Porto Alegre

in Wikipedia, die vrye ensiklopedie
Spring na: navigasie, soek

Porto Alegre
Porto Alegre skyline.jpg

Kaart Wapen
RioGrandedoSul Municip PortoAlegre.svg
Porto Alegre (RS) - Brasao.svg
Vlag
Bandeira de Porto Alegre (RS).svg
 Land Flag of Brazil.svg Brasilië
 Deelstaat Bandeira do Rio Grande do Sul.svg Rio Grande do Sul
 Koördinate 30°1′S 51°13′W Koördinate: 30°1′S 51°13′W
 Stigting 26 Maart 1772
 Oppervlakte:  
 - Totaal 497 vk km
 Hoogte bo seevlak 10 m
 Bevolking:  
 - Totaal (2010) 1 437 939
 - Bevolkingsdigtheid 3 038/vk km
 Tydsone UTC -3
 Burgemeester José Fortunati
 Amptelike Webwerf portoalegre.rs.gov.br

Porto Alegre (Portugees, letterlik "Vrolike Hawe") is die hoofstad van die Suid-Brasiliaanse deelstaat Rio Grande do Sul met 'n oppervlakte van 497 vierkante kilometer en 'n bevolking van 1,5 miljoen in 2010. Porto Alegre is die belangrikste handel- en nywerheidsentrum in die suide van Brasilië en die vyfde grootste metropolitaanse gebied van die land met 'n bevolking van 4,0 miljoen. Die stad lê aan die oewer van die Rio Guaíba, wat hier die grootte van 'n meer bereik, sowat 50 kilometer vanaf sy uitmonding in die Lagoa dos Patos.

Porto Alegre is gedurende die Spaans-Portugese grenskonflikte van die 18de eeu gestig. In 1742 het sowat sestig koloniste van die Portugese Asore-eilandgroep hulle aan die oewer van die Rio Guaíba gevestig. Die vinnige ekonomiese opswaai van die nedersetting het in 1824 met die vestiging van Duitse setlaars uit die Hunsrück en ander Duitse gebiede begin wat hier 'n nuwe heenkome as kleinboere gevind het.

Die stad bied aan sy inwoners volgens 'n ondersoek van die Verenigde Nasies die hoogste lewenskwaliteit van alle groot stede in Latyns-Amerika. Porto Alegre is vandag 'n moderne hawestad met baie wolkekrabbers en pronk met sy indrukwekkende ligging in die heuwels van die kusgebied en 'n groot aantal tuine en groen gebiede.

Vanweë die nabygeleë Campanha Gaúcha, die land van die gauchos, word Porto Alegre ook dikwels die "Hoofstad van die Gauchos" genoem. Ander belangrike besienswaardighede in die omgewing is die suidhange van die Serra Gaúcha waar Europese setlaars 'n blywende stempel afgedruk het, en die bouvalle van voormalige Jesuïete-nedersettings.

Geografie en klimaat[wysig]

Danksy die samevloeiing van verskeie kleiner riviere wat in die Rio Guaíba uitmond beskik Porto Alegre oor 'n groot rivierhawe wat vanweë sy uitgestrekte oppervlakte soos 'n groot strandmeer lyk en by die Lagoa dos Patos aansluit wat oor 'n lengte van 250 kilometer en 'n wydte van tot by 60 kilometer strek.

Porto Alegre tel sowat 1,4 miljoen inwoners, terwyl die metropolitaanse gebied met meer as 30 stede (waaronder Canoas, Novo Hamburgo, Campo Bom, São Leopoldo en Gravataí) 'n bevolking van naastenby vier miljoen het.

Die middestad van Porto Alegre teen sononder, soos gesien vanaf die eiland Ilha da Pintada

Vanweë sy ligging in die mees suidelike deel van Brasilië lê Porto Alegre verder af van die meeste groot Brasiliaanse stede soos Rio de Janeiro (1 558 kilometer), São Paulo (1 109 kilometer) en Brasília (2 027 kilometer) as byvoorbeeld van die Uruguaanse hoofstad Montevideo (890 kilometer) of die Argentynse hoofstad Buenos Aires (1 063 kilometer). Die suidelike buurlande het dus ook 'n groot invloed op Porto Alegre se ontwikkeling uitgeoefen. Net soos in Uruguay en Argentinië speel die Gaúcho-kultuur 'n groot rol in die stad en sy omgewing. Sondae geniet mense hier dikwels die tipiese Churrasco, 'n plaaslike variant van 'n braaivleis-ete, en chimarrão (mate-tee) is een van die gewildste dranke in Porto Alegre.

Porto Alegre is in die subtropiese klimaatstreek van Brasilië geleë en kry dwarsdeur die jaar hoë reënval. Somertemperature styg nouliks bo 32 °C, alhoewel die warm somerweer met bedompigheid gepaard gaan. Die hoogste temperatuur wat ooit aangeteken is was 40,7 °C in Februarie 1943. Die winterseisoen word deur matige temperature, maar ook dikwels wisselagtige weerstoestande met wind en reën, en temperature tussen 5 °C en 25 °C gekenmerk. Sneeuval kom nouliks voor en tree meestal in die vorm van nat sneeu op. Die laagste wintertemperatuur wat ooit aangeteken is was -4 °C in Julie 1918. Die weer in die najaar is eweneens wisselvallig, maar warmer. Die lente is die droogste seisoen. Newel kom soggens gereeld voor, en veral vroeë vlugte word deur vertragings geraak.

Geskiedenis[wysig]

Porto Alegre in 1852

Porto Alegre het sy oorsprong in 'n plaas wat temidde van Indiaanse stamgebiede geleë was. In 1752 het setlaars, wat hoofsaaklik van die Asore-eilande afkomstig was, hier 'n klein nedersetting gestig. Twintig jaar later is die parogie van São Francisco do Porto dos Casais gevorm. Hierdie naam is deur die biskop in die volgende jaar gewysig tot Nossa Senhora Madre de Deus do Porto Alegre (Onse Dame Moeder van God van die Vrolike Hawe). Die nedersetting is as die setel van die plaaslike provinsiale regering gekies.

In 1822, die jaar waarin Brasilië sy onafhanklikheid van Portugal verkry het, het die bevolking van Porto Alegre reeds 12 000 beloop. Tussen 1845 en 1860 het die hawefasiliteite ontstaan, en die inwonertal het aan die einde van die eeu die 70 000-kerf verbygesteek.

In 1963 het Porto Alegre as gasheerstad van die Wêreld-Universiteitspele internasionale bekendheid verwerf. Die bewoners het in 1985 'n belangrike rol in die beweging vir vrye verkiesings gespeel, en een van die grootste betogings in die land het hier plaasgevind.

Eksterne skakels[wysig]

Commons-logo.svg
Wikimedia Commons het meer media verwant aan:
Porto Alegre (kategorie)


Vlag van Brasilië Hoofstede van Brasilië Wapen van Brasilië
Hoofstede AracajuBelémBelo HorizonteBoa VistaBrasíliaCampo GrandeCuiabáCuritibaFlorianópolisFortalezaGoiâniaJoão PessoaMacapáMaceióManausNatalPalmasPorto AlegrePorto VelhoRecifeRio BrancoRio de JaneiroSalvador da BahiaSão PauloSão LuísTeresinaVitória