Wandelende jood (plant)

Wandelende jood
Wetenskaplike klassifikasie
Domein:	Eukaryota
Koninkryk:	Plantae
Klade:	Tracheofiete
Klade:	Angiospermae
Klade:	Monocotyledon
Klade:	Commelinids
Orde:	Commelinales
Familie:	Commelinaceae
Genus:	Tradescantia
Spesie:	T. fluminensis
Binomiale naam
	Tradescantia fluminensis; Vell., (1829)
Sinonieme
	Tradescantia albiflora Kunth; Tradescantia albovittata Pynaert; Tradescantia fluminensis f. albovittata (Pynaert) Voss; Tradescantia fluminensis f. aureovittata Voss; Tradescantia laekenensis L.H.Bailey & E.Z.Bailey;

Die wandelende jood (Tradescantia fluminensis) is ’n spesie driemasterplant wat inheems is aan Suid-Amerika waar dit in Argentinië, Brasilië, Paraguay en Uruguay voorkom.^[1]

Groeivorm

T. fluminensis is ’n meerjarige dekplant wat grondlangs kruip met sagte, haarlose stingels en blare. Die vlesige stingels skiet wortel by enige stingelknoop wat aan die grond raak. Blare is ovaal- tot lansetvormig en afwisselend gerangskik. Die puntige blare is blink, glad en effens vlesig, en sowat 3 tot 6 cm lank. Die blaarskyf (lamina) het klein randhaartjies en vernou na die basis waar dit 'n breë stingelskede vorm. Die borand van die skede het lang haartjies.

Die blom se buitenste periantblare is groen of gekleurd, en die drie binnestes petaloïed, wit, en sowat 1,27 tot 2,5 cm breed. Die blomhofies bestaan uit gepaarde, sessiele byskerms wat deur twee blaaragtige skutblare gesteun word. Blomme wissel van min tot baie om klein trosse in die byskerms te vorm. Meeldrade het bebaarde helmdrade. Blomtyd is somer (lente tot herfs), maar die blomme produseer nie saad nie.

Vereistes

Dit word as ’n tuin- of huisplant gekweek, veral die soorte met gestreepte blare. Sommige kultivars se blare is pienk getint. Dit groei maklik en vinnig en is uiters geskik vir ’n hangmandjie.

Die plant benodig klam grond en gedy somertyd. Dit aard nie in koue streke, soos waar ryp of sneeu voorkom nie. Dit kan baie skaduwee verdra. Omdat dit vogtigheid benodig, groei dit stadig indien enigsins op sonnige plekke waar die grond oor lang tydperke uitgedroog word. Omdat dit water behou, kan dit egter droë periodes weerstaan; dit begin dan weer groei as die toestande verbeter.

Probleme

As die plant se lote lank en dun is, dui dit op te min lig. As die blare bruin word, is dit te droog. Plantluise kan ook voorkom.^[2]

Indringerplant

Die wandelende jood is 'n kategorie 1b-indringerplant regoor Suid-Afrika, en moet volgens artikel 75(1), (2) en (3) van Wet op Biodiversiteit, 2004 (Wet 10 van 2004) beheer word.^[3] Hierdie plant het die potensiaal om dik plantmatte te vorm en plaaslike habitatte oor te neem. Dit word hoofsaaklik versprei deur tuiniers wat steggies daarvan aan ander tuiniers gee, of dit in tuinvullis plaas waar dit weer kan wortelskiet en groei.^[4]