Islamitiese kalender

in Wikipedia, die vrye ensiklopedie
Islamitiese kalenderstempel uitgereik by King Khalid-lughawe (10 Radjab 1428/24 Julie 2007)
Islamitiese kalender, Linden-Museum, Stuttgart, Duitsland
Tunisiese kalenderbladsy van 14 Januarie 1999/26 Ramadan 1419 in Arabies en Frans
Islamitiese kalender tydens die vasmaand Ramadan
Burgerlike en hidjra-vestigingsdatums van 'n biblioteek in Jerusalem se historiese binnestad

Die Islamitiese kalender (Arabies: التقويم الهجري‎, at-taqwīm al-hidjrī) is 'n jaartelling vanaf die jaar waarin die hidjra (die emigrasie van die profeet Mohammed van Mekka na Medina) plaasgevind het, en kom ooreen met 15 Julie of 16 Julie 622 in die Gregoriaanse kalender. Die kalender in Islam word gebruik om fees- en vasdae te bepaal, maar ook as algemene kalender in Saoedi-Arabië en enkele omliggende lande.[1] In die alledaagse lewe van die Islamitiese lande word egter die Gregoriaanse kalender gebruik. Huurgeld, salarisse, ens. word volgens die Gregoriaanse kalender betaal, wat ook vir landbou ingespan word indien geen tradisionele sonkalender soos die Berberkalender of die Koptiese kalender gebruik word nie, want 'n maankalender is nie geskik vir landbouwerk nie.

Jare word volgens die Islamitiese kalender aangedui met AH (Anno Hegirae) wat 'n Latynisiering van hidjra is. Die Islamitiese jaar tel 12 maanmaande met altesaam 354 of 355 dae en is daarom ongeveer 11 dae korter as die sonjaar. Die gevolg is dat Asjoera, Ramadan, Suikerfees, Offerfees en al die ander herdenkings elke jaar een en 'n halwe week vroeër is volgens die Gregoriaanse kalender.

Maande[wysig | wysig bron]

Die Islamitiese maande het die volgende name:

  1. Muharram ul Haram (of korter Muharram) محرّم
  2. Safar صفر
  3. Rabi'-oel-Awwal (Rabi' I) ربيع الأول
  4. Rabi'-oel-Akhir (of Rabi' al-Thaany) (Rabi' II) ربيع الآخر أو ربيع الثاني
  5. Djoemaada-oel-Awwal (Djoemaada I) جمادى الأول
  6. Djoemaada-oel-Akhir (of Doemaada al-THaany) (Jumaada II) جمادى الآخر أو جمادى الثاني
  7. Radjab رجب
  8. Sja‘bān شعبان
  9. Ramadan رمضان
  10. Sjawwal شوّال
  11. Dhu'l Qa'dah (of Thw al-Qi'dah) ذو القعدة
  12. Dhu'l Hidjdja (of Thw al-Hidjdja) ذو الحجة

Name van die weeksdae[wysig | wysig bron]

Die Islamitiese weeksdae:

  1. Jaum al-ahad (يوم الأحد, letterlik: "eerste dag", Sondag)
  2. Jaum al-ithnajna (يوم الإثنين, letterlik: "tweede dag", Maandag)
  3. Jaum ath-thalatha' (يوم الثُّلَاثاء, letterlik: "derde dag", Dinsdag)
  4. Jaum al-arba'a' (يوم الأَرْبعاء, letterlik: "vierde dag", Woensdag)
  5. Jaum al-khamis (يوم خَمِيس, letterlik: "vyfde dag", Donderdag)
  6. Jaum al-djoem'a (يوم الجُمْعَة, letterlik: "versameldag", Vrydag)
  7. Jaum as-sabt (يوم السَّبْت, letterlik: ""sabbatdag", Saterdag)

Feesdae[wysig | wysig bron]

Die Islamitiese feesdae:

  1. 1 Muharram: Nuwejaar
  2. 10 Muharram: Asjoera
  3. 12 (Soenniete) of 17 (Sjiiete) Rabi'-oel-Awwal: Mawlid an-Nabi
  4. 27 Rajab: Lailat al-'Miraadj
  5. 15 Sja‘bān: Lailat al-'Baraat
  6. 1 – 29 of 30 Ramadan: Vasmaand
  7. 21 (Soenniete) of 27 (Sjiiete) Ramadan: Lailat al-'Kadr
  8. 1 Sjawwal : Eid-oel-Fiter (Suikerfees)
  9. 10 Dhu'l Hidjdja: Eid-oel-Adha (Offerfees)

Slegs Eid-oel-Fiter en Eid-oel-Adha word algemeen as Islamitiese feeste beskou; die ander is kultureel of gebaseer op 'n bepaalde geloofsoortuiging.

Verwysings[wysig | wysig bron]

  1. (nl) "De Islamitische Tijdrekening". Universiteit van Utrecht. Geargiveer vanaf die oorspronklike op 26 April 2018. Besoek op 12 Desember 2018.

Eksterne skakels[wysig | wysig bron]