Sakurajima

in Wikipedia, die vrye ensiklopedie
Jump to navigation Jump to search
Sakurajima
Die uitsig op Sakurajima van die vasteland in Kagoshima, 2009. Die uitsig op Sakurajima van die vasteland in Kagoshima, 2009.
Ligging Kagoshima-prefektuur, Japan
Hoogte 1 117 meter bo seevlak
Koördinate 31°34′50″N 130°39′29″O / 31.58056°N 130.65806°O / 31.58056; 130.65806Koördinate: 31°34′50″N 130°39′29″O / 31.58056°N 130.65806°O / 31.58056; 130.65806
Bergtipe Somma-stratovulkaan
Laaste uitbarsting 1955 tot 2021 (tans)[1]
Ligging van Sakurajima op 'n kaart (Japan)
Sakurajima
Sakurajima
Ligging in Japan.

Sakurajima (Japannees: 桜島, letterlik "Kersiebloeiseleiland") is 'n aktiewe stratovulkaan, voorheen 'n eiland en nou 'n skiereiland, in Kagoshima-prefektuur in Kyushu, Japan.[2] Die lawastrome van die uitbarsting in 1914 het dit met die Osumi-skiereiland verbind.[3] Dit is die aktiefste vulkaan in Japan.[4]

In April 2021 het die vulkaan steeds uitgebars[5] en as op die omgewing laat neerstort. Vroeëre uitbarsings het die witsandhooglande in die streek geskep. Op 13 September 2016 het 'n span kenners van die Universiteit van Bristol en die Sakurajima-vulkaannavorsingsentrum in Japan gesê die vulkaan kan binne 30 jaar 'n groot uitbarsting hê; twee uitbarstings het sedertdien voorgekom.[6]

Sakurajima is 'n stratovulkaan. Dit het drie pieke: Kita-dake (noord), Naka-dake (sentraal) en Minami-dake (suid), wat nou aktief is.

Kita-dake is Sakurajima se hoogste piek; dit styg tot 1 117 m bo die seevlak. Die voormalige eiland is deel van die stad Kagoshima.[7] Die oppervlakte van die huidige skiereiland is sowat 77 km2.

Uitbarstings[wysig | wysig bron]

Voor 1955[wysig | wysig bron]

Die uitbarsting van 1914 het op 11 Januarie begin nadat die vulkaan langer as 'n eeu rustend was. Dit was die kragtigste in die 20ste-eeuse Japan.[8]

Feitlik al die bewoners het die eiland in die vorige dae verlaat nadat verskeie groot aardbewings 'n vulkaanuitbarsting voorspel het. Dit was aanvanklik baie ontploffend en het groot rookkolomme en piroklastiese strome veroorsaak, maar op 13 Januarie het die lawa begin vloei, wat baie seldsaam in Japan is.[8][9]

'n Foto wat op 10 Januarie 2013 uit die Internasionale Ruimtestasie geneem is van Sakurajima en sy omgewing. Regs onder in die middel is die landengte wat die voormalige eiland met die vasteland verbind.

Die lawa het maande lank bly vloei.[8] Die eiland het groter geword, van die eilande om hom oorstroom en die nou seestraat tussen die eiland en die vasteland gevul. Eindelik is die eiland met 'n nou landengte aan die vasteland verbind.

Van 1955 tot nou[wysig | wysig bron]

In 1955 het Sakurajima se aktiwiteit weer prominent geword en die vulkaan bars sedertdien feitlik onophoudelik uit. Elke jaar is daar 'n paar duisend klein uitbarstings wat as tot 'n paar kilometer bo die berg opskiet.

Die vulkaan is in 'n dig bewoonde gebied geleë, met die stad Kagoshima met sy 680 000 inwoners net 'n paar kilometer van die vulkaan af. As gevolg daarvan is Sakurajima as 'n Dekadevulkaan aangewys.[10] Ontruimingsoefeninge word gereeld gehou.[11]

In 2011 en 2012 was daar verskeie aansienlike uitbarstings; vulkaniese aktiwiteite het tot in 2013 aangehou.[12]

Op 18 Augustus 2013 het die Showa-kater uitgebars en sy hoogste aspluim sedert 2006 geskep, tot 5 000 m hoog. Dit het duisternis en aansienlike asstortings op die sentrale deel van die stad Kagoshima veroorsaak. Dit was die 500ste uitbarsting van die jaar.[13]

