Volcán de Colima

in Wikipedia, die vrye ensiklopedie
Jump to navigation Jump to search
Volcán de Colima
Volcán de Colima (links) en Nevado de Colima. Volcán de Colima (links) en Nevado de Colima.
Ligging Jalisco / Colima, Mexiko
Hoogte 3 820+ meter bo seevlak
Reeks Transmexikaanse Vulkaangordel
Koördinate 19°30′46″N 103°37′02″W / 19.51278°N 103.61722°W / 19.51278; -103.61722Koördinate: 19°30′46″N 103°37′02″W / 19.51278°N 103.61722°W / 19.51278; -103.61722
Bergtipe Stratovulkaan
Laaste uitbarsting 2013 tot 2018 (en tans)[1]
Ligging van Volcán de Colima op 'n kaart (Meksiko)
Volcán de Colima
Volcán de Colima
Ligging in Mexiko.

Die Volcán de Colima, ook bekend as die Volcán de Fuego, is 'n 3 820 m hoë vulkaan wat deel is van die Colima-vulkaankompleks in Mexiko. Die kompleks bestaan uit die Volcán de Colima, Nevado de Colima en die geërodeerde El Cántaro (gelys as rustend). Dit is die jongste een van die drie en is een van die aktiefste vulkane in Mexiko en Noord-Amerika. Dit het sedert 1576 al meer as 40 keer uitgebars. Een van die grootste uitbarstings was op 20-24 Januarie 1913.[2] Nevado de Colima, ook bekend as "Tzapotépetl", lê 5 km noord van sy aktiewer buurman en is hoër (teen 4 271 m).

Ondanks sy naam lê net 'n deel van die vulkaan in die deelstaat Colima; die grootste deel lê oor die grens in die naburige Jalisco. Dit is sowat 485 km wes van Mexikostad en 125 km suid van Guadalajara in Jalisco geleë.

Sedert 1869-1878 het 'n stel koepels, bekend as El Volcancito, aan die noordelike hang van die hoofkeël van die vulkaan ontstaan.[3]

Vulkaanaktiwiteit[wysig | wysig bron]

Die keël wat tans aktief is, lê in 'n groot kaldera wat moontlik gevorm is deur 'n kombinasie van grondverskuiwings en groot uitbarstings. Die lawa is andesiet, wat 56-61% silikondioksied bevat.[4]

Sowat 300 000 mense woon binne 40 km van die vulkaan af en dit is dus die gevaarlikste vulkaan in Mexiko.[2] Vanweë sy geskiedenis van groot uitbarstings en sy nabyheid aan dig bevolkte gebiede is dit aangewys as 'n Dekadevulkaan, wat bestudeer word om die skade van toekomstige natuurrampe te verklein.

'n Aspluim op 17 Desember 2016.

In onlangse jare was daar gereeld ontruimings van nabygeleë dorpe weens dreigende uitbarstings. In 1991, 1998-1999 en van 2001 tot tans is daar uitbarstings, met lawa wat vloei en 'n lawakoepel vorm, en van tyd tot tyd groter ontploffings wat piroklastiese strome vorm en die omringende gebied met as en puin bedek.

Die grootste uitbarsting in jare het op 24 Mei 2005 plaasgevind.[5] Piroklastiese strome het 4-5 km ver getrek en lawabomme het tot 4 km ver geval.

In 2014 was daar weer uitbarstings, en op 10 Julie 2015 nog een. Op 25 September 2016 het nog 'n uitbarsting 'n pluim as en rook 3 048 m die lug in gestuur. In Desember 2016 was daar een of twee keer per dag 'n aspluim. Op 18 Desember 2016 het drie uitbarstings voorgekom. Die hoogste aspluim was 2 km hoog.[6] Op 18 Januarie 2017 was daar nog 'n groot ontploffing, wat as tot 4 km bo die krater uit geskiet het.

In 2018 is 'n webkamera naby die vulkaan geïnstalleer waarmee vulkaniese aktiwiteit gesien kan word.[7]

Verwysings[wysig | wysig bron]

  1. "Colima volcano" (in Engels). 19 Februarie 2018.
  2. 2,0 2,1 Ritchie, David (2006). Encyclopedia of Earthquakes and Volcanoes. Alexander E. Gates, Ph.D., and David Ritchie. p. 52.
  3. "Structure of the Volcancito Dome, Volcan Fuego De Colima, Mexico, Revealed in High Resolution Magnetic Anomalies". confex.com. Geargiveer vanaf die oorspronklike op 2009-02-23. Besoek op 2006-07-23.
  4. http://www.geo.mtu.edu/EHaz/ConvergentPlatesClass/Colima/Luhr%20Colima%20andesite.pdf James F. Luhr and Ian S.E. Carmichael, 1980: The Colima Volcanic Complex, Mexico in Contributions to Mineralogy and Petrology, Vol. 71, bl. 347
  5. http://www.ssd.noaa.gov/VAAC/ARCHIVE/COLI/2005E240658.html[dooie skakel]
  6. "Mexico's Colima Volcano Spews Ash, Vapor a Mile Into the Air". New York Times. 18 Desember 2016. Besoek op 18 Desember 2016.
  7. "Volcán de Colima". www.webcamsdemexico.com. Besoek op 2018-12-26.

Skakels[wysig | wysig bron]