George Claassen

in Wikipedia, die vrye ensiklopedie
Spring na: navigasie, soek
George Claassen
Nasionaliteit Suid-Afrika
Beroep Joernalis, akademikus
Bekend vir Boeke
Religie Ateïs

George Claassen (BA, B.Hons, MA, PhD) is die stigter en direkteur van Skepties Suid-Afrika (SSA) en was die outeur van die gewilde WordPress-webjoernaal Promeutheus Unbound. Hy was onder andere by die Universiteit van Pretoria en die Universiteit van Stellenbosch werksaam, asook by koerante soos Beeld en die Wes-Kaapse publikasie Die Burger. Claassen word soms as die Suid-Afrikaanse Richard Dawkins bestempel omdat hy 'n uitgesproke kritikus van kreasionisme en Intelligente Ontwerp is, asook van religie in die algemeen. Hy was gereeld by religieuse debatte betrokke.

Claassen het aan die Universiteit van Pretoria (UP) sy BA, B.Hons en MA behaal, en by UNISA sy PhD. Hy het in 1974 as joernalis en fotograaf by Beeld begin werk en hy was meremale die algemene, politieke en sportverslaggewer. Nadat hy 'n ruk lank as navorser by die Instituut van Taal, Letterkunde en die Kunste gewerk het, het hy by die Departement van Joernalistiek by die Technikon in Pretoria aangesluit waar hy van 1990 tot 1993 hoof van die Departement was. Vanaf Oktober 1993 tot die einde van Januarie 2001 was hy professor en hoof van die Departement van Joernalistiek by die Universiteit van Stellenbosch (US). In 1997 het hy die eerste universiteitskursus in wetenskap- en tegnologiejoernalistiek by 'n Afrika-universiteit ontwikkel en gestig, wat hy steeds by die Universiteit van Stellenbosch aanbied. Hy was van 2001 tot 2006 wetenskapredakteur by Die Burger, waar hy die weeklikse rubriek "Wetenskap vandag" geskryf het. Claassen het in 2007 die Nasionale Wetenskap- en Tegnologieforum se top SAASTA-toekenning vir verwerf vir sy rol as 'n wetenskapkommunikeerder. Hy is getroud en het drie kinders.

Sy vader was George Claassen, wenner van die Comrades-maraton in 1961.

Publikasies[wysig]

Claassen is outeur en medeouteur van vyf boeke en vele wetenskaplike artikels in verskeie wetenskapjoernale.

  • 'n Historiese Blik op die Lae Lande, HAUM, 1982
  • Taalverskeidenheid - 'n Blik op Taalvariasie in Afrikaans (Academica), 1983
  • When beggars die (Boabab)
  • Die Groot Aanhalingsboek (Human & Rousseau), 1998
  • Geloof, bygeloof en ander wensdenkery: Perspektiewe op Ontdekkings en Irrasionaliteite (Protea Boekhuis), 2007

Bronne[wysig]

Eksterne skakels[wysig]