Italiaanse krygsgevangenes in Suid-Afrika
Tussen 1941 en 1947 is 'n groot aantal Italiaanse krygsgevangenes in Suid-Afrika aangehou. Die Italiaanse krygsgevangenes is tydens die Tweede Wêreldoorlog in Noord-Afrika gevangene geneem.[1]
Die eerste Italiaanse krygsgevangenes het in Februarie 1941 in Suid-Afrika aangekom. Die krygsgevangenes is deur die Geallieerdes, insluitende Suid-Afrikaaanse troepe, wat as die Springbokke bekend gestaan het, gevangene geneem in Italiaans Somaliland en Ethiopië. Dié is later gevolg deur duisende uit die Woestynveldtogte in Egipte, Libië, Cyrenaica en Tripolitania. Dit was die eerste keer dat vreemde krysgevangenes in Suid-Afrika aangehou is en die owerhede was nouliks voorbereid op die instroming van gevangenes en die gepaardgaande logistieke uitdagings. Mettertyd sou die Zonderwater krygsgevangenekamp by Cullinan, sowat 23 myl van Pretoria, egter onder Kolonel HF Prinsloo ontwikkel tot een van die grootste krygsgevangene kampe in die Geallieerde gebiede en 'n toonbeeld van die humanitêre behandeling van Krygsgevangenes.[1] Benewens Zonderwater is krygsgevangenes ook in Koffiefontein, Paarl, Robertson, Pringle Baai en Woodlands in Durban aangehou.
Die Italiaanse krygsgevangenes het 'n merkbare nalatingskap in Suid-Afrika agtergelaat in die vorm van talle konstruksie projekte waarop hulle gewerk het. Dit sluit in baie van Suid-Afrika se bergpasse,[2] paaie,[3] bekende geboue, kerke en kapelle,[4] plaashuise en buitegeboue [5][6], tuinterasse, 'n klipdamwal[7] en 'n besproeiingskanaal.[8] Verder het talle van die Italianers na hulle gerepatrieer is na Suid-Afrika teruggekeer. 23 000 gevangenes het aansoek gedoen om in Suid-Afrika aan te bly, maar slegs 800 het toestemming gekry. Byna 20 000 het egter binne 'n paar jaar na Suid-Afrika teruggekeer.[9] Dié Italiaanse immigrante het 'n beduidende invloed op die Suid-Afrikaanse samelewing gehad in gebiede soos wynbou,[10][11] kaasproduksie,[10] restaurantwese,[11] en die kunste.
In die roman, Die swye van Mario Salviati van die Afrikaanse skrywer Etienne van Heerden is die geskiedenis van die Italiaanse krygsgevangenes in Suid-Afrikaverskyn verweef met ander stories in "'n mengelmoes van feit en fiksie".[9]
[wysig] Verwysings
- ^ 1,0 1,1 Military History Journal, Italian Prisoners of War in South Africa 1941 - 1947, besoek op 11 Maart 2008
- ^ Oulitnet, Demone in die vensters, besoek op 11 Maart 2008
- ^ Kogelberg Biosphere Reserve, The Koglberg Biosphere reserve is just an hour's drive from Cape Town., besoek op 11 Maart 2008
- ^ Zulu Kingdom - KwaZulu-Natal, Church Italian Church en Prisoner of War Church, besoek op 11 Maart 2008
- ^ Wederomwynplaas, The History of the farm and it's family, besoek op 11 Maart 2008
- ^ KwaThabisile Game Lodge - Leeuwkloof Valley Conservancy, Cullinan, besoek op 11 Maart 2008
- ^ Maroelatyd, Popper se dam - 'n Italiaanse meesterstuk, besoek op 11 Maart 2008
- ^ 22 Nama Karoo, IN & AROUND (MORE) - KLAWER, besoek op 11 Maart 2008
- ^ 9,0 9,1 Tanja Pieterse, Cimitero Militare Italiano Zonderwater, Zambi Nuus, besoek op 11 Maart 2008
- ^ 10,0 10,1 Fairview Wyne, Agostinelli Wines, besoek op 11 Maart 2008
- ^ 11,0 11,1 Neil Pendock, La vino e Bella, WINE magazine, besoek op 11 Maart 2008
 |
Hierdie artikel omtrent Suid Afrika se geskiedenis is slegs 'n saadjie en bied tans nog nie ensiklopediese dekking van die betrokke onderwerp nie. Jy kan Wikipedia help deur dit uit te brei. |