Ná waarskuwings dat 'n groot uitbarsting ophande is,[14] het dit eindelik op 5 Februarie 2016 gebeur.[15] Op 4 April 2016 het dit gestop en het die Showa-krater weer uitgebars, agt tot nege dae voor groot aardbewings naby Kumamoto, Japan.[16] Drie maande later, op 26 Julie, het dit vulkaanas tot 5 000 m die lug ingeskiet.[17]

Op 3 Oktober 2020 het die vulkaan weer uitgebars, dié keer van die Aira-kaldera. Die askolom het tot 3 000 m die lug in gestrek en het 'n moontlike gevaar vir lugverkeer ingehou.[18]

Verwysings[wysig | wysig bron]

  1. "Sakurajima volcano" (in Engels). 31 Januarie 2019.
  2. Nussbaum, Louis-Frédéric. (2005). "Sakurajima" in Japan Encyclopedia, p. 814; sien foto, onderskrif -- Kagoshima after Sakurashima eruption, Illustrated London News. Januarie 1914.
  3. Davison C (1916-09-21). "The Sakura-Jima Eruption of January, 1914". Nature. 98 (2447): 57–58. Bibcode:1916Natur..98...57D. doi:10.1038/098057b0. S2CID 3964260.
  4. "Sakurajima, Japan's Most Active Volcano". nippon.com (in Engels). Nippon Communications Foundation. Mei 16, 2018. Besoek op Augustus 2, 2018.
  5. "Sakurajima Volcano Volcanic Ash Advisory: VA AT 20210405/0420Z FL050 EXTD NE OBS VA DTG: 05/0420Z to 5000 ft (1500 m)". volcanodiscovery.com. Besoek op 6 April 2021.
  6. McCurry, Justin (13 September 2016). "New data points to major eruption of Japanese volcano". the Guardian. Besoek op 17 April 2018.
  7. Nussbaum, "Kagoshima prefecture" at p. 447.
  8. 8,0 8,1 8,2 "The 1914 Sakurajima explosion at Volcanoworld". Geargiveer vanaf die oorspronklike op 2008-06-16. Besoek op 2007-08-03.
  9. "Japanese Volcanoes at the Northern Illinois University". Geargiveer vanaf die oorspronklike op 2010-08-19. Besoek op 2007-08-06.
  10. "Decade Volcano Sakurajima at the Earthquake Research Institute". Geargiveer vanaf die oorspronklike op 2007-08-19. Besoek op 2007-08-06.
  11. "Reuters report on Sakurajima explosion, June 5th 2006". Geargiveer vanaf die oorspronklike op 2007-09-28. Besoek op 2007-08-06.
  12. "Volcanic activity world-wide 16 November 2012: Ruapehu, Paluweh, Michael, Kilauea, Fuego, Santiaguito, Nevado del Ruiz, Reventador, Sakurajima, Mammoth Mountain (Long Valley),Ambrym, Nyiragongo". www.volcanodiscovery.com. Besoek op 17 April 2018.
  13. "Sakurajima spews its highest volcanic column ever at 5,000 meters". Asahi Shimbun. 18 Augustus 2013. Geargiveer vanaf die oorspronklike op 4 Maart 2016. Besoek op 18 Augustus 2013.
  14. "Sakurajima in Japan Might Be Headed Towards a Large Eruption". wired.com. Besoek op 17 April 2018.
  15. "Sakurajima volcano in Japan erupts". The Guardian. Associated Press. 5 Februarie 2016. Besoek op 5 Februarie 2016.
  16. "Volcanic activity worldwide 4 Apr 2016: Popocatépetl volcano, Bromo, Turrialba, Sangay, Sakurajima,..." www.volcanodiscovery.com. Besoek op 17 April 2018.
  17. "Kagoshima's Sakurajima volcano erupts, spews plume 5,000 meters up". 26 Julie 2016. Besoek op 17 April 2018 – via Japan Times Online.
  18. "Sakurajima Volcano Volcanic Ash Advisory: ERUPTED AT 20201003/0735Z FL100 STNR OBS VA DTG: 03/0730Z". www.volcanodiscovery.com. Besoek op 2020-10-03.

Skakels[wysig | wysig bron]