Willem Cornelis Janse van Rensburg

in Wikipedia, die vrye ensiklopedie
Spring na: navigasie, soek
Willem Cornelis Janse van Rensburg

2ste President van die Zuid-Afrikaansche Republiek
Ampstermyn
18 April 1862 – 10 Mei 1864
Voorafgegaan deur Stephanus Schoeman
Opgevolg deur Marthinus Wessel Pretorius

Persoonlike besonderhede
Geboorte 16 Mei 1818
Beaufort-Wes, Kaapkolonie
Sterfte 13 Julie 1865 (op 47)
Eggenoot/eggenote Elizabeth Maria Jacoba du Plessis

Willem Cornelis Janse van Rensburg (Beaufort-Wes, 16 Mei 1818Rustenburg, 13 Julie 1865) was die tweede voorsitter van die Uitvoerende Raad van die Zuid-Afrikaansche Republiek (Transvaal) ten tyde van die Transvaalse Burgeroorlog.

Van Rensburg is naby Beaufort-Wes gebore. Hy was die seun van Hendrik Janse van Rensburg en sy tweede vrou, Martha Magdalena Oosthuizen. Hy trou in 1838 met Elizabeth Maria Jacoba du Plessis (31 Oktober 1819 – 6 Augustus 1895).

Van Rensburg se graf in die Helde-akker in Pretoria.

Van Rensburg maak die Groot Trek mee en oorleef die moorde in Natal, waarna hy homself in die Transvaal vestig. Hy was van 18 April 1862 tot 23 Oktober 1863 die waarnemende voorsitter vir Marthinus Wessel Pretorius en van 23 Oktober 1863 tot 10 Mei 1864 die voorsitter. Hy het 'n belangrike rol in die vereniging van die voormalige Lydenburg Republiek met die ZAR gespeel. Hy het ook vir Pretorius gesteun toe hy probeer het om die ZAR en die Oranje-Vrijstaat te verenig.

Sy voorsitterskap was egter van korte duur. Hy is reeds in April 1863 as die tweede president van die ZAR verkies, maar het geweier om die ampseed af te lê. 'n Tweede verkiesing moes gehou word, waartydens hy 1106 stemme teenoor Pretorius se 1065 stemme ontvang het. Hierna aanvaar hy die posisie en lê die eed op 23 Oktober 1863 af. Pretorius se ondersteuners het nie die uitslag aanvaar nie, wat op 'n burgeroorlog uitgeloop het. Toe die gevegte in Januarie 1864 ten einde kom, is nog 'n presidensiële verkiesing gehou, waartydens Pretorius herkies en op 9 Mei 1864 ingesweer is.

Van Rensburg sterf in Julie 1865 en is op sy plaas in Rustenburg begrawe. In Augustus 1974 is hy deur afstammelinge in die Helde-akker in Pretoria herbegrawe.

Voorafgegaan deur:
Stephanus Schoeman
Staatspresident van die Zuid-Afrikaansche Republiek
18 April 1862 – 10 Mei 1864
Opgevolg deur:
Marthinus Wessel Pretorius