Wikus Vorster

in Wikipedia, die vrye ensiklopedie
Ds. Wikus Vorster
Ds. Johannes Lodewikus Vorster
Ds. J.L. Vorster

Naam Johannes Lodewikus
Geboorte 20 Desember 1908
Philipstown, Kaapkolonie
Sterfte 2 Mei 1990 (op 81)
Onbekend
Kerkverband Gereformeerd
Gemeente(s) Piet Retief 1935–1938
Durban 1939–1942
Ventersburg-kombinasie 1942–1944
Johannesburg-Oos 1944–1948
Steynsburg 1948–1953
Bloemfontein-Wes 1953–1958
Potchefstroom-Noord 1958–1973
Jare aktief 1935–1973
Kweekskool Potchefstroom

Ds. Johannes Lodewikus Vorster (noemnaam Wikus, Philipstown, Kaapkolonie, 20 Desember 1908Potchefstroom, 2 Mei 1990) was langer as 38 jaar predikant in die Gereformeerde Kerk en het in sewe werkkringe gestaan, naamlik Piet Retief 1935–1938, Durban 1939–1942, Ventersburg-kombinasie 1942–1944, Johannesburg-Oos 1944–1948, Steynsburg 1948–1953, Bloemfontein-Wes 1953–1958 en Potchefstroom-Noord 1958–1973.

Herkoms[wysig | wysig bron]

Personeel en studente van die Potchefstroomse Universiteitskollege, 1933. Ds. Vorster is in die tweede ry van bo, in die foto's wat skuins gedraai is, regs van die middelblok.
Wikus Vorster (middel) en sy medevierdejaars aan die Teologiese Skool Potchefstroom in 1934, Ammi Venter (middel, ook 'n seun van Philipstown) en P.J.J. Delport (regs).

Soos so baie predikante wat in die jare twintig en dertig van die vorige eeu tot die bediening toegetree het, was Wikus Vorster ’n seun van Philipstown in die Bo-Karoo. In sy geboortewêreld het hy die meeste van sy onderrig ontvang, maar het aan die Hoërskool Gimnasium op Potchefstroom gematrikuleer. Aan die PUK vir CHO was hy ’n goeie student en het later voorsitter van die studenteraad geword. As jong predikant is hy getroud met Anna de Vos, wat hy aan die PUK ontmoet het.

Gemeentebediening[wysig | wysig bron]

Ds. Vorster en sy vrou, Anna (née De Vos).
Studente, dosente en besoekende predikante neem in April 1949 tydens die Sinode van die GKSA afskeid van Totius by die Teologiese Skool Potchefstroom. Eerste ry: D.F. Malan, G.P. Scheepers, C. Hatting, L.J. Botha, P.W. Buys, S.C.W. Duvenage, P.W. van der Walt, W.J. Postma, G.P.L. van der Linde, J.J.S. Venter, G.C.P. van der Vyver, M.J. Booyens, S.J. du Plessis, K.S. van Wyk de Vries. Tweede ry: J.V. Coetzee, P.J. Venter, P.J. Coetzee, J.W.J. van Ruyssen, D.J. van der Walt, H.G. Stoker, J.C. van der Walt, J.H. Boneschans, prof. J.D. du Toit, B.J. de Klerk, D.G Venter, A.S.E. Yssel, H.S. van Jaarsveld, H.J. Venter, D.N. Kotzé, N.T. Snyman. Derde ry: D.C.S. van der Merwe, B.R. Kruger, J. Postma, R.S.J. van Wyk, M. Postma, J.L. de Bruin, C.E.G. Malan, J.J.H. Booysen, B.J. de Klerk, A.L. Aucamp, J.A. Schutte, I.J. van der Walt, L.S. Van der Walt, S. du Toit, A. Duvenage, W.J. Snyman, P.J.S. de Klerk, T.T. Spoelstra.Vierde ry: D.J. Delport, J.L. Vorster, J.P. Jooste, A.A. Venter, J.F. du Plooy, H.F.V. Kruger, Jacs van Rooy, I.J. Lessing, J.M. de Wet, S.P. van der Walt, P.J. de Klerk.

Ds. Vorster se sewe gemeentes of kombinasies was verspreid oor al vier die destydse provinsies van Suid-Afrika, terwyl hy ook hulpdiens verrig het in die indertydse Suidwes-Afrika. Volgens dr. Ben de Klerk wat sy lewensberig in die GKSA se Almanak van 1991 geskryf het, is ds. Vorster se bediening gekenmerk deur "opregtheid, nederigheid en sy liefde vir en betrokkenheid by elke lidmaat". In sy jare van bediening het hy groot veranderinge ten opsigte van verstedeliking en bedieningspatrone meegemaak.

Breër betrokkenheid[wysig | wysig bron]

Ds. Vorster was 12 jaar lank raadslid van die PU vir CHO en het harde werk gedoen, ook in die komitees. In die gemeenskapslewe van al die plekke waar gearbei het, het hy volgens dr. De Klerk ’n leidende rol gespeel. "Hy was veral ’n harde, stille werker agter die skerms. Hy was by uitnemendheid ’n gesinsman en sy vrou, kinders en kleinkinders was vir hom ’n kosbare kleinood."

So stil en nederig soos hy geleef het, skryf dr. De Klerk, is ds. Vorster die oggend van 2 Mei 1990 in sy slaap in die ouderdom van 81 jaar oorlede. "Die lewe van hierdie begaafde kneg van die Here sal vir baie nog as voorbeeld bly dien."

Waardering[wysig | wysig bron]

Sy dogter Elna Coetzer het einde 2017 van haar pa geskryf: "Ek onthou hom as my stil en rustige pa, wat, volgens my as tiener, 'uit die bloute', altyd daar was as ek hulp of raad nodig gehad het. Sonder dat hy dit gewys het, het hy my so goed gelees en gehelp met raad, veral ook oor besluite oor my studierigting op Puk. Ek het gedink niemand weet hoe ek daaroor worstel nie maar ja, skielik was hy net daar op die regte tyd vir my om te help. Die Karoo-woonstelle het sy naam gekry van sy erfplaas in die Karoo. Ons was 'n paar dae gelede by Coenie en Deon Meyer se uitmuntende Karoo Suite en daar was my man Jan so aangedaan, want ons het gewens my pa was daar om die Karoo, wat hy so diep liefgehad het, te kon gedenk deur Coenie en Deon se oë ... en harte."

Bronne[wysig | wysig bron]

  • (af) De Klerk, dr. Ben in De Bruyn, F.P.R et al. 1990. Die almanak van die Gereformeerde Kerke in Suid-Afrika vir die jaar 1991. Potchefstroom: Administratiewe Buro.