Berliner Philharmoniker
Die Berliner Philharmoniker (voorheen bekend as die Berliner Philharmonisches Orchester in Duits, en die Berlynse Filharmoniese Orkes in Afrikaans) is 'n simfonieorkes wat in Berlyn, die hoofstad van Duitsland, gesetel is. Dit word deur baie bronne as een van die beste simfonieorkeste ter wêreld beskou, en sommige kritici beskryf dit as die beste orkes.[1] Die orkes se huidige hoofdirigent en musiekdirekteur is die Britsgebore Sir Simon Rattle.
Inhoud |
[wysig] Geskiedenis
Die orkes is in 1882 gestig deur omtrent 50 musici nadat hulle besluit het om teen die autokratiese en hardvogtige leiding van Benjamin Bilse, in wie se orkes hulle voorheen gespeel het, te rebelleer. Aanvanklik het finansiële probleme gedreig om die jong orkes te kniehalter, maar in 1887 het die konsertagent Hermann Wolff die bestuur van die orkes oorgeneem en dadelik begin beplan om die orkes se toekoms te verseker. Hy het die dirigent Hans von Bülow aangestel as die eerste hoofdirigent van die orkes.
Binne vyf jaar daarna het Von Bülow 'n unieke speelstyl vir die orkes geskep. Enkele van die dirigente wat die orkes in daardie tyd gedirigeer het was Hermann Levi, Hans Richter, Felix Mottl, Felix von Weingartner, Ernst von Schuch as ook komponiste soos Brahms en Grieg en komponis-dirigente soos Gustav Mahler, Richard Strauss en Hans Pfitzner.
Pyotr Ilytch Tsjaikowski is verskeie kere genooi om die orkes te dirigeer en het eenkeer met entoesiasme opgemerk hoe maklik die orkes hom aanpas by die styl en vereistes van wyd uiteenlopende komponiste.
Artur Nikisch het Von Bülow in 1895 opgevolg. Nikisch, aanvanklik 'n violis, was 'n dirigent wat kalm en ekonomiese gebare gebruik het. In die 27 jaar wat hy aan die helm van die orkes was het hy bygedra tot 'n enorme artistieke kontintuïteit. Hy was 'n ywerige voorstander van die musiek van Anton Bruckner asook van die, in daardie stadium, moderne musiek van Mahler en Richard Strauss. Onder die soliste wat in daardie tyd saam met die orkes opgetree het was die pianiste Feruccio Busoni, Wilhelm Backhaus en Alfred Cortot, die violiste Jacques Thibaud, Carl Flesch, Bronislav Huberman, Jascha Heifetz en Adolf Busch, asook die tjelis Pablo Casals en sangers soos Maria Ivogün en Heinrich Schlusnus.
[wysig] Dirigente
- Sir Simon Rattle (sedert 2002)
- Claudio Abbado (1989-2002)
- Herbert von Karajan (1954-1989)
- Sergiu Celibidache (1945-1952)
- Leo Borchard (1945)
- Wilhelm Furtwängler (1922-1945 en 1952-1954)
- Arthur Nikisch (1895-1922)
- Hans von Bülow (1887-1893)
- Ludwig von Brenner (tot 1887)
[wysig] Verwysings
- Mozarteum Brasileiro, 2000. "Berliner Philharmonisches Orchester" - Program vir konsert op 22 Mei 2000 in die Theatro Municipal, São Paulo
