was hy beide 'n slaaf, en 'n lid van die Franse adel. Sy pa het hom in 1776 na Frankryk teruggeneem waar hy 'n goeie opvoeding ontvang het. Nadat hy die leer as 'n gewone soldaat op 24 jarige ouderdom betree het, het hy binne 6 jaar aan die hoof van 53 000 troepe gestaan na sy aanstelling as die hoofbevelvoerder van die Armée des Alpes. Tydens die gevegte in Italië het die vyandelike Oostenrykse troepe hom die bynaam Schwarzer Teufel (Swart Duiwel) gegee. Napoleon het per geleentheid na hom as "die Horatius Cocles van Tirol" verwys (na aanleiding van Horatius Cocles 'n legendaries Romeinse held wat die brug oor die Tiberrivier teen 'n aanvallende leer verdedig het), nadat hy glo man-alleen 'n groep vyandelike soldate by 'n brug oor die Eisackrivier verslaan het. Dumas het aan die hoof van die Franse ruitery gestaan tydens die Expédition d’Égypte, maar sy boot het onklaar geraak tydens sy terugvaart na Frankryk in 1799 en hy is desnoods geforseer om in die vyandelike koninkryk van Napels aan wal te gaan waar hy in die tronk gestop is.

Na sy vrylating in 1801 keer hy terug na Frankryk na sy vrou Marie-Louise Élisabeth Labouret, die dogter van 'n herbergier, met wie hy in 1792 getrou het. Hulle het twee dogters gehad, Marie-Alexandrine en Louise-Alexandrine en 'n seun Alexandre wat later groot roem as die skrywer van avontuurverhale sou verwerf. Baie van die karakters in sy verhale is deur sy pa se loopbaan geïnspireer.

Bronne[wysig | wysig bron]

  • Hierdie artikel is 'n gedeeltelike vertaling van die Engels, Nederlands en Franse Wikipedia artikels

Eksterne skakels[wysig | wysig bron]