Zubin Mehta

in Wikipedia, die vrye ensiklopedie
Jump to navigation Jump to search
Zubin Mehta
’n Beeld van die betrokke persoonlikheid.
Gebore 29 April 1936 (1936-04-29) (83 jaar oud)
Bombaai, Brits-Indië
(nou Moembaai, Maharashtra, Indië)
Ouers Mehli Mehta
Tehmina Daruvala
Beroep Dirigent
Huweliksmaat Carmen Lasky (t. 1958; geskei 1964)
Nancy Kovack (t. 1969)
Familie Zarin Mehta (broer)
Kind(ers) 3
Webblad zubinmehta.net

Zubin Mehta (* 29 April 1936 – ) is 'n Indiese dirigent van Westerse en Oosterse klassieke musiek. Hy is tans Musiekdirekteur van die Israel Filharmoniese Orkes (IPO), en Emeritusdirigent van die Los Angeles Filharmoniese Orkes.

Mehta se vader was die stigter van die Bombaai Simfonieorkes en Mehta het sy vroegste musikale opvoeding by sy vader ontvang. Op ouderdom 18 het hy ingeskryf by die Weense Staatsmusiekakademie, van waar hy na drie jaar as 'n dirigent gegradueer het. Hy het internasionale kompetisies begin wen, en het die Koninklike Liverpool Filharmoniese Orkes op die ouderdom van 21 gedirigeer. In die 1960's het Mehta baie ondervinding opgedoen deur in te staan vir gevierde maestros dwarsoor die wêreld.

Mehta was vanaf 1961 tot 1967 Musikale Direkteur van die Montreal Simfonieorkes; asook Musiekdirekteur van die Los Angeles Filharmoniese Orkes vanaf 1962 tot 1978. So het hy die jongste musiekdirekteur ooit van enige groot Noord-Amerikaanse orkes geword. Hy is in 1969 aangestel as Musiekadviseur by die Israel Filharmoniese Orkes en in 1981 het Mehta die orkes se permanente Musiekdirekteur geword. Van 1978 tot 1991 was hy Musiekdirekteur van die New York Filharmoniese Orkes. Sedert 1985 was hy ook hoofdirigent van die Maggio Musicale Fiorentino in Florence, Italië.

Mehta was ook deel van The Trout, Christopher Nupen se rolprent oor 'n opvoering van Schubert se Forelkwintet deur Jacqueline du Pré, Daniel Barenboim, Itzhak Perlman en Pinchas Zukerman op 30 Augustus 1969 by die Queen Elizabeth Saal in Londen, wat die maatstaf van die klassieke musiekuitsaaiwese geword het. Die rolprent is in 'n enkele week in Augustus 1969 geskiet. The Trout is waarskynlik die klassieke musiekrolprent wat die meeste uitgesaai is.[1] The Trout het ook die TZ Rose in 1973 gewen.[2]

Mehta is 'n ereburger van beide Florence en Tel Aviv, en is in 1997 'n erelid van die Weense Staatsopera gemaak en van die Beierse Staatsopera in 2006.

Onlangs het Mehta verskeie toere met die Beierse Staatsopera onderneem en 'n besige skedule gehad van gasopvoerings as dirigent. In Desember 2006 het hy die Eerbewys van die Kennedy-sentrum ontvang en Oktober 2008 was hy deur die Japannese Imperiale Familie vereer met die "Praemium Imperiale". In 2016 is Mehta aangestel as ere-dirigent van die Teatro San Carlo, Napels.

Verwysings[wysig | wysig bron]

  1. www.Allegrofilms.com. Besoek op 17-03-2019.
  2. www.Allegrofilms.com. Besoek op 17-03-2019.
Hierdie artikel is in sy geheel of gedeeltelik vanuit die Engelse Wikipedia vertaal.