Belgiese monargie

in Wikipedia, die vrye ensiklopedie
Spring na: navigasie, soek
Belgiese monargie
Wapen van die Huis van België
Wapen van die Huis van België
Koning Filip
Titel Koning van die Belge
Voorganger Albert II
Regmatige opvolger Prinses Elisabeth

België is ’n erflike konstitusionele monargie met die Koning van die Belge aan die hoof. Die huidige koning is Filip.

Ontstaan[wysig]

Koning Leopold I, stamvader van die Belgiese dinastie.

België het saam met die Koninkryk van Nederland een groot land gevorm. Die Belgiese adel was egter hoofsaaklik Franssprekend. In 1830 het België weggebreek en op 22 November 1830 ’n konstitusionele monargie as regeringsvorm gekies. Die nuwe nasie moes ’n staatshoof vind wat diplomatiek neutraal was. Die eerste en tweede kandidaat was die Belgiese regent Surlet de Chokier en die prins van Mérode. Albei het die troon van die hand gewys.

Die volgende keuse was Leopold van Sakse-Koburg-Saalfeld, wat getroud was met die dogter van die Franse koning, Lodewyk-Philippe. Hy het die Belgiese troon aanvaar en is op 21 Julie 1831 as die eerste Koning van die Belgs gekroon onder die naam Leopold I. Sommer gou was daar probleme met sy buurman in die noorde: Willem I van Nederland het troepe na België gestuur tydens die Tiendaagse Veldtog en het geweier om die nuwe koninkryk te erken. Die Nederlanders het die Belge aanvanklik binne tien dae verslaan. Leopold kon egter reken op die steun van sy familie in Engeland en van sy skoonpa, koning Lodewyk-Philippe. Op 12 Augustus 1831 is ’n wapenstilstand gesluit en eindelik was Willem I verplig om België se bestaan te erken. Die Verdrag van Londen (1839) het die onafhanklikheid van België bekragtig.

Duitse koninklike bloed[wysig]

Die Belgiese koningshuis is oorspronklik afkomstig van die Duitse Sakse-Koburg-Saalfeld, later Sakse-Koburg en Gotha. Dié dinastie was gewild; sy lede het op die troon van Groot-Brittanje, Bulgarye, Portugal en België gesit. Die krone van Griekeland en Roemenië, wat die Sakse-Koburg en Gothas van die hand gewys het, het gegaan na die Huis van Sleeswyk-Holstein-Sonderburg-Glücksburg-Oldenburg (Griekeland) en die Huis van Hohenzollern-Sigmaringen (Roemenië).

In 1920 het koning Albert I egter besluit om nie meer dié naam te gebruik nie, maar "van België". Ook die wapen van Sakse is uit die Belgiese koningswapen verwyder. Die rede was die wandade wat in die Eerste Wêreldoorlog deur die Duitse troepe in België gepleeg is.

Huwelikspolitiek[wysig]

Die huidige koning van die Belge, Filip.

Vanweë die huwelikspolitiek van die koningshuis is politieke kwessies deur middel van huwelike opgelos. Leopold I was naamlik verbonde aan al die groot moondhede in Europa: hy was die oom van koningin Victoria en koning Ferdinand II van Portugal, die skoonseun van die Franse koning Lodewyk-Philippe en ’n swaer van Konstantyn van Rusland. Later het hy die skoonpa van die Meksikaanse keiser Maksimiliaan I geword.

Gou was al die prinse en prinsesse getroud en was die jong koninklike Belgiese bloed ’n mengsel van koninklike en keiserlike dinastieë.

Die koningshuis van België is familiaal verbind met:

Konings van die Belge[wysig]

Die vyf vorige Belgiese konings.
Van Tot Naam
21 Julie 1831 10 Desember 1865 Leopold I
17 Desember 1865 17 Desember 1909 Leopold II
23 Desember 1909 17 Februarie 1934 Albert I
23 Februarie 1934 16 Julie 1951 Leopold III
17 Julie 1951 31 Julie 1993 Boudewyn
9 Augustus 1993 21 Julie 2013 Albert II
21 Julie 2013 hede Filip

Troonopvolging[wysig]

Die volgorde van kandidate vir die troonopvolging is tans:

  1. Prinses Elisabeth (2001), dogter van koning Filip
  2. Prins Gabriël (2003), seun van koning Filip
  3. Prins Emmanuel (2005), seun van koning Filip
  4. Prinses Eléonore (2008), dogter van koning Filip
  5. Prinses Astrid (1962), dogter van koning Albert II
  6. Prins Amedeo (1986), seun van prinses Astrid
  7. Prinses Maria-Laura (1988), dogter van prinses Astrid
  8. Prins Joachim (1991), seun van prinses Astrid
  9. Prinses Luisa Maria (1995), dogter van prinses Astrid
  10. Prinses Laetitia Maria (2003), dogter van prinses Astrid
  11. Prins Laurent (1963), seun van koning Albert II
  12. Prinses Louise (2004), dogter van prins Laurent
  13. Prins Nicolas (2005), seun van prins Laurent
  14. Prins Aymeric (2005), seun van prins Laurent

Verwysings[wysig]

Hierdie artikel is merendeels vertaal vanaf die Nederlandse Wikipedia-artikel [1]

Eksterne skakels[wysig]

Regerende dinastieë in Europa
België (België) • Bernadotte (Swede) • Bourbon (Spanje) • Grimaldi (Monaco) • Liechtenstein (Liechtenstein) • Nassau-Weilburg (Luxemburg) • Oranje-Nassau (Nederland) • Sleeswyk-Holstein-Sonderburg-Glücksburg (Denemarke/Noorweë) • Windsor (Verenigde Koninkryk)
Tydens die 20ste eeu onttroon: Bragança-Wettin (Portugal) • Habsburg (Oostenryk-Hongarye) • Hohenzollern (Duitsland) • Hohenzollern-Sigmaringen (Roemenië) • Karađorđević (Joego-Slawië) • Osman (Turkye) • Romanof (Rusland) • Sakse-Koburg en Gotha (Bulgarye) • Savoje (Italië/Albanië/Kroasië) • Sleeswyk-Holstein-Sonderburg-Glücksburg (Griekeland/Ysland) • Wittelsbach (Duitsland/Denemarke/Noorweë/Swede/Griekeland) • Zogoe (Albanië)